3
Mibuyù si Solomon te Ketau
(2 Cronica 1:1-13)
1 Pinaaǥi te kebpengesawa ni Solomon te anak te Faraon, he hadì te Ehipto, nehimu sikandin he zumezapig kayi he nasyun. Mid-uwit din is esawa zin ne ziyè din dèpa ipeubpà te Inged ni David taman te nepasad is kebenguna te turuǥan din, baley te Nengazen, wey is menge verengbeng peliǥuy te Jerusalem.
2 Dutun he timpu wazè pa valey te Nengazen he para te kebeǥey te zengeg kandin, umbe ziyè dà ebpemuhat is menge etew te menge simbahan diyà te metikang he menge lugar.
3 Impaahà ni Solomon is kebmahala zin te Nengazen pinaaǥi te kedtuman te menge sulunuzen he impemilinbilin kandin te amey zin he si David. Iyan dà is, nemuhat sikandin wey midtutung te menge veyewà diyà te menge simbahan diyà te metikang he menge lugar.
4 Duen timpu he midhendiyà si Hadì Solomon te Gibeon su ebpemuhat, su zutun is utew nevantug he pemuhatà diyà te metikang he lugar. Nemuhat sikandin diyà te pemuhatà he 1,000 he menge pemuhat he edtutungen.
5 Ne kegkezukilem dutun, mibpeehà kandin is Nengazen pinaaǥi te teǥeinep. Migkaǥi is Megbevayà diyà te kandin te, “Buyù ka te minsan hengkey he egkesuatan nu su ibeǥey ku kenikew.”
6 Midtavak si Solomon te, “Impeehè nu is dekelà he ǥaǥew nu te amey ku he si David, he suluǥuen nu, su mepezumdumahan sikandin kenikew, metazeng, wey hustu is kebpengungubpaan din. Impelaus nu is kebpaahà nu te zekelà he keupiya nu pinaaǥi te kebeǥayi nu kandin te sevaha he anak he iyan ebpekeilis kandin te kedhadì guntaan.
7 Nengazen he Megbevayè ku, iyan a is suluǥuen nu in-ilis nu te amey ku he si David te kedhadì, minsan menguhed e pa he kenà metau he ebpengulu.
8 Ne ǥuntaan kayi a zuma te pinilì nu he menge etew he kenà egkevilang tenged te kahabet dan.
9 Umbe, beǥayi a te ketau te kedumala kayi te menge etew nu wey te kedsavut ke hengkey is meupiya wey ke hengkey is mezaat. Su iyan dà heeyan ibpekehimu ku te kedumala kayi te menge etew nu he utew mahabet.”
10 Ingkelipey te Nengazen haazà is mibuyù ni Solomon.
11 Umbe, migkaǥi is Megbevayà diyà te kandin te, “Tenged te iyan nu mibuyù is ketau te kedumala te menge etew ku, ne wazè nu iyan buyua is meluǥayad he untung etawa ketiǥeyunan etawa kemetayan te menge kuntada nu,
12 ibeǥey ku kenikew is mibuyù nu. Ebeǥayan ku sikew te ketau wey kedsavut he wazè pa maangken te minsan hentei he nehuna kenikew wey egkehuziyan kenikew.
13 Ibeǥey ku zaan kenikew is wazè nu vuyua, he iyan is ketiǥeyunan wey zengeg, su para wazà duma he hadì he ebpekerepeng kenikew seled te tivuuk he untung nu.
14 Ne emun edsunuzen nu is menge paaǥi ku wey edtumanen nu is ibpetuman ku he menge sulunuzen wey menge suǥù iring te mid-ulaula te amey nu he si David, ebeǥayan ku sikew te meluǥayad he untung.”
15 Nepukew si Solomon, ne zutun neisip-isip din he nekidlalag kandin is Nengazen pinaaǥi te teǥeinep. Te kedlikù ni Solomon diyà te Jerusalem, midhitindeg sikandin diyà te etuvangan duen te Kavan te Kebpekid-uyun te Nengazen, ne nemuhat sikandin te menge pemuhat he edtutungen wey menge pemuhat he para te meupiya he kedepità. Ne midhimu sikandin te keemuran para te langun he menge upisyal zin.
Is Kedhukum ni Solomon he Nezumahan te Kegkeuluwanen
16 Ne zutun, duen dezuwa he vahi he terebahu zan is kebelegyà te zengeg dan he midhendiyà te ki Hadì Solomon.
17 Migkaǥi is sevaha kandan te, “Mahal he Hadì, siak wey heini is bahi he zuma ku telaamur ziyà te sevaha zà he valey. Ne te zutun sikandin te valey mid-anak a.
18 Ne kedlavey te tetelu he andew, iyan en maan sikandin mid-anak. Ne iyan key zà is dezuwa ed-ubpà dutun te valey ne wazè en duma.
19 Sevaha he kezukileman, nehizeǥaan din is kandin he anak ne minatey heini.
20 Ne hein liwazè en te kezukileman mid-enew sikandin ne migkuwa zin is anak ku ziyà te avey ku dutun te nekelipezeng a. Midhulid din haazà is anak ku, ne iyan din impehulid kedì sikan is minatey he anak din.
21 Ne hein meselem, mid-enew a su ibpesusu ku is anak ku, ne neehè ku he minatey en heini. Ne hein midsusi ku is batà diyà te merayag, nesusi ku he kenè bes iyan sikan is anak ku.”
22 Ne midtavak sikan is sevaha he vahi te, “Kenà heeyan tutuu! Kediey he anak kes uuyag, ne iyan minatey is kenikew.” Ne migkaǥi is nehuna he vahi te, “Kenà heeyan tutuu! Kenikew he anak is minatey, ne iyan uuyag is kediey.” Umbe mibpelelisà sikandan dutun te etuvangan te hadì.
23 Migkaǥi haazà is hadì te, “Pudu kew ed-angken keniyan te uuyag he vatà, ne wazà sevaha keniyu he ed-angken te minatey he vatà.”
24 Umbe, midmandar haazà is hadì he uwiti sikandin te ispada. Ne hein mid-uwitan en sikandin te ispada,
25 ne ke sikandin te, “Baasa heeyan is uuyag he vatà ne itukid diyà te kandan.”
26 Ne tenged te hizu zuen te tutuu he iney zuen te anak din, migkeǥiyan din haazà is hadì te, “Pekelalaglalag ka, Mahal he Hadì, kenè nu himetayi heeyan is batà. Iveǥey nu en lang keniyan te vahi.” Piru migkaǥi mulà haazà is sevaha he vahi te, “Baase en heeyan is batà su para wazà sevaha kenami he ebpekaangken duen.”
27 Ne zutun migkaǥi haazà is hadì te, “Kenè en baasa heeyan is batà. Iveǥey heini ziyà te vahi he midhangyù he kenà heini himetayi, su iyan tutuu he iney zin.”
28 Ne hein nezineg haazà is disisyun ni Hadì Solomon te menge etew te Israel, neteǥuan sikandan te zekelà he kedtahud kandin, su nemesahan dan he zuen din ketau te kedhukum te hustu he imbeǥey kandin te Megbevayà.