16
Is Sulunuzen te Andew te Kebelukas
1-2 Hein minatey en sikan is dezuwa he anak ni Aaron he menge maama dutun te kebpemuhata zan te Nengazen, migkaǥi is Nengazen diyà te ki Moises te, “Keǥiyi nu is suled nu he si Aaron he kenà sikandin medseled dutun te Utew Segradu he Lugar, dutun te liyu te kurtina, te minsan hengkey he uras he egkesuat sikandin. Su emun ed-ul-ulahan din heini ne ebpatey sikandin. Su kayi he lugar ibpeehè ku is kebpekiduma ku pinaaǥi te ǥapun dutun te renged te tangeb te Kavan te Kebpekid-uyun.”
3 Iyan heini insuǥù te Nengazen he veeli ni Aaron dutun te andew he edseled sikandin diyà te Utew Segradu he Lugar: Med-uwit sikandan te turiti he vaka he pemuhat he para idlumpiyu wey meemahan he kerehidu he pemuhat he edtutungen.
4 Kinahanglan he mebpemeziǥù sikandin ne isul-ub din is bisti he para te lavew he memumuhat he pudu linu: is pendizalem he visti he ebpeketambun te pid-etawan din, is pendivavew he visti, is bakes, wey is tengkulu.
5 Mebeǥey kandin te zezuwa he meemahan he menge kambing is keet-etawan te Israel he pemuhat he para idlumpiyu wey sevaha he meemahan he kerehidu he pemuhat he edtutungen.
6 Ibpemuhat ni Aaron haazà is turiti he vaka he pemuhat he para idlumpiyu para mehimu sikandin he lumpiyu wey is menge pemilya zin.
7 Ne egkuwaan din haazà is dezuwa he kambing ne ed-uwiten din daan diyà te etuvangan te Nengazen, diyà te ǥemawan te Tulda he Edtelevukaayan.
8 Ne edripa sikandin ke hendei zapit dutun te zezuwa he kambing is para te Nengazen wey is para ki Azazel.
9 Is kambing he egkeripahan he para te Nengazen, ne pemuhat he para idlumpiyu.
10 Piru is kambing he egkeripahan he para ki Azazel, ibpemuhat din heini he uuyag diyà te Nengazen ne ibpaawè din heini ziyà te sibsivayan, su wey melibri is menge etew puun te menge salè dan.
Is menge Kegeniza zuen te Tulumanen
11 Edlepaan ni Aaron sikan is turiti he vaka he pemuhat he para idlumpiyu kandin wey te menge pemilya zin.
12 Ne egkuwa sikandin te selevukà te veyewà ne ebpenuen din heini te vaǥa he ebpuun diyà te pemuhatà he ziyà te seled te tulda. Ne egkuwa zaan sikandin te zezuwa he kemkem he mehemut he pinu he veyewà, ne ed-uwiten din heini ziyà te Utew Segradu he Lugar.
13 Ne ziyà te etuvangan te Nengazen, idsavuk din haazà is beyewà duen te hapuy, ne is evel kayi ebpekeeneb duen te tambun te Kavan te Kebpekid-uyun, umbe kenà sikandin ebpatey.
14 Egkuwa sikandin te lengesa zuen te vaka ne edhitindeg sikandin diyà te egkesineruwan duen te Kavan te Kebpekid-uyun te Nengazen he edsinaru ziyà te edsilaan. Ne pinaaǥi te tezù din ebpirikan din te kepipitu sikan is tambun kayi.
15 Edlepaan din daan sikan is kambing he pemuhat he para idlumpiyu te menge etew. Ed-uwiten din is lengesa kayi ziyà te Utew Segradu he Lugar ne ibpirik din duen te tambun te Kavan te Kebpekid-uyun, iring duen te mibeelan din duen te lengesa te vaka.
16 Pinaaǥi kayi te ebeelan ni Aaron, egkelumpiyuwan is Utew Segradu he Lugar te kegkeremeriki zuen tenged te keremerik te menge Israilihanen wey tenged te menge salà dan wey menge kedsupak dan. Ebeelan din daan heini ziyà te zuma he vahin duen te tulda su ziyà man heini mekepelastar te teliwazà te kampu zan te menge meremerik.
