18
Impaahà ni Elias he Tutuu Sikandin he Ebpeneuven te Megbevayà
1 Tetelu en he tuig he wazà med-uzan. Ne sevaha zutun he timpu, migkaǥi is Nengazen diyà te ki Elias te, “Hipanew ka ne peehè ka ki Ahab, su ibpeuzan ku en.”
2 Umbe, midhendiyà si Elias te ki Ahab.
Dutun utew en mepait is bitil ziyà te Samaria.
3 Umbe, impetawag ni Ahab si Obadias he iyan edumala te turuǥan din. (Ne si Obadias, dekelà is kedtahud din te Nengazen.
4 Hein mibpepenhimetayan ni Jezebel is menge ebpeneuven te Nengazen, in-eles ni Obadias is 100 he ebpeneuven diyà te zezuwa he surung; 50 is diyà te kada surung, ne mibeǥayan din sikandan te keenen wey wahig.)
5 Migkaǥi si Ahab diyà te ki Obadias te, “Ebeyaan ta is langun he serebseb wey beuǥan kayi te nasyun tew, su kela ke mekeehè ki te igkekumpey ta te menge kudà wey menge asnu tew, su para kenà mebpematey.”
6 Umbe, mibahin dan is edrigriǥuwan dan dutun te nasyun dan. Umbe midhipanew is kada sevaha kandan pehendiyà te netendek he edrigriǥuwan din.
7 Ne zutun te kedhipanew ni Obadias, neuma zin si Elias. Nekilala zin si Elias umbe midluhud sikandin te kedtahud ki Elias, ne ke sikandin te, “Iyan ke ve heeyan, Datù Elias?”
8 Midtavak si Elias te, “Uya. Genat ka ǥuntaan, ne keǥiyi nu is egalen nu he si Ahab he kayi a.”
9 Piru migkaǥi si Obadias te, “Datù, kenè nu himuwa he ebpemiligru is untung ku ki Ahab, su wazà salà he nehimu ku ziyà te kenikew.
10 Tutuu is migkaǥi ku ziyà te etuvangan te uuyag he Nengazen he Megbevayè nu, he wazà nasyun etawa ginhedian he wazà impehendutun te egalen ku te kebpen-ahà kenikew. Emun egkaǥi is menge pengulu zutun te menge nasyun wey menge ginhedian he wazè ka ziyà te kandan he lugar, ibpepenangdù sikandan ni Ahab he wazè ke zan maahà.
11 Ne ǥuntaan edsuǥuen a kenikew te kedhendiyà te egalen ku te kegkaǥi he kayi ka?
12 Hengkey ke ebpekeiniyug a ǥuntaan ne ed-uwiten ka te Mulin-ulin te Nengazen diyà te lugar he wazè ku metueni? Ne emun ebpekeuma kayi si Ahab he wazè ke en, ne edhimetayan e zin. Piru, datù, nenilbi a te Nengazen puun te menguhed e pa.
13 Wazè nu ve mezineg is mibeelan ku zuen te ebpenhimetayan ni Jezebel he menge ebpeneuven te Nengazen? In-eles ku is 100 he ebpeneuven te Nengazen diyà te zezuwa he surung, 50 is diyà te kada surung, ne mibeǥayan ku sikandan te keenen wey wahig.
14 Ne ǥuntaan edsuǥuen a kenikew te kedhendiyà te egalen ku te kegkaǥi he kayi ka? Siguradu edhimetayan e zin!”
15 Migkaǥi si Elias te, “Ebpenangdù a ziyà te uuyag he Nengazen he Mekeǥeǥehem, he edsilbiyan ku, he ebpaahà a ki Ahab guntaan he andew.”
16 Umbe, midhendiyà si Obadias te ki Ahab ne migkeǥiyan din he zutun si Elias, ne migenat si Ahab te kedhinguma ki Elias.
