23
Is menge Keveg-uwan he Midhimu ni Josia
(2 Cronica 34:3-7, 29-33)
1 Ne zutun impetawag ni Hadì Josia is langun he edumala te Juda wey Jerusalem.
2 Midhendiyà sikandin te valey te Nengazen duma te langun he menge etew ziyà te Juda wey Jerusalem puun te utew lavew is pid-etawan din pehendiyà te utew minus is pid-etawan din. Miduma zaan is menge memumuhat wey menge ebpeneuven. Mibasa ni Josia ziyà te kandan is langun he ingkesurat duen te Libru te Kebpekid-uyun te Megbevayà he naahà diyà te valey te Nengazen.
3 Ne midhitendeg si Josia diyà te kilid te tukud he hitindeǥà te menge hadì. Ne nenangdù sikandin diyà te etuvangan te Nengazen he edsunud sikandin te Nengazen pinaaǥi te kedtuman te menge suǥù din, menge penurù, wey menge sulunuzen, te kedtuman he ebpuun diyà te tivuuk he gehinawa zin wey kedsavut din. Pinaaǥi kayi egketuman is ibpetuman diyà te paaǥi te kebpekid-uyun te Megbevayà he ingkesurat duen te libru. Ne midsaad daan is menge etew he edtumanen dan is paaǥi te kebpekid-uyun te Megbevayà.
4 Ne midsuǥù ni Hadì Josia si Hilkia he lavew he memumuhat, wey sikan is menge memumuhat he iring te kegkelavew ni Hilkia, wey kes menge memumuhat he ebantey te ǥemawan te valey te Nengazen, te ked-awà puun dutun te valey te Nengazen te langun he menge gelemiten he egemiten te ked-ezapa ki Baal, ki Ashera, wey te egkengaahà diyà te langit. Ne mibpevinsulan din heini ziyà te ǥawas te Jerusalem, he ziyà te vevesukà he zal-ug te Kidron, ne mid-uwit is avu kayi ziyà te Betel.
5 Impaawè din diyà te ketengdanan dan is menge memumuhat he ebpenilbi te zuma he menge ed-ezapen. Heini he menge memumuhat, insarig dengan kandan te menge hadì diyà te Juda is kedtutung te menge veyewà diyà te menge simbahan diyà te metikang he menge lugar ziyà te menge inged diyà te Juda wey ziyà te peliǥuy te Jerusalem. Midtutung sikandan te menge veyewà para ki Baal wey te egkengaahà diyà te langit–andew, bulan, wey menge vituen.
6 Impaawà daan ni Hadì Josia sikan is tukud he simbulu te vahi he ed-ezapen he si Ashera diyà te valey te Nengazen ne mid-uwit haazà diyà te ǥawas te Jerusalem, he ziyà te zal-ug te Kidron, ne mibinsulan dutun. Ne impevekvek din heini ne insawed diyà te penlevengà.
7 Imperundus din daan is menge valey te menge maama wey menge vahi he ebelegyà te zengeg dan, he ziyà te uvey te valey te Nengazen he zutun ebpenahì is menge vahi te menge visti he egemiten te ked-azap ki Ashera.
8 Impelikù ni Josia ziyà te Jerusalem is langun he menge memumuhat he ziyà med-ubpà te zuma he menge inged diyà te Juda. Midremerikan din is menge simbahan diyà te metikang he menge lugar, puun te Geba pehendiyà te Beersheba, he zutun edtutung te menge veyewà is menge memumuhat. Imperundus din is menge simbahan diyà te Pultahan ni Josue, he gubirnedur te Jerusalem. Heini he pultahan diyà te egkeǥivang emun edseled ki zuen te pultahan te inged.
9 Is menge memumuhat he ebpemenilbi ziyà te menge simbahan diyà te metikang he menge lugar, ne wazà tuǥuti te kebpenilbi ziyà te pemuhatà he para te Nengazen diyà te Jerusalem, piru midtuǥutan sikandan te kegkaan te supas he wazè din tapey zuma he menge memumuhat.
10 Midremerikan daan ni Josia is pemuhatà diyà te Tofet, he ziyà te Suǥud-suǥud te Ben Hinom, su para wazà ebpekepemuhat te anak din dutun diyà te ki Molec pinaaǥi te hapuy.
