3
Mibpetebekà is Israel wey is Moab
1 Nehimu he hadì diyà te Israel si Joram he anak ni Ahab hein ike-18 he tuig te kedhadì ni Jehoshafat diyà te Juda. Diyà med-ubpà te Samaria si Joram, ne midhadì sikandin seled te 12 he tuig.
2 Mezaat is ulaula zin diyà te etuvangan te Nengazen, piru kenà iring kezaat te ulaula te amey zin wey iney zin. Imperupet din sikan is tedeman he vatu he mibpeveelan te amey zin he para te kebeǥey te zengeg ki Baal.
3 Piru mid-iringan din is menge salà ni Jeroboam he anak ni Nebat, he nehimu he hinungdan te kebpekesalà te menge tig-Israel. Ne wazè din engkezi heini he menge salà.
4 Si Hadì Mesha he hadì te Moab, mid-uyag te menge kerehidu, ne geina te sakup te Israel is Moab, ebeǥey si Mesha ziyà te hadì te Israel te 100,000 he nati he menge kerehidu he meemahan, wey vulvul te 100,000 he meǥurang en he meemahan he menge kerehidu.
5 Piru hein minatey en si Ahab, nekidsukulà sikandin te hadì te Israel.
6 Umbe zutun he timpu, midtiǥum ni Joram is tivuuk he menge Israilihanen he sundaru ne migawas dan diyà te Samaria su edsurung dan diyà te Moab.
7 Ne mibpeuwit si Joram te lalag diyà te ki Hadì Jehoshafat he hadì te Juda he edhenduen te: “Nekidsukulà kediey is hadì te Moab. Eduma ke ve kedì te kebpekidtebek kandan?” Midtavak si Jehoshafat te, “Uya, andam a he eduma kenikew, wey andam a he ebpeǥamit kenikew te menge sundaru ku wey menge kudè ku.”
8 Ne mid-insà si Jehoshafat te, “Hendei kiw ebayà emun edsurung kiw?” Midtavak si Joram te, “Diyè kiw ebayà te sibsivayan diyà te Edom.”
9 Umbe, mibpezumahà haazà is hadì te Israel wey hadì te Juda, ne miduma zaan kandan is hadì te Edom. Ne hein pitu en he andew is kedhipanew zan, neeminan te wahig is menge sundaru wey is menge uyaǥen dan.
10 Migkaǥi is hadì te Israel te, “Mekehizuhizu kiw is tetelu he hadì! Iyan dà in-uwita te Nengazen kenitew kayi su ibeǥey kiw zin diyà te hadì te Moab.”
11 Piru mid-insà si Jehoshafat te, “Wazè tew ve zuma he ebpeneuven te Nengazen? Emun duen, ne ebpekeinsè kiw ziyà te Nengazen pinaaǥi kandin ke hengkey is ereg he ebeelan tew.” Midtavak is sevaha he upisyal te hadì te Israel te, “Si Elisha he anak ni Shafat ne kayi te kenitew. Ed-uǥup sikandin dengan ki Elias.”
12 Migkaǥi si Jehoshafat te, “Uya, tutuu iyan he ebpekepekidlalag is Nengazen pinaaǥi kandin.” Umbe midhendiyà te kandin haazà is hadì te Israel, Juda, wey Edom.
13 Ne migkeǥiyan ni Elisha haazà is hadì te Israel te, “Hengkey is lavet ku kenikew? Diyè ka pevayà te menge ebpeneuven he midseriǥan te amey nu wey iney nu!” Migkaǥi haazà is hadì te Israel te, “Kenà, su iyan is Nengazen mid-uwit kenami te tetelu kayi he lugar su wey key zin ikeveǥey ziyà te hadì te Moab.”
14 Migkaǥi si Elisha te, “Egkaǥi a te tutuu ziyà te etuvangan te uuyag wey Mekeǥeǥehem he Nengazen, he edsilbiyan ku, he kenè ku pezem sikew edseǥipaan emun kenà tenged te kedtahud ku ki Hadì Jehoshafat he hadì te Juda.
15 Sigi, dumaha kayi te kediey is etew he metau he edtukar te alpa.”
Ne zutun te kedtukar te alpa, midumala si Elisha te ǥehem te Nengazen,
16 ne ke sikandin te, “Iyan heini migkaǥi te Nengazen: ‘Heini he zal-ug egkepurung egkewehiǥi.
17 Minsan wazà uzan wey keramag, egkepurung egkewehiǥi heini is dal-ug. Ne ebpekeinum kew wey is menge uyaǥen niw.
18 Melemu zà heini para te Nengazen. Ne liyu keniyan, ibpezaag din daan keniyu is menge Moabitanhen.
19 Edezeetan niw is meupiya he menge inged dan he miberengbeng. Ebpemilayen niw is meupiya he menge kayu zan, ebumbunan niw is menge teheb dan, wey edezeetan niw is selebpeten he menge vevesukè dan pinaaǥi te kedtembui niw zuen te menge vatu.’ ”
20 Ne hein neume en is uras te kebpemuhat hein mid-ilis he andew, midtudà is wahig he ebpuun diyà te Edom, ne neeneb te wahig haazà he tanà.
21 Dutun he timpu, nekezineg te tudtul is langun he menge Moabitanhen he edsurungen sikandan te tetelu he hadì. Umbe midtiǥum dan is langun kandan he ebpekehimu he ebpekidtebek, batà etawa meǥurang, ne impepelastar sikandan diyà te zulunà te Moab.
22 Ne hein mid-enew zan su meselem en, neehè dan is wahig he egkesilaan te andew he henduen be te lengesa.
23 Ke sikandan te, “Lengesa heeyan! Siguradu he mibpetebekà is tetelu he hadì ne mibpehimhimetayà sikandan. Ne egkuwaan tew is menge azen dan!”
24 Piru hein nekeuma is menge Moabitanhen diyà te kampu te menge Israilihanen, nenggawas is menge Israilihanen ne mid-etaki zan is menge Moabitanhen taman te nekepelaǥuy is menge Moabitanhen. Ne midal-as sikandan te menge Israilihanen taman diyà te Moab ne mibpenhimetayan dan.
25 Mibengkag dan is menge inged, ne midtembuan dan te menge vatu is selebpeten he menge pemuleey taman te nekezengkuur is menge vatu zutun. Mibumbunan dan is menge teheb wey mibpemiley zan is meupiya he menge kayu. Ne iyan dà nesamà is inged he Kir Hareset, piru midliǥuyan heini te menge sundaru zan he zuen dan menge limpawes ne midsurung dan heini.
26 Ne hein naahà duen te hadì te Moab he nezaag dan en te tebek, miduma zin is 700 he menge etew zin he zuen dan menge ispada su ebpelaǥuy zan he edreseng duen te menge sundaru te hadì te Edom, piru wazà sikandan mekepelaǥuy.
27 Umbe, migkuwa zin is kinekekayan he anak din he iyan pezem ebpekeilis kandin te kedhadì, ne impemuhat din heini ziyà te verengbeng he pemuhat he edtutungen. Tenged kayi, is menge Israilihanen, utew zekelà is kegkepeuki kandan te menge Moabitanhen, umbe mibey-anan dan is hadì te Moab ne nemen-ulì dan diyà te nasyun dan.