17 Kinahanglan he wazà etew he ebpundu ziyà te Tulda zutun te uras te kedseled ni Aaron diyà te Utew Segradu he Lugar taman te egawas sikandin. Emun egkepasad din en te ebaal is tulumanen para melumpiyuwi sikandin, is pemilya zin, wey is tivuuk he keet-etawan te Israel,
18 egawas sikandin duen te Utew Segradu he Lugar ne edhendiyà te pemuhatà he ziyà te ǥemawan te tulda. Ne egkuwa sikandin duen te lengesa zuen te vaka wey kambing he impemuhat ne ibpalis din duen te menge sungeysungey te menge suyuk duen te pemuhatà su wey melumpiyuwi heini.
19 Ne pinaaǥi te tezù din ibpirik din te kepipitu zutun te pemuhatà is duma he lengesa te kebpemuhat kayi ziyà te Nengazen wey te ked-ewaa te keremerik te menge Israilihanen.
20 Ne emun egkepasad en ni Aaron te edlumpiyu sikan is Utew Segradu he Lugar wey is duma he parti zuen te tulda ragkes en is pemuhatà, ne ed-uwiten din diyà te teliwazà sikan is uuyag he kambing.
21 Ne idampè din is dezuwa he velad din diyà te ulu zuen te kambing ne idtug-an din is langun he menge salà wey kedsupak te menge Israilihanen. Pinaaǥi kayi ebpekahalin is menge salè dan diyà te ulu zutun te kambing. Ne ibpepaawà ni Aaron haazà is kambing diyà te sibsivayan te etew he midseriǥan te kebaal kayi.
22 Umbe, ed-uwiten dutun te kambing is langun he salà te menge Israilihanen diyà te sibsivayan.
23 Ne edseled si Aaron dutun te tulda ne edluwasen din is bisti zin he visti te lavew he memumuhat he imbivisti zin hein wazè pa sikandin medseled diyà te Utew Segradu he Lugar, ne idtaǥak din heini zutun te tulda.
24 Ne ebpemeziǥù sikandin diyà te sevaha he segradu he lugar zutun te Tulda ne kegkepasad ebivisti sikandin te urdinaryu. Ne egawas sikandin ne ibpemuhat din sikan is dezuwa he pemuhat he edtutungen para mevelukasi sikandin wey is menge Israilihanen te menge salè dan.
25 Edtutungen din daan diyà te pemuhatà is menge tavà dutun te pemuhat he para idlumpiyu.
26 Sikan is etew he insarig kandin is kebpaawà duen te kambing he para ki Azazel kinahanglan he ebpìpian din dèpa is bisti zin wey mebpemeziǥù te kenè pa sikandin edlikù diyà te kampu.
27 Kinahanglan he ed-uwiten diyà te ǥawas te kampu wey edtutungen is nesamà duen te vaka wey kambing he migkuwaan te lengesa he mid-uwit diyà te Utew Segradu he Lugar he inlumpiyu kayi.
28 Is etew he edtutung kayi kinahanglan he ebpìpian din dèpa is bisti zin wey mebpemeziǥù te kenè pa sikandin edlikù diyà te kampu.
29-31 Iyan heini menge sulunuzen he ebeelan te menge Israilihanen wey te kenà menge Israilihanen he mid-ubpà duma kandan, ne tumana zan heini taman te taman. Dutun te ikesepulù he andew te ikepitu he vulan kinahanglan he mebpuasa zan ne kenè dan medterebahu, iring te Andew te Kedhimeley. Su iyan heeyan andew he ebeelan is tulumanen te kebelukas kandan puun te menge salè dan su wey zan mehimu he lumpiyu ziyà te etuvangan te Nengazen.
32 Is memumuhat he mibpilì wey mid-urdinahan he iyan ebpekeilis te amey zin te kegkelavew he memumuhat iyan ebaal zutun he tulumanen. Ivivisti zin is bisti te lavew he memumuhat,
33 ne veeli zin is tulumanen te kedlumpiyu zuen te Utew Segradu he Lugar, ziyà te zuma pa he vahin dutun te Tulda ragkes en is pemuhatà, is menge memumuhat, wey is menge etew te Israel.
34 Kinahanglan he edtumanen dan heini he sulunuzen taman te taman. Ne veeli zan heini kesevaha kada tuig.
Ne midtuman heini ni Moises sumalà te insuǥù te Nengazen.