14
Is Kedlumpiyuwi te Etew he Neulian te Daru Zin te Lundis
1-2 Iyan heini menge sulunuzen he migkaǥi te Nengazen diyà te ki Moises he mehitenged te kedlumpiyuwi te etew he neulian te zaru zin te lundis:
Emun igkepetuenan en diyà te memumuhat is mehitenged te zaru te sevaha he etew,
3 egawas is memumuhat diyà te kampu ne edsusiyen din is lawa zuen te etew. Ke neulian en be heini te zaru zin te lundis,
4 ebpekuwa haazà is memumuhat te zezuwa he tagbis he lumpiyu he uuyag, sengetamped he kayu he sidru, merudtem he hulibis, wey senge verakes he hisupu.
5 Ne ibpehimetayan duen te memumuhat sikan is sevaha he tagbis diyà te zivavew te diniyun he midteǥuan te wahig he ebpuun diyà te serebseb.
6 Ne egkuwaan din sikan is sevaha pa he uuyag he tagbis, kes kayu he sidru, kes merudtem he hulibis wey kes hisupu, ne ibpevudseng din haazà is langun duen te wahig he zuen duen lengesa te tagbis he midhimetayan.
7 Ne haazà is wahig he zuen duen lengesa ne ibpirik din te kepipitu ziyà te etew he neulian te zaru zin te lundis, ne kegkepasad ibpeseyuzan din he lumpiyu en haazà is etew. Ne ibpaawà dutun te memumuhat sikan is uuyag he tagbis.
8 Piru te kenè pa ibpetuenan he lumpiyu en sikandin, kinahanglan he pìpii zin dèpa is bisti zin, kiskisi zin is langun he vulvul zin wey berehibu, ne mebpemeziǥù sikandin. Ne egkehimu en sikandin he edseled diyà te kampu piru kenà sikandin med-ubpà diyà te tulda zin seled te pitu he andew.
9 Ne zutun te ikepitu he andew umani zin kiskisi is langun he vulvul zin wey berehibu, pìpii zin is bisti zin, wey mebpemeziǥù sikandin.
10 Dutun te ikewalu he andew, kinahanglan he med-uwit sikandin te zezuwa he meemahan he kerehidu wey sevaha he vehiyan he kerehidu he senge-tuig is keǥurang he wazè din sazir. Med-uwit daan sikandin te heenem he kilu he meupiya he kelasi he herina he midsehuǥan te lana he pemuhat he para gasa. Wey med-uwit pa sikandin te senge vasu he lana.
11 Ne ed-uwiten dutun te memumuhat haazà is etew wey kes pemuhat din diyà te etuvangan te Nengazen diyà dapit te gemawan te Tulda he Edtelevukaayan.
12 Ne egkuwaan duen te memumuhat sikan is sevaha he meemahan he kerehidu wey sikan is senge vasu he lana, ne ibpemuhat din heini he pemuhat he vayad te salà. Ne ibpeketikang din heini ziyà te etuvangan te Nengazen su pemuhat heini he ibayew.
13 Edlepaan din haazà is kerehidu ziyà te segradu he lugar, ziyà te lepeey te pemuhat he para idlumpiyu wey te pemuhat he edtutungen. Heini is pemuhat he kerehidu, utew segradu, ne para zà heini te menge memumuhat, he iring te pemuhat he idlumpiyu.
14 Egkuwa haazà is memumuhat te zeisey he lengesa zuen te kerehidu he impemuhat ne ibpelis din heini ziyà te kewanan he telinga zuen te etew, wey is tindezekelà te kewanan he velad din wey paa.
15 Idtepayà daan te memumuhat is givang he palad din te zeisey he lana,
16 ne idtiyuk din is tezù te kewanan he velad din kayi te lana ne ibpirik din heini te kepipitu ziyà te etuvangan te Nengazen.
17 Ne sikan is egkesamà dutun te lana ziyà te palad din, ne idazas din daan dutun te etew zuen te mibpendezasan din te lengesa; izazas din heini ziyà te kewanan he telinga zuen te etew, wey te tindezekelà te kewanan he velad din wey paa.
