5
Is Kedsirkunsidar
1 Netudtulan is langun he menge hadì he menge Amorihanen he ziyà te zapit te edsenlepan te Jordan wey is langun he menge hadì he menge Canaanhen he ziyà te veyvey te Mediteraneo ke mibmenumenu te Nengazen is kebpemezahi zin te Wahig he Jordan hein midlayun is menge Israilihanen. Umbe nengahandek sikandan ne naawà is kevurut dan te kebpekidtebek te menge Israilihanen.
2 Dutun he timpu migkaǥi is Nengazen diyà te ki Josue te, “Vaal ka te menge ubpit he lintikan he vatu, ne veeli nu en maan is kedsirkunsidar te menge Israilihanen he wazà mesirkunsidar.”
3 Umbe, mibaal si Josue te menge ubpit ne midsirkunsidar zin is menge Israilihanen diyà te vuntud he migngezanan te Midsirkunsidaran.
4-6 Iyan heini hinungdan ke maan is mibpensirkunsidar ni Josue is menge maama: Hein mibpuun is menge Israilihanen diyà te Ehipto, nesirkunsidar en is langun he menge maama kandan. Piru sikan is impen-anak seled te 40 he tuig te kebpekeriǥuriǥu zan diyà te sibsivayan ne wazè pa mengesirkunsidar. Ne zutun he timpu, is menge maama he hustu en he id-asdang te tebek su netengkaan en is keǥurang dan nemematey su wazè dan mebpezumazuma te Nengazen. Migkeǥiyan sikandan te Nengazen he kenè dan en egkaahà is meupiya wey selebpeten he tanà he impenaad din diyà te menge kepuun tew he ibeǥey kenitew.
7 Ne iyan heini sikandan midsirkunsidar ni Josue, su wazà heini sikandan mesirkunsidar zutun te timpu te kedtulung dan kedhipanew.
8 Ne hein nengesirkunsidar en sikandan, mid-ubpàubpà dà sikandan diyà te kampu zan taman te nengeulian dan.
9 Ne migkaǥi is Nengazen diyà te ki Josue te, “Guntaan he andew in-awè ku ziyà te keniyu is keelezan tenged te kegkeuripena keniyu ziyà te Ehipto.” Umbe iyan inngazan dutun he lugar is Gilgal taman en guntaan.
10 Ne zutun te kegkampu te menge Israilihanen diyà te Gilgal, he ziyà te suǥud te Jerico, midsilibra zan is Pista te Kedlavey te Belinsuǥuen. Mibeelan dan heini hein mezukilem te ike-14 he andew te nehuna he vulan.
11 Ne hein nepawà, nemengaan sikandan te sinandag he trigu wey supas he wazè din tapey he iyan kes menge abut dutun te tanà.
12 Ne puun dutun neengked en is kegkengeulug te ‘manna’, umbe puun dutun iyan en keuyaǥan dan is menge abut he ebpuun te tanà he Canaan.
13 Ne hein diyà si Josue te uvey te Jerico, duen etew he neehè din he edhithitindeg diyà te etuvangan din he egkulang te ispada. Ne mid-insaan sikandin ni Josue te, “Sundaru zey ve sikew etawa kuntada zey sikew?”
14 Ne midtavak haazà is etew te, “Kenà a keniyu sundaru he zumezapig keniyu ne kenà a zaan keniyu kuntada. Midhengkayi a he peremandar te menge sundaru te Nengazen.” Ne impaahà ni Josue is kedtahud din su midlangkeb sikandin, ne zutun mid-insà sikandin te, “Datù, hengkey is idsuǥù nu kediey te suluǥuen nu?”
15 Ne midtavak haazà is peremandar te menge sundaru te Nengazen te, “Pul-uta nu is sandalyas nu su segradu he lugar heini is nehitindeǥan nu.” Ne midtuman ni Josue haazà is insuǥù kandin.