15
Is Kedhadì ni Azaria ziyà te Juda
(2 Cronica 26:1-23)
1 Nehimu he hadì diyà te Juda si Azaria he anak ni Amazia hein ike-27 he tuig te kedhadì ni Jeroboam II diyà te Israel.
2 Mibpenuiǥen si Azaria te 16 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 52 he tuig. Is iney zin iyan si Jecolia he tig-Jerusalem.
3 Meupiya is ulaula ni Azaria ziyà te etuvangan te Nengazen, iring te mibeelan te amey zin he si Amazia.
4 Piru wazè din iperundus is menge simbahan diyà te metikang he menge lugar, umbe mibpedayun dutun is menge etew te kebpemuhat te menge pemuhat wey kedtutung te menge beyewà.
5 Impaantus te Nengazen te melimezang he zaru te lundis si Azaria taman en te andew te kebpatey zin. Diyà sikandin med-ubpà te nekesivey he valey. Iyan si Jotam he anak din, nengulu ziyà te turuǥan wey te menge etew ziyà te Juda.
6 Is duma pa he ǥuǥud mehitenged te kedhadì ni Azaria, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
7 Hein minatey en si Azaria, inleveng sikandin diyà te midlevengan te menge kepuun din diyà te Inged ni David. Ne is anak din he si Jotam iyan nekeilis kandin te kedhadì.
Is Kedhadì ni Zacarias diyà te Israel
8 Nehimu he hadì diyà te Israel si Zacarias he anak ni Jeroboam II hein ike-38 he tuig te kedhadì ni Azaria ziyà te Juda. Diyà te Samaria med-ubpà si Zacarias, ne midhadì sikandin seled te heenem he vulan.
9 Mezaat is ulaula zin diyà te etuvangan te Nengazen, iring te mibeelan te menge kepuun din. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
10 Dutun he timpu, mibpelanu si Shalum he anak ni Jabesh te mezaat diyà te ki Zacarias. Midhimetayan din si Zacarias diyà te etuvangan te menge etew, ne iyan sikandin mid-ilis medhadì.
11 Is duma pa he ǥuǥud mehitenged te kedhadì ni Zacarias, ne ingkesurat diyà te Libru he Midsuratan te menge Keguǥuza te menge Hadì te Israel.
12 Umbe, netuman is migkaǥi te Nengazen diyà te ki Jehu he ke sikandin te, “Is menge kevuwazan nu ebpekahadì te Israel taman te ikeepat he lapis.”
Is Kedhadì ni Shalum diyà te Israel
13 Nehimu he hadì diyà te Israel si Shalum he anak ni Jabesh hein ike-39 he tuig te kedhadì ni Uzia diyà te Juda. Diyà te Samaria med-ubpà si Shalum, ne midhadì sikandin seled dà te senge vulan.
14 Su midhimetayan sikandin ni Menahem he anak ni Gadi hein midhendiyà sikandin te Samaria he ebpuun te Tirza ne iyan sikandin mid-ilis te kedhadì.
15 Is duma pa he ǥuǥud mehitenged te kedhadì ni Shalum ragkes sikan is pelanu zin te kedhimatey ki Zacarias, ne ingkesurat diyà te Libru he Midsuratan te menge Keguǥuza te menge Hadì te Israel.
16 Dutun he timpu, midsurung ni Menahem is Tifsa wey is menge lugar ziyà te peliǥuy kayi taman te Tirza, su is menge meǥinged kayi kenà edsurindir ziyà te kandin. Mibpenhimetayan din is langun he meǥinged diyà te Tifsa, ne midsirian din is getek te meǥingey he menge vahi.
Is Kedhadì ni Menahem diyà te Israel
17 Nehimu he hadì diyà te Israel si Menahem he anak ni Gadi hein ike-39 he tuig he kedhadì ni Azaria ziyà te Juda. Diyà te Samaria med-ubpà si Menahem ne midhadì sikandin seled te 10 he tuig.
18 Mezaat is ulaula zin diyà te etuvangan te Nengazen. Seled te tivuuk he kedhadì din wazà sikandin med-engked he ebaal te menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
19 Dutun he timpu, midhendiyà si Hadì Tiglat Piliser he hadì te Asiria te Israel su edsurungen din heini. Mibeǥayan ni Menahem si Tiglat Piliser te 35,000 he kilu he pelata su para tevangi zin si Menahem te kebpeiseǥa te kelig-en te kedhadì din.