18-20 Ne is egkesamè pa zuen te lana ziyà te palad duen te memumuhat, ne izazas duen te etew ziyà te ulu zin. Ne ibpemuhat dutun te memumuhat sikan is pemuhat he para idlumpiyu. Ne kegkepasad, edlepaan duen te memumuhat sikan is pemuhat he edtutungen ne ibpemuhat din heini ziyà te pemuhatà duma zuen te pemuhat he para gasa. Ne pinaaǥi kayi te ebeelan te memumuhat diyà te etuvangan te Nengazen, egkaawà is keremerik dutun te etew ne egkehimu en sikandin he lumpiyu.
21 Iyan, emun pubri haazà is etew ne kenè din egkeveleveg is kebpemuhat kayi he menge pemuhat, ne med-uwit dà sikandin te sevaha he meemahan he kerehidu he ibpemuhat din he pemuhat he vayad te salà. Ivayew zin heini he pemuhat para te Nengazen para mepesaylu sikandin te menge salè din. Med-uwit daan sikandin te zezuwa he kilu he meupiya he kelasi he herina he midsehuǥan te lana he pemuhat he para gasa. Wey med-uwit pa sikandin te senge vasu he lana.
22 Ne sumalà te egkehimu zin med-uwit sikandin te zezuwa he merepatik etawa zezuwa he limuken; is sevaha, pemuhat he para idlumpiyu kandin ne is sevaha pa, pemuhat he edtutungen.
23 Dutun te ikewalu he andew uwita zin heini is langun he pemuhat diyà te memumuhat diyà te ǥemawan te Tulda he Edtelevukaayan, diyà te etuvangan te Nengazen.
24 Egkuwaan duen te memumuhat sikan is kerehidu he pemuhat he vayad te salà wey sikan is senge vasu he lana ne ivayew zin heini ziyà te etuvangan te Nengazen su pemuhat heini he ibayew.
25 Ne edlepaan din haazà is kerehidu ne egkuwa sikandin te lengesa kayi ne ibpalis din diyà te kewanan he telinga zuen te etew he edlumpiyuwan wey ziyà te tindezekelà te kewanan he velad din wey paa zin.
26 Ne idtepayà dutun te memumuhat is givang he palad din te lana,
27 ne pinaaǥi te kewanan he tezù din, ne ibpirik din haazà is lana te kepipitu ziyà te etuvangan te Nengazen.
28 Is duma he lana ziyà te palad din, idazas din dutun te etew ziyà te midezasan din en te lengesa.
29-31 Is egkesamà duen te lana ziyà te palad te memumuhat, idazas din diyà te ulu zutun te etew. Ne ibpemuhat dutun te memumuhat sikan is dezuwa he merepatik etawa zezuwa he limuken; is sevaha pemuhat he para idlumpiyu ne is sevaha pa para pemuhat he edtutungen. Ipemuhat din daan is pemuhat he para gasa. Pinaaǥi kayi te ebeelan te memumuhat diyà te etuvangan te Nengazen, egkaawà is keremerik te etew.
32 Iyan heini menge sulunuzen mehitenged te kedlumpiyuwi te etew he zuen din daru te lundis emun kenà sikandin ebpekeveleveg te egkinehenglanen he pemuhat para te idlumpiyu.
Is menge Sulunuzen Mehitenged te Hab-ung he Edtuvù diyà te Baley
33 Iyan heini migkaǥi te Nengazen diyà te ki Moises wey ki Aaron
34 mehitenged te ebeelan dan emun duen ibpetuvù te Nengazen he hab-ung diyà te menge valey zan emun diyè dan en te Canaan, kes lugar he imbeǥey te Nengazen kandan wey zan maangken:
35 Emun is teǥiǥaked te valey ebpekeseǥipà he zuen henduen be te hab-ung diyà te valey zin, kinahanglan he keǥiya zin haazà diyà te memumuhat.
