Menge Penhulùhulù
1
1 Utew mekevulungbulung is Jerusalem, he zengan mahabet is menge etew kayi. Dengan nevantug heini kayi te tivuuk he kelibutan, iyan, guntaan neiring en te valu he vahi. Dengan iyan heini edhuna he inged, piru ǥuntaan neiring en heini te uripen.
2 Neiring sikandin te vahi he egkeiinek te tivuuk he kezukileman; is menge luhè din ebpenudà diyà te enaping din. Wazà minsan sevaha zuen te menge mibmahal zin he midlangan kandin. Pudu midluib kandin is menge emiǥu zin, ne nehimu sikandan he menge kuntada zin.
3 Impaantus is Juda ne mibihag is menge etew kayi. Diyè en sikandan mekeubpà te zuma he menge nasyun he zutun mereǥen is kebpekesavuk dan. Edel-asen sikandan te menge kuntada zan ne wazè dan egkepeleǥuyan.
4 Is menge zalan pehendiyà te Jerusalem mekeseseeng, su wazè en edhendiyà te ked-azap dutun te netelaan he menge timpu te pista. Mekevulungbulung is langun he pultahan kayi. Edag-es is menge memumuhat kayi, ne is menge raǥa ebpemenlalew. Utew mekeseseeng is nehitavù te Jerusalem.
5 Is menge kuntada zin iyan en nengulu kandin, ne heini sikandan mibmeuswaǥen. Impaantus te Nengazen is Jerusalem tenged te mahabet he menge salè din. Is menge meǥinged kayi mibihag te menge kuntada zin.
6 Naawè en is kekempet te Jerusalem. Is menge pengulu kayi neiring te egkevitil he menge selazeng he ebpen-ahà te egketabtab piru wazè dan egkaahà. Edluyahan en sikandan dutun te ebpeleǥuyan dan is edal-as kandan.
7 Ne ǥuntaan te edlised is Jerusalem wey egketazintazin en, netenuzan din is langun he ketiǥeyunan din dengan. Hein neulug sikandin diyà te gehem te menge kuntada zin, ne wazà midtavang kandin. Midsudì wey mid-engitan sikandin te menge kuntada zin dutun te kegkezeeti zin.
8 Utew zekelà is salà te Jerusalem, umbe nehimu heini he meremerik. Is langun he mibeǥey kandin te zengeg dengan ne edsudì en kandin su neehè dan is kegkelevasi kandin. Edag-es sikandin ne midtembunan din is enaping din tenged te kegkeeled din.
9 Is keremerik din naahà te langun. Wazè din isipa zengan is egkehitavù kandin. Utew sikandin nezeeti, ne wazà midtavang kandin. Umbe migkaǥi sikandin te, “He Nengazen, seǥipaa nu is kegkerasey ku, su nezaag a te kuntada.”
10 Mibpenguwa te kuntada is langun he ketiǥeyunan din. Neehè din he midseled diyà te valey te Nengazen is kenà menge Israilihanen–heini he menge etew, kenà edtuǥutan te Nengazen te kedseled diyà te baley zin.
11 Is menge etew zin, edag-es dutun te kebpen-ehè dan te egkekaan dan. Inliwè dan te keenen is ketiǥeyunan dan su wey meuyag-uyag sikandan. Migkaǥi is Jerusalem te, “He Nengazen, seǥipaa a, su mibpeel-elezan a.”
12 Migkeǥiyan din is menge etew he sumeseǥazà te, “Kenè niw ve ebeliyen heini is nehitavù kedì? Ehè kew ke zuen be egkeehè niw he nerasey iring te kegkerasey ku. Heini he kemeresayan, insilut te Nengazen kayi te kedì dutun te timpu te utew zin kegkepauk.
13 Puun te langit imbulus din is hapuy he henduen be te neketutung te menge tulan ku. Midlitaǥan din is beyeey ku ne neutel a. Midhimu e zin he mekevulungbulung ne midsiguduwan e zin resaya.
14 Mid-amur-amur zin is menge salè ku ne iring te mibeelan din heini he hiket. Inhiket din kedì heini he iyan ingkeǥuyuza kedì diyà te kegkevihag. Iring a te mid-eyuǥuwan. Impemeluya a te Nengazen ne imbeǥey e zin diyà te menge kuntada ku he kenè ku egkegaga.
15 Inselikwey te Nengazen is langun he menge sundaru ku. Midtiǥum sikandin te menge sundaru he edezaat te menge etew ku he vetan-en he menge maama. Is menge meǥinged diyà te Juda, iring dà sikandan te menge paras he midtekutakan te Nengazen.
16 Ne tenged keniyan nemeniǥis is menge luhè ku te kedsineǥew ku. Ne wazà midlangan wey midlig-en kedì. Mekehizuhizu is menge meǥinged kayi su nezaag sikandan te menge kuntada zan.”
17 Mibuyù te tavang is Jerusalem, piru wazà midtavang kandin. Ketau te Nengazen he mehimu he kuntada te menge kevuwazan ni Jacob is menge nasyun diyà te peliǥuy zan. Ne is Jerusalem ed-isipen he meremerik te menge kuntada zan.
18 Migkaǥi is Jerusalem te, “Metazeng is Nengazen; piru wazè ku tumana is suǥù din. Sikiyu is langun he menge etew, pemineg kew, wey tengtengi niw is kegkerasey ku. Mibihag is menge vetan-en ku he menge vahi wey menge maama.
19 Mibuyù a te tavang diyà te menge zumezapig kedì piru midluivan e zan. Nemematey is menge memumuhat ku wey menge perezumala te inged dutun te ebpen-ahà sikandan te egkekaan dan su wey zan pezem meuyag-uyag.
20 “Nengazen, ahàa nu ke sengemenu kezekelà is kegkeseeng ku! Utew heini merasey he henduen be te egkevidtew en is gehinawa ku su geina te nehimu a he mesinupaken kenikew. Duen kebpemenhimatey ziyà te menge zalan ku, ne minsan diyà te seled te valey ne zuen ebpematey.
21 Nezineg te menge etew is kedag-es ku, piru wazà minsan sevaha he midlangan kedì. Nezineg te langun he menge kuntada ku heini is kegkerasey ku, ne ingkelipey zan heini is kedresaya nu kedì. Deyzey pezem ke egkeume en is andew he insaad nu he edsilutan nu sikandan, su wey zan daan meiring kedì.
22 Ahaà nu is mezaat he vaal zan, ne siluti nu sikandan iring te kedsiluti nu kedì tenged te langun he menge salè ku. Kenè en egkeengked is kebpekezag-es ku ne mesakit is gehinawa ku.”