20
Is Silut Tenged te menge Salà
1 Midsuǥù te Nengazen si Moises
2 he keǥiya zin heini ziyà te menge Israilihanen:
Is minsan hentei keniyu te menge Israilihanen etawa kenà menge Israilihanen he mid-ubpà duma keniyu he ebpemuhat te anak din diyà te ed-ezapen he si Molec, kinahanglan he penulenga niw te vatu taman te kebpatey zin.
3-4 Egkeepesan ku heeyan he etew ne kenè niw en isipa he zuma niw, su zutun te kebpemuhata zin te anak din diyà te ki Molec, midremerikan din is lugar he zutun a keniyu ed-ezapa ne mibpendezeisey zin is ngazan ku. Emun ebey-anan niw zà haazà he etew,
5 iyan a mismu egkuntra kandin wey te pemilya zin wey te langun he edsunud kandin te kebpemuhat diyà te ki Molec. Kenè ku sikandan ed-isipen he zuma niw.
6 Egkeepesan ku zaan is etew he edangep wey edsunud te menge veyilan he ebpekidlalag te ǥimukud te nemematey en. Kenè ku sikandan ed-isipen he zuma niw.
7 Ihalad niw is keugelingen niw para kediey wey pengungubpaan kew he segradu, su iyan a kes Nengazen he Megbevayè niw.
8 Tumana niw is menge sulunuzen he ibpesunud ku, su iyan a is Nengazen midsivey keniyu para kedì.
9 Is minsan hentei he edrewakan din is amey zin etawa iney zin kinahanglan he edhimetayan. Iyan dà sikandin egkevasul zutun te kedhimetayi kandin.
10 Emun ebpekidhilavet is maama te esawa te zuma, ne sikandin wey kes bahi kinahanglan he edhimetayan.
11 Emun ebpekidhilavet is maama te sevaha te menge esawa te amey zin, mibpeel-elezan din is amey zin. Ne sikandan is dezuwa zutun te vahi kinahanglan he edhimetayan. Iyan dà sikandan egkevasul zutun te kemetayen dan.
12 Emun is amey ebpekidhilavet te ambey zin, ne sikandan is dezuwa kinahanglan he edhimetayan. Su mezaat is mibeelan dan. Iyan dà sikandan egkevasul zutun te kemetayen dan.
13 Emun is maama ebpekidhilavet te iring din he maama, ne sikandan is dezuwa kinahanglan he edhimetayan su utew mezaat is mibeelan dan. Diyè dà te kandan igkevasul is kemetayen dan.
14 Emun ed-esewaan te maama is iney wey anak, kinahanglan he ebinsulan sikandan is tetelu, su mezaat is mibeelan dan. Kenà ereg he ebpedayun heini he kelelalung diyà te keniyu.
15-16 Emun duen maama etawa vahi he ebpekidhilavet te uyaǥen, kinahanglan he edhimetayan sikandin wey haazà is uyaǥen. Diyè dà te kandan igkevasul is kemetayen dan.
17 Emun is maama ebpengesawa wey ebpekidhilavet te etevey zin, minsan ke suled din dà heini ziyà te amey etawa iney, mibpeel-elezan din haazà is suled din ne zuen din televaken. Ne ǥeina te mekeeled-eled haazà is mibeelan dan te zezuwa, ne kenè niw en sikandan isipa he zuma niw.
18 Emun is maama ebpekidhilavet te vahi he midlengesahan, ne nemineg haazà is bahi, ne kenè niw en sikandan isipa is dezuwa he zuma niw.
19 Emun is maama ebpekidhilavet te ayè din, mibpeel-elezan din haazà is ayè din. Ne sikandan is dezuwa ne zuen dan televaken dutun te mibeelan dan.
20 Emun is maama ebpekidhilavet te esawa te anggam din, mibpeel-elezan din is anggam din. Sikandan is dezuwa ne zuen dan televaken, ne ebpatey zà sikandan he wazè dan anak.
21 Emun is maama ebpengesawa te esawa te suled din he uuyag pa, mibpeel-elezan din is suled din. Ne ǥeina te meremerik is mibeelan dan, ne tekew en sikandan ebpatey he wazè dan anak.
22 Tumana niw is langun he menge sulunuzen he ibpesunud ku wey is menge suǥù ku su wey ku sikiyu kenà ipaawà diyà te tanà he ed-uwitan ku keniyu he egkeubpaan niw.
23 Is menge etew he ibpaawè ku zutun he tanà iyan mibaal keniyan he kelelalung, ne tenged kayi igkelimezangi ku sikandan. Umbe kenè niw iringi is ebeelan dan.
24 Ne sumalà te nekaǥi ku keniyu egkaangken niw is tanè dan. Ibeǥey ku keniyu heini is meupiya wey selebpeten he tanà su wey niw maangken. Iyan a kes Nengazen he Megbevayè niw he midhimu keniyu he segradu puun te zuma he menge etew.
25 Kinahanglan he egketuenan niw ke hengkey is lumpiyu wey meremerik he menge langgam ragkes en is menge tagbis. Kenè niw remeriki is keugelingen niw pinaaǥi te kegkaan te meremerik he menge langgam. Ne sumalà te migkaǥi ku keniyu, isipa niw heini he meremerik,
26 pengungubpaan kew he segradu su siak is Nengazen, waǥas a. Ne midhimu ku sikiyu he segradu puun te zuma he menge nasyun su wey kew mehimu he kediey.
27 Emun duen keniyu veyilan he ebpekidlalag te ǥimukud te nemematey en, kinahanglan he ebpenulengen sikandin te vatu taman te ebpatey. Ne iyan dà sikandin egkevasul zutun te kemetayen din.