36 Ne emun kenè pa edseled is memumuhat dutun te valey te kedsusi ke zuen be zutun hab-ung, medsuǥù sikandin he iǥawas is langun he vutang diyà te seled, su para kenà heini meragkes te ed-isipen he meremerik. Ne kegkepasad, human pa edseled dutun te valey is memumuhat
37 ne edsusiyen din ke hab-ung be is diyà te elavat. Ne emun egkeehè din he meilem-ilem etawa meriǥàriǥà is ebuketur zutun te elavat,
38 egawas sikandin dutun he valey ne ebpelekevan din heini seled te pitu he andew.
39 Ne ikepitu he andew ed-umanan din edsusiya heini. Ne emun edelandap haazà is hab-ung diyà te zuma he vahin te elavat,
40 ne ibpaawè din is menge vahin te elavat he zuen duen hab-ung ne ibpetimbag din heini ziyà te ǥawas te inged, diyà te lugar he edtimbaǥan te ed-isipen he meremerik.
41 Ne ebpekeǥisan din is langun he elavat diyà te seled dutun te valey ne is langun he kinaǥis ibpetimbag din diyà te gawas te inged, diyà te lugar he edtimbaǥan te ed-isipen he meremerik.
42 Ne ebpekuwa sikandin te para idliwan dutun te elavat he mibpen-awà.
43 Iyan, emun kegkepasad dutun ed-umanan pa edheb-unga haazà is baley,
44 ne ed-umanan heini ebeyai te memumuhat su wey zin mesusi. Ne emun midelandap is hab-ung, ne ed-isipen en he meremerik haazà is baley, su heini he kelasi te hab-ung ne ebpenhalin.
45 Umbe, iperundus din heini he valey ne is menge pengawid kayi, idtimbag diyà te ǥawas te inged, he timbaǥà te ed-isipen he meremerik.
46 Is minsan hentei he midseled dutun he valey hein midlekevan pa ne ed-isipen he meremerik taman te kebmerusirem.
47 Is minsan hentei he edlipezeng etawa egkaan diyà te seled kayi he valey kinahanglan he ebpìpian din is bisti zin.
48 Iyan, emun egkesusi zuen te memumuhat he wazè en umana heb-unga haazà is baley hein neliwanan en te elavat sikan is midhab-ung he elavat, ne ebpesayud haazà is memumuhat he lumpiyu haazà he valey su wazè en heb-unga.
49 Ne para isipe en haazà he lumpiyu en he valey, egkuwa is memumuhat te zezuwa he tagbis, kayu he sidru, merudtem he hulibis, wey hisupu.
50 Edhimetayan din is sevaha he tagbis diyà te zivavew te ziniyun he midteǥuan te wahig he ebpuun diyà te serebseb.
51 Ne egkuwaan din sikan is kayu he sidru, is merudtem he hulibis, is hisupu, wey sikan is uuyag he tagbis, ne ibpevudseng din heini is langun duen te wahig he zuen duen lengesa te tagbis he midhimetayan. Ne haazà is wahig he zuen duen lengesa, ne ibpirik din te kepipitu zuen te valey.
52 Umbe, pinaaǥi zuen te lengesa te tagbis, te wahig he ebpuun diyà te serebseb, te uuyag he tagbis, te kayu he sidru, te hisupu, wey merudtem he hulibis, egkelumpiyuwan duen te memumuhat haazà is baley.
53 Ne ibpaawè din sikan is uuyag he tagbis diyà te ǥawas te inged. Pinaaǥi kayi te ebeelan te memumuhat, egkaawà is kegkeremeriki te valey ne egkehimu en heini he lumpiyu.
54-57 Iyan heeyan menge sulunuzen mehitenged te menge zaru te lundis he edeǥes, etawa edlevag, etawa ebmemeriǥà, etawa ebmeputìputì, ne mehitenged te hab-ung te visti wey valey. Ne pinaaǥi kayi he sulunuzen egketuenan niw ke hengkey is lumpiyu wey ke hengkey is meremerik.