11 In-awè din daan diyà te ǥemawan te valey te Nengazen is menge kudà he impehinungud te menge hadì diyà te andew. Heini he menge kudà, diyà dapit te lama te valey te Nengazen, uvey te ruǥu te upisyal he si Natan Melec. Mibinsulan daan ni Josia is menge kerwahi he halad para te andew.
12 Imperundus din daan is menge pemuhatà he mibeelan te menge hadì diyà te Juda ziyà te patag he atep he zivavew te ruǥu ni Ahaz; elin daan imperundus din is menge pemuhatà he mibpeveelan ni Manase ziyà te zezuwa he lama zuen te valey te Nengazen. Impevekbek din heini ne insimburè din diyà te zal-ug te Kidron.
13 Midremerikan din daan is menge simbahan diyà te metikang he menge lugar he ziyà dapit te edsilaan te Jerusalem wey is diyà te egkezivavà te Buvungan te Kegkezeeti. Heini he menge simbahan mibangun ni Hadì Solomon he hadì te Israel he para ki Ashtoret, te utew mezaat he vahi he ed-ezapen te menge Sidunhanen, wey para ki Kemosh, te utew mezaat he ed-ezapen te menge Moabitanhen, wey para zaan ki Molec, te utew mezaat he ed-ezapen te menge Amunihanen.
14 Midpenrupet ni Josia is tedeman he menge vatu wey mibpenamped din is menge tukud he simbulu te vahi he ed-ezapen he si Ashera. Ne midremerikan din heini he menge lugar pinaaǥi te kebpeyepati zuen te tulan te menge etew.
15 Minsan is pemuhatà diyà te simbahan diyà te metikang he lugar he ziyà te Betel midrundus ni Josia. Heini he simbahan impeveelan ni Jeroboam he anak ni Nebat, he iyan nehimu he hinungdan te kebpekesalà te menge tig-Israel. Mibekbek heini ni Josia ne mibinsulan din ragkes is tukud he simbulu te vahi he ed-ezapen he si Ashera.
16 Ne hein nenlangulangu sikandin diyà te peliǥuy, neehè din is menge leveng diyà te kilid te vuvungan. Ne impekuwa zin is menge tulan dutun te menge leveng ne mibinsulan din diyà te pemuhatà diyà te Betel su paaǥi haazà te kedremeriki zuen. Is kegkeul-ulaha kayi, ne sumalà te nekaǥi te Nengazen pinaaǥi te suluǥuen din he midtagnà te kegkehitevua kayi.
17 Mid-insà si Hadì Josia mehitenged te leveng he neehè din te, “Hentei ki leveng haazà?” Midtavak is menge etew ziyà te inged te, “Leveng heeyan te suluǥuen te Megbevayà he tig-Juda iyan sikandin midtagnà kayi te mibeelan nu ǥuntaan keniyan te pemuhatà kayi te Betel.”
18 Migkaǥi haazà is hadì te, “Bey-ani niw en heeyan is leveng din. Kenè niw kuwaa is menge tulan din.” Umbe wazè dan kuwaa is menge tulan din ragkes is menge tulan te ebpeneuven he tig-Samaria.
19 Ne midrundus ni Josia is menge simbahan diyà te metikang he menge lugar, diyà te Samaria, iring te mibeelan din diyà te Betel. Heini he menge simbahan is impeveelan te menge hadì te Israel utew ingkepauk te Nengazen.
20 Mibpenhimetayan ni Josia is langun he menge memumuhat dutun he menge simbahan diyà mismu te menge pemuhatà dutun. Ne midtutung sikandin te menge tulan te etew zutun te menge pemuhatà he paaǥi te kedremeriki zuen. Ne midlikù sikandin diyà te Jerusalem.
(2 Cronica 35:1-19)
21 Mibmenduan ni Josia is langun he menge etew te, “Edsilibra kiw te Pista te Kedlavey te Belinsuǥuen su wey meveǥayi te zengeg is Nengazen he Megbevayè tew, sumalà is ingkesurat kayi te Libru te Kebpekid-uyun te Megbevayà.”