17 Ne hein neuma ni Ahab si Elias, ke sikandin te, “Iyan ke ves iyan heeyan is ebpendezaat te Israel.”
18 Midtavak si Elias te, “Kenà a iyan ebpendezaat te Israel, kekenà, iyan ka wey is pemilya te amey nu. Su wazè niw tumana is menge suǥù te Nengazen wey mid-azap niw is menge ledawan ni Baal.
19 Ne ǥuntaan, ipetiǥum nu is langun he menge etew te Israel kayi te kedì diyà te Buntud he Carmel. Ne ipehendiyè nu zaan sikan is 450 he ebpeneuven ni Baal wey is 400 he ebpeneuven ni Ashera, he ibpemekaan ni Jezebel.”
20 Umbe, midtiǥum ni Ahab is langun he menge etew ziyà te Israel wey sikan is ebpemeneuven diyà te Buntud he Carmel.
21 Mid-uvey si Elias diyà te menge etew is migkaǥi te, “Sengemenu keluǥayad is kedsunud niw te zezuwa he tuluuwen? Emun iyan Megbevayà is Nengazen ne sunuza niw sikandin piru emun iyan Megbevayà si Baal ne iyan niw sunuza.” Piru wazà medtavak is menge etew.
22 Mid-uman megkaǥi si Elias te, “Iyan e zà nesamà te menge ebpeneuven te Nengazen, piru si Baal 450 is kandin he ebpeneuven.
23 Ne ǥuntaan uwiti key te zezuwa he tudu he vaka. Ne mebpilì dutun is menge ebpeneuven ni Baal te kandan he edlepaan ne penggetaza zan ne id-untud dan haazà diyà te kayu he idtavun, piru kenà haazà edreteman te hapuy is ed-em-emuren he tavun. Ne iyan daan haazà ebeelan ku ziyà te sevaha he vaka; idsavuk ku zaan haazà diyà te tavun he ed-em-emuren ne kenè ku zaan haazà edreteman te hapuy is tavun.
24 Ne pengemuyù kew ziyà te keniyu he ed-ezapen he iyan medretem te hapuy, ne ebpengemuyù a zaan diyà te Nengazen. Ne sikan is edretem te hapuy ziyà te tavun, ne iyan tutuu he Megbevayà.” Ne nekeuyun dutun is menge etew.
25 Dutun migkeǥiyan ni Elias is menge ebpeneuven ni Baal te, “Iyan kew huna su mahabet kew. Pilì kew te sevaha he tudu he vaka ne endama niw heini. Ampù kew ziyà te ed-ezapen niw piru kenè niw retemi te hapuy is tavun niw.”
26 Umbe, migkuwa zuen te menge ebpeneuven ni Baal is tudu he vaka he mid-uwit diyà te kandan, ne mid-andam dan heini. Ne nengemuyù dan diyà te ki Baal puun te meselem taman te meudtu. Igkulahì dan en is lalag te, “He Baal, tevaka key kenikew!” Edsayewsayew en sikandan is edlingutlingut duen te pemuhatà he mibeelan dan. Piru wazà mibeǥey te hangyù dan.
27 Ne hein meudtu en ne ed-un-undahan en sikandan ni Elias he ke sikandin te, “Sigudu kew en pengulahì, su megbevayè man buwa sikandin! Kela ke mezalem is ked-isip-isip din etawa midhimeley, etawa zuen din nehipenawan, etawa nekelipezeng ne kinahanglan he ebpukawen.”
28 Umbe, midsigudu en sikandan megkulahì ne mibpemelian dan en is menge lawa zan te ubpit wey ispada, su iyan haazà neleyaman dan te ebaal, ne nenuravid en is lengesa zan.
29 Midlavey en is meudtu ne edsigudu ǥihapun sikandan ebpengulahì taman te neuma is uras te mahapun he kebpemuhat, piru wazà mibeǥey te hangyù dan.
30 Migkeǥiyan ni Elias is langun he etew zutun te, “Uvey kew zini te kedì.” Ne mid-uvey is menge etew ziyà te kandin. Ne mibpurungan din sikan is pemuhatà he para te Nengazen he nezeetan.