20 Haazà is menge pelata migkuwa ni Menahem diyà te menge sepian diyà te Israel pinaaǥi te kebpeǥes din he mebeǥey is kada sevaha kandan te 50 he vuuk he pelata. Umbe wazè en mebpekidtebek haazà is hadì te Asiria ne mid-ulì diyà te nasyun din.
21 Is duma pa he ǥuǥud mehitenged te kedhadì ni Menahem, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
22 Ne hein minatey en si Menahem, si Pekaya he anak din, iyan nekeilis kandin te kedhadì.
Is Kedhadì ni Pekaya ziyà te Israel
23 Nehimu he hadì diyà te Israel si Pekaya he anak ni Menahem hein ike-50 he tuig te kedhadì ni Azaria ziyà te Juda. Diyà te Samaria med-ubpà si Pekaya, ne midhadì sikandin seled te zezuwa he tuig.
24 Mezaat is ulaula zin diyà te etuvangan te Nengazen. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
25 Dutun he timpu, mibpelanu te mezaat si Peka he anak ni Remalia ziyà te ki Pekaya. Heini si Peka iyan peremandar te menge sundaru ni Pekaya. Duma te 50 he menge etew ziyà te Gilead, midhimetayan ni Peka si Pekaya ragkes si Argob wey si Arie, diyà te melig-en he vahin te turuǥan diyà te Samaria. Ne iyan sikandin mid-ilis ki Pekaya te kedhadì.
26 Is duma pa he ǥuǥud mehitenged te kedhadì ni Pekaya, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
Is Kedhadì ni Peka ziyà te Israel
27 Nehimu he hadì diyà te Israel si Peka he anak ni Remalia hein ike-52 he tuig te kedhadì ni Azaria ziyà te Juda. Diyà te Samaria med-ubpà si Peka, ne midhadì sikandan seled te 20 he tuig.
28 Mezaat is baal zin diyà te etuvangan ne Nengazen. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
29 Hein timpu te kedhadì ni Peka, midsurung ni Hadì Tiglat Piliser he hadì te Asiria is Israel, ne naaǥew zin is menge inged he Ion, Abel Bet Maaca, Janoa, Kedesh, wey Hazor. Naaǥew zin daan is Gilead, Galilea, wey tivuuk he tanà te Naftali. Ne mid-uwit din diyà te Asiria is menge meǥinged kayi su mibihag din.
30 Ne zutun mibpelanu te mezaat si Hoshea he anak ni Elah diyà te ki Peka he anak ni Remalia. Midhimetayan din si Peka ne iyan sikandin mid-ilis medhadì. Nehitavù heini hein ike-20 he tuig te kedhadì ni Jotam, he anak ni Uzia ziyà te Juda.
31 Is duma pa he ǥuǥud mehitenged te kedhadì ni Peka, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
Is Kedhadì ni Jotam diyà te Juda
(2 Cronica 27:1-9)
32 Nehimu he hadì diyà te Juda si Jotam he anak ni Uzia hein ikezuwa he tuig te kedhadì ni Peka he anak ni Remalia ziyà te Israel.
33 Mibpenuiǥen si Jotam te 25 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Is iney zin iyan si Jerusha he anak ni Zadok.
34 Meupiya is ulaula ni Jotam diyà te etuvangan te Nengazen, iring te mibeelan te amey zin he si Uzia.
35 Piru wazè din iperundus is menge simbahan diyà te metikang he menge lugar, umbe mibpedayun is menge etew te kebpemuhat te menge pemuhat wey te kedtutung te menge veyewà. Si Jotam is mibaal te Egkezizaya he Gemawan te valey te Nengazen.
36 Is duma pa he ǥuǥud mehitenged te kedhadì ni Jotam, wey is menge mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
37 Dutun te timpu te kedhadì din, impepuun ipesurung te Nengazen diyà te Juda si Hadì Rezin he hadì te Aram wey si Peka he anak ni Remalia.
38 Hein minatey en si Jotam, inleveng sikandin diyà te midlevengan te menge kepuun din diyà te Inged ni David te kepuun din daan. Ne si Ahaz he anak din iyan nekeilis kandin te kedhadì.