22 Ne nekeviza heini he kedsilibraha te Pista te Kedlavey te Belinsuǥuen duen te kedsilibraha kayi hein timpu he menge zatù pa is edumala te Israel wey timpu te menge hadì te Israel wey Juda.
23 Midsilibra ziyà te Jerusalem heini he pista he paaǥi te kebeǥey te zengeg diyà te Nengazen hein ike-18 he tuig te kedhadì ni Josia.
24 In-awà ni Josia ziyà te Jerusalem wey te tivuuk he Juda is menge veyilan he ebpekidlalag te gimukud te nemematey en, is menge ledawan he ed-ezapen te menge pemilya, is duma he menge ed-ezapen, wey is langun he utew mezaat he ed-ezapen te menge etew. Mibeelan heini ni Josia su edtumanen din is menge suǥù he ingkesurat diyà te libru he naahà te memumuhat he si Hilkia ziyà te valey te Nengazen.
25 Wazè pa hadì he iring ki Josia he edsunud te egkesuatan te Nengazen te ebpuun te tivuuk he gehinawa zin, tivuuk he kedsavut din, tivuuk he zesen din. Mibpurungan din tumana is langun he Kesuǥuan ni Moises. Ne wazà iring kandin duen te nekesunud he menge hadì.
26 Piru minsan pa te iyan heini, wazà gihapun maawà is kegkepeuki te Nengazen te menge tig-Juda, tenged te langun he mibeelan ni Manase he utew zin ingkepauk.
27 Umbe, migkaǥi is Nengazen te, “Id-awè ku ziyà te etuvangan ku is menge tig-Juda iring te mibeelan ku te menge tig-Israel, ne idselikwey ku is Jerusalem, he pinilì ku he inged, wey heini is baley ku he nekaǥi ku he kayi a ebeǥayi te zengeg.”
Is Ketepusan te Kedhadì ni Josia
(2 Cronica 35:20–36:1)
28 Is duma pa he ǥuǥud mehitenged te kedhadì ni Josia, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
29 Hein edhadì pa si Josia, si Faraon Neco he hadì te Ehipto midhendiyà te Wahig he Eufrates su edtevangan din is hadì te Asiria. Ne migenat si Hadì Josia wey is menge sundaru zin su ebpekidtebek dan ki Neco, piru midhimetayan sikandin ni Neco hein neked-uma zan diyà te Megido.
30 Ingkarga te menge suluǥuen din te kerwahi is lawa zin ne inlikù dan diyà te Jerusalem ne inleveng dan sikandin diyà te keugelingen din he penlevengà. Ne iyan midhimu te menge etew ziyà te Juda he hadì he ilis kandin, is anak din he si Jehoahaz pinaaǥi te kedlenahi kandin.
Is Kedhadì ni Jehoahaz diyà te Juda
(2 Cronica 36:2-4)
31 Mibpenuiǥen si Jehoahaz te 23 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan. Is iney zin iyan si Hamutal he anak ni Jeremias he tig-Libna.
32 Mezaat is ulaula zin diyà te etuvangan te Nengazen iring te mibeelan te menge kepuun din.
33 Mibpirisu sikandin ni Faraon Neco ziyà te Ribla he sakup te tanà he Hamat, su para kenà sikandin mekahadì diyà te Jerusalem. Impevayad te vuhis ni Neco is Juda te 3,500 he kilu he pelata wey 35 he kilu he vulawan.
34 Si Eliakim he sevaha pa he anak ni Josia iyan midhimu ni Neco he hadì he ilis ki Jehoahaz. Mid-ilisan ni Neco is ngazan ni Eliakim te Jehoyakim. Ne si Jehoahaz miduma ni Neco ziyà te Ehipto ne ziyà mebpatey.
35 Impevayad ni Hadì Jehoyakim te vuhis is menge tig-Juda sumalà te ketiǥeyunan dan, su para mekevayad sikandin te vuhis he ibpevayad kandin ni Faraon Neco.
Is Kedhadì ni Jehoyakim diyà te Juda
(2 Cronica 36:5-8)
36 Mibpenuiǥen si Jehoyakim te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Is iney zin iyan si Zebida he anak ni Pedaya he tig-Ruma.
37 Mezaat is ulaula zin diyà te etuvangan te Nengazen, iring te mibeelan te menge kepuun din.