5
Mibewian is Daru te Lundis ni Naaman
1 Si Naaman he peremandar te menge sundaru ziyà te Aram, edtehuzen te hadì diyà te Aram, su pinaaǥi kandin mibpengelinteuwan te Nengazen he mekezaag is Aram. Meupiya sikandin he sundaru, piru zuen utew mezaat he zaru te lundis he ed-isipen he meremerik.
2 Ne hein midsurung te menge sundaru te Aram is Israel, duen dan nevihag he raǥaraǥa he nehimu he suluǥuen te esawa ni Naaman.
3 Ne sevaha he andew, migkaǥi heini is raǥaraǥa ziyà te egalen din te, “Emun ebpekidhinguma is egalen ku he si Naaman te ebpeneuven he ziyà te Samaria, ne ebewian din is daru te lundis din.”
4 Umbe, migkeǥiyan ni Naaman is hadì dan mehitenged te nekaǥi zuen te raǥaraǥa he ebpuun te Israel.
5 Midtavak haazà is hadì te Aram te, “Genat ka, ne uwita nu is surat ku ziyà te hadì te Israel.” Umbe migenat si Naaman he mid-uwit te gasa he 350 he kilu he pelata, 70 he kilu he vulawan, wey sepulù he lukut he visti.
6 Ne iyan heini lalag he netaǥù duen te surat he mid-uwit din diyà te hadì: “Ibpehendiyan ku si Naaman he suluǥuen ku su wey nu mevewii is daru te lundis din.”
7 Ne hein nevasa zuen te hadì te Israel haazà is surat, mibindas din is bisti zin su mibmezaat is gehinawa zin he ke sikandin te, “Maan is kayi zin te kediey suǥùa heini is etew he zuen daru te lundis din? Hengkey e ves, Megbevayà a? Duen ku ve gehem te kedhimatey wey ked-uyag te etew? Ebpen-ehè dà sikandin te hinungdan wey key mekedtebek!”
8 Ne hein netuenan ni Elisha, he suluǥuen te Megbevayà, haazà he hitavù, mibpeuwitan din te lalag haazà is hadì he edhenduen te: “Maan is mibindas nu is kumbalè nu? Ipehengkayi nu te kedì heeyan is etew, ne egketuenan din he zuen ebpeneuven kayi te Israel.”
9 Umbe, midhendiyà si Naaman duma is menge kudà wey menge kerwahi ne mid-ubpàubpà diyà te ǥemawan te valey ni Elisha.
10 Midsuǥù si Elisha te ibpekaǥi ziyà te ki Naaman he medhendiyà sikandin te Wahig he Jordan ne lùlui zin is lawa zin te kepipitu, ne egkeulian sikandin.
11 Piru nepauk si Naaman ne migenat is ebpeneremudtemud. Ke sikandin te, “Kunaan ku ke egawas sikandin is ed-etuvang kedì. Iyan ebpeebuten ku he ebpengumew sikandin te Nengazen he Megbevayè din ne ibayew zin is belad din diyà te zivavew te lundis ku he zuen din daru ne ebewian e zin.
12 Kenè be meupiya pa is wahig diyà te Abana wey Farfar ziyà te Damascus kenà te zuma he menge wahig kayi te Israel? Kenè be ziyè e zà mebpenhugas para meulii a?” Umbe migenat sikandin he utew egkepauk.
13 Piru mid-uvey ziyà te kandin is menge suluǥuen din he ke sikandan te, “Datù, emun mereǥen he ebeelan is idsuǥù kenikew te ebpeneuven, kenè be ebeelan nu? Ne melemu zà he ebeelan is insuǥù din he kebpenlùlù para meulii ka.”
14 Umbe, midhendiyà si Naaman te Wahig he Jordan ne midlùluan din is lawa zin te kepipitu, sumalà is nekaǥi te suluǥuen te Megbevayà he si Elisha. Ne neulian is daru zin, ne mibmetilak is lundis din he henduen be te lundis te zeisey pa he vatà.
15 Ne zutun midlikù si Naaman duma te menge zuma zin duen te suluǥuen te Megbevayà. Midhitindeg sikandin diyà te etuvangan ni Elisha he ke sikandin te, “Guntaan netuenan ku en he wazè en duma he Megbevayà kayi te tivuuk he kelibutan, kekenà, iyan dà is Megbevayà te Israel. Umbe zewata nu heini is igasa ku kenikew, datù.”