31 Migkuwa sikandin te 12 he menge vatu he iyan ibpesavut din is 12 he tribu he menge anak ni Jacob, sikan is etew he migngezanan te Nengazen ki Israel.
32 Ne mibeelan din haazà is menge vatu he pemuhatà para te Nengazen, ne migkenalan din is peliǥuy zutun te pemuhatà. Haazà is kanal ed-ereǥan te liwazà te saku he venì.
33 Impurung din ipemelastar is tavun dutun te pemuhatà ne midsapù din sikan is baka ne in-untud din duen te tavun. Ne migkeǥiyan din is menge etew te, “Busbusi niw te heepat he umuy te wahig heini is pemuhat wey is tavun din.” Ne hein nepasad dan haazà,
34 migkaǥi si Elias te, “Umani niw vusbusi.” Ne hein nepasad dan te ebusbus, mid-uman megkaǥi si Elias te, “Umani niw vusbusi te iketelu.” Midtuman dan haazà is nekaǥi ni Elias,
35 ne midtudà is wahig peliǥuy zuen te pemuhatà ne nepenù sikan is kanal.
36 Hein timpu en te kebpemuhat, mid-uvey si Elias he ebpeneuven duen te pemuhatà ne nengemuyù sikandin. Ke sikandin te, “Nengazen he Megbevayà ni Abraham, ni Isaac, wey ni Jacob, ipeehè nu is puriba ǥuntaan he andew he iyan ka Megbevayà te Israel ne suluǥuen a kenikew, ne mibeelan ku heini is langun he vaal su iyan insuǥù nu.
37 Iveǥey nu is hangyù ku, Nengazen su para metueni kayi te menge etew he iyan ka Nengazen Megbevayà, ne ibpelikù nu sikandan diyà te kenikew.”
38 Ne segugunà nekeuma is hapuy he ebpuun diyà te Nengazen, ne midtutung dutun te hapuy sikan is pemuhat, sikan is tavun, sikan is menge vatu, wey is tanà, wey mibpemezahan din is wahig duen te kanal.
39 Ne hein naahà haazà te langun he menge etew zutun, midlangkeb dan is egkaǥi te, “Is Nengazen, iyan Megbevayà! Is Nengazen iyan Megbevayà!”
40 Ne segugunà midsuǥù ni Elias is menge etew te, “Dekepa niw is menge ebpeneuven ni Baal. Kinahanglan he wazà ebpekepelaǥuy kandan!” Umbe midakep dan ne mid-uwit sikandan ni Elias diyà te zal-ug he Kishon ne zutun din penhimetayi.
41 Migkeǥiyan ni Elias si Ahab te, “Genat kad ne kaan ke en su ebpekeume en is mereǥes he uzan.”
42 Umbe, migenat si Ahab su egkaan, ne si Elias mulà, midtekezeg diyà te puntur te Carmel is mid-ampù he eduzungul ziyà te tanà.
43 Ne migkeǥiyan din is suluǥuen din te, “Tekezeg ka ne pentawa nu is daǥat.” Ne midtuman haazà duen te suluǥuen.
Ne kedlikù din diyà te ki Elias ke sikandin te, “Wazè ku naahà.” Kepipitu sikandin ipelikù ni Elias te kebpantew.
44 Ne hein ikepitu en te kedlikù din, ke sikandin diyà te ki Elias te, “Zuen ku naahà he kivel he iring dà keluag te palad te etew he mibpezivavew he ebpuun te lawed.” Ne migkaǥi si Elias te, “Genat ka, ne keǥiyi nu si Ahab he med-untud en te kerwahi zin ne megenat en mintras kenè pa sikandin egkesaut te uzan.”
45 Ne netegteǥaad mibmerusirem en is hewhewanan tenged te menge kivel. Nengeramag wey mid-uzan te mereǥes, ne mid-untud te kerwahi zin si Ahab ne midhendiyà te Jezreel.
46 Ne zutun, mid-ulinan si Elias te Nengazen! Midlislis din is pendivavew he visti zin ne mibekesan din ne mibpelelaǥuy su edhuna sikandin ki Ahab diyà te Jezreel.