22
Is menge Pemuhat diyà te Nengazen
1 Midsuǥù te Nengazen si Moises
2 he keǥiya zin heini ziyà te ki Aaron wey ziyà te maama he menge kevuwazan din:
Kenè niw pendezeisaya is waǥas he ngazan ku, umbe tehuza niw is menge pemuhat he ibpemuhat te menge Israilihanen kayi te kedì. Iyan a kes Nengazen.
3 Emun duen keniyu ǥuntaan etawa menge kevuwazan niw taman te huziyan he lapis te menge kevuwazan he edsamsam te pemuhat kayi te kedì, dutun te meremerik sikandin, kenè en egkehimu he ebpekepenilbi pinaaǥi te kegkememumuhat din. Iyan a kes Nengazen.
4-7 Wazà minsan hentei keniyu he egkehimu he egkaan te pemuhat, emun duen din daru te lundis, etawa zuen egawas diyà te sudiyè din tenged te zaru zin, etawa nekesamsam te azen he nehimu he meremerik su nekeseǥahid te minatey, etawa migewasan te similya, etawa nekesamsam te langgam, etawa etew he ed-isipen he meremerik. Wey zà sikandin egkehimu he egkaan te menge pemuhat emun ebpekepemeziǥù sikandin, piru medtaǥad pa sikandin taman te mahapun, dutun te edsanlep en is andew, ne egkehimu en human he egkaan sikandin te menge pemuhat he iyan keuyaǥan din su memumuhat man sikandin.
8 Kinahanglan he kenè kew megkaan te minsan hengkey he usa te langgam he minatey zà etawa midhimetayan te zuma he langgam. Su emun ebeelan niw heini ed-isipen kew he meremerik. Iyan a kes Nengazen.
9 Sikiyu is menge memumuhat, tumana niw is ibpetuman ku keniyu. Kinahanglan he edtumanen niw heini su wey kew kenà mekepenavak wey mebpatey. Iyan a is Nengazen midsivey keniyu para kedì.
10 Iyan kew zà wey is pemilya niw, egkehimu he egkaan duen te vahin te menge pemuhat he para te menge memumuhat. Kenà egkehimu he egkaan kayi is meǥeliyug niw etawa sinuhulan niw he terebahanti.
11 Piru egkehimu ke egkaan kayi is uripen he mibpemasa niw etawa in-anak diyà te keniyu.
12 Kenà daan ebpekekaan kayi is anak te memumuhat he neesawa te kenà memumuhat.
13 Iyan, emun nevalu sikandin etawa nekedsuwey zan te esawa zin he wazè dan anak, ne midlikù med-ubpà duma te amey zin, ne ebpekekaan sikandin te keenen he egkezawat te amey zin dutun te kegkememumuhat din.
Purungi niw tentenuzi he iyan kew zà is menge memumuhat wey is pemilya niw ebpekekaan te vahin te menge pemuhat he para keniyu.
14 Iyan, emun duen etew he kenà sakup te pemilya niw he ebpekekaan kayi he wazè din tivevaa, kinahanglan he edliwanan din heini ziyà te keniyu ne umani zin pa te 20 pursintu is bali kayi.
15 Sikiyu is menge memumuhat, kenè niw pendezeisaya is menge pemuhat te menge Israilihanen kayi te kedì,
16 su wey kew kenà mekesalà dutun te kegkeena niw kayi ne wazè niw televaken. Iyan a is Nengazen midsivey keniyu su wey kew mehimu he kedì.
Is menge Sulunuzen Mehitenged te Kebpilì te Uyaǥen he Ibpemuhat
17 Midsuǥù te Nengazen si Moises
18 he keǥiya zin heini ziyà te ki Aaron wey ziyà te maama he menge anak din, diyà te iring dan he menge Israilihanen, wey ragkes is kenà menge Israilihanen he mid-ubpà duma kandan:
Emun is pemuhat he edtutungen iyan ibpemuhat niw he pemuhat para te kedtuman te sevaha he penaad etawa pemuhat he keugelingen he suat,
19 kinahanglan he meemahan he vaka, kerehidu, etawa kambing ne kinahanglan he wazè dan sazir su wey ku zewata heini.
20 Kenè kew mebpemuhat te zuen din sazir su kenè ku heini edewaten.
21 Emun is pemuhat he para te meupiya he kedepità ibpemuhat niw kediey he kedtuman te penaad etawa pemuhat he keugelingen he suat, kinahanglan he vaka heini etawa kerehidu etawa kambing he wazè sazir su edewaten ku heini.
22 Kenè kew mebpemuhat kayi te kedì te uyaǥen he lakap, lepù, pelien, etawa zuen din daru te lundis. Kenè niw heini ipemuhat kedì dutun te pemuhatà te pemuhat he pinaaǥi te hapuy.
23 Egkehimu he ibpemuhat niw he pemuhat he keugelingen he suat is baka etawa kerehidu he kenà hustu is kegkeveeli te sevaha he vahin te lawa zin, piru kenà heini egkehimu he ibpemuhat he pemuhat he kedtuman te penaad.
24 Kenè kew mebpemuhat kayi te kedì te uyaǥen he nepelian is tayak din etawa migkapun. Kenè niw heini veeli ziyà te lugar niw.
25 Ne kenè kew zaan mebpemasa te iring keniyan he kelasi te uyaǥen diyà te menge lumelengyawà te ibpemuhat niw kayi te kedì, su kenè ku heeyan edewaten.
26-27 Is beǥu he in-anak he vaka, kerehidu etawa kambing, kinahanglan he kenè idsuwey te iney zin seled te pitu he andew. Piru emun midlavey en te pitu he andew egkehimu en heini he ibpemuhat niw kayi te kedì he pemuhat pinaaǥi te hapuy.
28 Emun ebpemuhat kew te vaka etawa kerehidu, ne kenè niw iredsà kandan is nati zan dutun te iyan ded he andew.
29 Emun ebpemuhaten a keniyu te pemuhat he para kebpeselamat kedì, sunuza niw is hustu he paaǥi te kebpemuhata kayi su para zewata ku heini.
30 Ne kinahanglan he keena niw en dutun mismu te andew te kebpemuhata zuen ne kenè niw semai taman te edsunud he meselem. Iyan a kes Nengazen.
31 Tumana niw is menge suǥù ku. Iyan a kes Nengazen.
32 Kenè niw pendezeisaya is waǥas he ngazan ku, ne kilelaa a keniyu he waǥas. Iyan a is Nengazen midsivey keniyu su wey kew mehimu he menge etew ku,
33 wey mibpeǥawas a keniyu puun te Ehipto su wey a mehimu he Megbevayè niw. Iyan a kes Nengazen.