16 Ne midtavak si Elisha he ebpeneuven te, “Nenangdù a ziyà te Nengazen he edsilbiyan ku, he kenà a edawat te gasa.” Midteǥel sikandin ni Naaman he zewata zin haazà is gasa, piru wazè din dewata.
17 Migkaǥi si Naaman te, “Emun kenè ka edawat, datù, ne tuǥuti a kenikew he egkergahan ku te tanà he ebpuun kayì is dezuwa he asnu ku, ne haazà ed-uwiten ku ziyà te kenami su wey ku zuen egkepemuhatan. Su puun guntaan ed-engked ad he ebpemuhat te menge pemuhat he edtutungen wey zuma he menge pemuhat he para te zuma he menge ed-ezapen su iyan dà ebpemuhaten ku is Nengazen.
18 Piru, datù, berakat he peseyluwa a te Nengazen emun eduma a te hadì diyà te simbahan para te ed-ezapen he si Rimon te kedsimba zutun. Su iyan igkeveeli ku kayi su ǥeina te upisyal a he sineriǥan te hadì. Ne verakat he peseyluwa a te Nengazen emun edluhud a zutun.”
19 Migkaǥi si Elisha te, “Berakat he meupiya is hipanew niw te ed-ulì.”
Piru kenè pa ganì meziyù is nehipenawan ni Naaman,
20 ne sikan is suluǥuen ni Elisha he si Gehazi, neisip din is, “Impeǥenat te egalen ku si Naaman he Aramihanen he wazè din dewata is igasa zin. Ebpenangdù a ziyà te uuyag he Nengazen he edel-asen ku sikandin ne egkuwa a ziyà te kandin te minsan hengkey.”
21 Umbe, migègaanan del-asa ni Gehazi si Naaman. Ne hein naahà ni Naaman si Gehazi is ebpelelaǥuy pehendiyà te kandin, nenaug sikandin puun te kerwahi zin su edsinuǥung kandin. Mid-insà si Naaman te, “Duen be mezaat he nehitavù?”
22 Midtavak si Gehazi te, “Wazà. Midsuǥù e zà te egalen ku te kegkaǥi ziyà te kenikew he zuen nekeuma he zezuwa he menge vetan-en he sakup te grupu te menge ebpeneuven, he ebpuun diyà te vuvungan te Efraim. Ne edhangyù is egalen ku ziyà te kenikew te 35 he kilu he pelata wey zezuwa he lukut he visti.”
23 Migkaǥi si Naaman te, “Uya, heini zed is 70 he kilu he pelata.” Ne midteǥel sikandin ni Naaman he zewata zin haazà. Intaǥù ni Naaman sikan is pelata ziyà te zezuwa he bag ragkes en is dezuwa he lukut he visti, ne imbeǥey zin haazà diyà te zezuwa he suluǥuen din he iyan ed-uwit dutun para ki Gehazi.
24 Ne hein nekeuma zan en diyà te vuvungan, migkuwa ni Gehazi zuen te menge suluǥuen sikan is dezuwa he bag ne impelikù din sikandan. Ne mid-uwit din haazà diyà te valey ne in-eles din.
25 Ne zutun mibpaahà sikandin ki Elisha. Mid-insaan sikandin ni Elisha te, “Hendei ka ebpuun, Gehazi?” Midtavak si Gehazi te, “Wazà a medhipanew.”
26 Piru migkaǥi si Elisha te, “Wazè nu ve metueni he pinaaǥi te ǥehem te Nengazen neventayan ku is kebpenaug ni Naaman puun te kerwahi zin te kedsinuǥung kenikew? Kenà heini timpu te kedawat te selapì, manggad, pemuleey te ulibu, pemuleey te paras, menge uyaǥen, wey menge suluǥuen.
27 Ne tenged te kebeeli nu kayi, edhalin diyà te kenikew is daru ni Naaman wey ziyà te menge kevuwazan nu taman te taman.” Ne hein mid-ewaan en ni Gehazi si Elisha mibmeputì is lundis din tenged duen te zaru.