3
Is Pemuhat para te Meupiya he Kedepità
1 Emun duen ebpemuhat te vaka he meemahan etawa vehiyan he pemuhat he para te meupiya he kedepità, kinahanglan he iyan din ibpemuhat diyà te etuvangan te Nengazen is wazè din sazir.
2 Izampè din is belad din diyà te ulu zutun te vaka, ne ziyè din heini lepaa te ǥemawan te Tulda he Edtelevukaayan. Is lengesa kayi, ne ibpirik te menge memumuhat he menge kevuwazan ni Aaron diyà te peliǥuy zuen te pemuhatà.
3 Puun dutun te ibpemuhat, ne edtarin is memumuhat te ibpemuhat din diyà te Nengazen he pemuhat pinaaǥi te hapuy. Egkuwaan din is langun he tavà diyà te seled te ǥetek kayi,
4 is menge vuwà ragkes is menge tavà kayi, wey is deisey he vahin te atey kayi.
5 Ne edtutungen heini is langun kayi te menge memumuhat diyà te pemuhatà apil zuen te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.
6 Emun kerehidu etawa kambing is ibpemuhat din he para te meupiya he kedepità, meemahan man heini etawa vehiyan, ne kinahanglan he wazè din sazir.
7 Emun kerehidu is ibpemuhat din diyà te Nengazen,
8 izampè din is belad din diyà te ulu zutun te kerehidu ne lepaa zin haazà diyà te etuvangan te Tulda he Edtelevukaayan. Ne is lengesa kayi, ibpirik te menge memumuhat he menge kevuwazan ni Aaron diyà te peliǥuy te pemuhatà.
9 Puun dutun te ibpemuhat, ne edtarin is memumuhat te ibpemuhat din diyà te Nengazen he pemuhat pinaaǥi te hapuy. Egkuwaan din is menge tavà kayi, is tivuuk he melambù he ikug he midlempek tempeza, is langun he tavà diyà te seled te ǥetek,
10 is menge vuwà ragkes is menge tavà kayi, wey is deisey he vahin te atey.
11 Edtutungen heini is langun te memumuhat diyà te pemuhatà he pemuhat he keenen. Pemuhat heini pinaaǥi te hapuy para te Nengazen.
12 Emun kambing is ibpemuhat din diyà te Nengazen,
13 izampè din is belad din diyà te ulu zutun te kambing ne lepaa zin haazà diyà te etuvangan te Tulda he Edtelevukaayan. Ne is lengesa kayi, ibpirik te menge memumuhat he menge kevuwazan ni Aaron diyà te peliǥuy te pemuhatà.
14 Puun dutun te ibpemuhat, ne edtarin is memumuhat te ibpemuhat din diyà te Nengazen he pemuhat pinaaǥi te hapuy. Egkuwaan din is langun he tavà diyà te seled te ǥetek,
15 is menge vuwà ragkes is menge tavà kayi, wey is deisey he vahin te atey.
16 Heini is langun, edtutungen te memumuhat diyà te pemuhatà he pemuhat he keenen. Is kehemut kayi he pemuhat te pinaaǥi te hapuy ne ebpekepenunuat te Nengazen. Is langun he tavà diyà te seled kayi, ne ǥaked te Nengazen.
17 Kenè kew kaan te tavà etawa lengesa. Kinahanglan he heini he velaud edtumanen niw taman te huziyan he lapis te menge kevuwazan, minsan hendei kew ed-ubpà.