6
1 Iyan heini migkaǥi te Nengazen diyà te ki Moises
2 mehitenged te etew he nekerapas te egkesuatan te Nengazen pinaaǥi te kedlimbung te iring din he etew mehitenged te vutang he mibpetipiǥan kandin etawa intaǥak diyà te kandin, etawa kedtakew kayi he vutang, etawa kebpenapì,
3 etawa midtarùtarù mehitenged te vutang he netazin he migkaǥi zin he wazè din maahà, etawa nengulivet te tarù he wazè din meveeli is minsan hendei kayi he menge salà.
4 Emun egketuenan he tutuu he nekesalà sikandin, kinahanglan he id-ulì din is tinakew zin, etawa nekuwa zin pinaaǥi te limbung, etawa menge azen he intaǥak etawa mibpetipiǥan kandin, etawa menge azen he netazin he neehè din,
5 etawa minsan hengkey he menge azen he impengulivet din he wazà diyà te kandin, piru is tutuu, ziyè bes te kandin. Kinahanglan he iulì din heini ziyà te teǥiǥaked he wazà meterini, ne umani zin pa te 20 pursintu is bali kayi. Iveǥey zin heini ziyà te teǥiǥaked dutun te andew te kebpemuhat din te pemuhat he vayad te salè din.
6 Med-uwit sikandin diyà te memumuhat te meemahan he kerehidu he wazè din sazir, ne ipemuhat din heini ziyà te Nengazen he vayad te salè din. Ne kinahanglan he is bali te kerehidu ne pelata he ibpesikad is keveǥat din diyà te timbangan he egemiten te menge memumuhat.
7 Pinaaǥi kayi te ebeelan te memumuhat diyà te etuvangan te Nengazen, ne egkevelukasan is etew te salè din, ne ebpeseyluwen sikandin te Nengazen te salà he neveelan din.
Is Duma pa he menge Sulunuzen Mehitenged te Pemuhat he Edtutungen
8-9 Midsuǥù te Nengazen si Moises he keǥiyi zin si Aaron wey sikan is menge anak din he menge maama, kayi he menge sulunuzen mehitenged te pemuhat he edtutungen:
Heini he pemuhat kinahanglan he idtaǥak diyà te pemuhatà taman te egkepawà he kenà ed-ewaan te hapuy haazà is pemuhatà.
10 Idsun-ud te memumuhat is pendivavew he visti zin he linu, wey is pendizalem he visti he linu he ebpeketambun te pid-etawan din, ne egkuwaan din is igmuk kayi he pemuhat, ne idsavuk din diyà te kilid te pemuhatà.
11 Ne kegkepasad kayi, med-ilis sikandin te visti zin, ne uwita zin haazà is igmuk diyà te ǥawas te kampu, ziyà te lugar he ed-isipen he lumpiyu.
12 Kinahanglan he kenà ed-ewaan te hapuy haazà is pemuhata; kenà heini ed-evukan. Kada meselem ne edtevunan heini te memumuhat, ne ibpurung din idsavuk dutun te hapuy is pemuhat he edtutungen. Iragkes din daan te edtutung is menge tavà te uyaǥen he pemuhat he para te meupiya he kedepità.
13 Kinahanglan he kenà ed-ewaan te hapuy haazà is pemuhatà; kenà heini ed-evukan.
Is Duma pa he menge Sulunuzen Mehitenged te Pemuhat he para Gasa
14 Iyan heini menge sulunuzen mehitenged te pemuhat he para gasa:
Is menge memumuhat he menge kevuwazan ni Aaron iyan ed-uwit kayi he pemuhat diyà te etuvangan te Nengazen diyà te egkesineruwan duen te pemuhatà.
15 Edterinan te memumuhat te sengekemkem heini is pemuhat he herina he zuen duen lana, ne edtutungen din haazà is tinarin din diyà te pemuhatà ragkes is langun he veyewà he insahug dutun te herina. Edtutungen din heini he paaǥi te kedtentenuzi te Nengazen, is kehemut kayi he pemuhat ebpekepenunuat te Nengazen.
16-17 Is egkesamà he herina, ne edhilutuen ne egkeenen ni Aaron wey te menge memumuhat he menge kevuwazan din. Piru hilutua zan heini he wazè din tapey, ne keena zan diyà te lama te Tulda he Edtelevukaayan, he segradu he lugar. Imbeǥey heini kandan te Nengazen he kandan he vahin duen te menge pemuhat he pinaaǥi te hapuy. Is pemuhat he para gasa utew heini segradu iring te pemuhat he para idlumpiyu wey te pemuhat he vayad te salà.
18 Is langun he maama he menge kevuwazan ni Aaron egkehimu he egkeenen dan is bahin dan dutun te menge pemuhat pinaaǥi te hapuy. Para zà heini kandan taman te peleebuten he menge kevuwazan wey kenà heini egkeengked taman te taman. Is ebpekezegkit kayi he menge pemuhat, egkeipiktuwan te kegkesegradu kayi.
19 Iyan heini migkaǥi te Nengazen diyà te ki Moises
20 mehitenged te pemuhat he para te Nengazen he ibpemuhat ni Aaron dutun te andew te kedhimuwa kandin he lavew he memumuhat, he kinahanglan he ed-ul-ulahan daan te menge kevuwazan din he ebpekeilis kandin:
Mebpemuhat sikandin te zezuwa he kilu he meupiya he kelasi he herina. Pemuhat heini he para te kebeǥey te zengeg diyà te Nengazen, he layun heini ebeeli taman te taman. Is liwazà kayi ne ipemuhat din ke meselem ne is liwazà wey ke mahapun.
21 Heini he herina edsehuǥan te lana ne edhilutuen diyà te mevavew he hilutuey. Emun egkelutù en, ebpenevien ne ibpemuhat diyà te Nengazen he iyan pemuhat he para gasa. Is kehemut kayi he pemuhat ebpekepenunuat kandin.
22 Ne kinahanglan he edtutungen heini langun, su heini he pemuhat, ne para te Nengazen, ne ed-ul-ulahan heini taman te taman. Kinahanglan he ed-ul-ulahan heini te kevuwazan ni Aaron he iyan ebpekeilis kandin he egkehimu he memumuhat.
23 Is langun he menge pemuhat he para gasa zutun te memumuhat kinahanglan he pudu edtutunga; kenà heini egkeenen.
Is Duma pa he menge Sulunuzen Mehitenged te Pemuhat he para Idlumpiyu
24 Midsuǥù en maan te Nengazen si Moises
25 he egkeǥiyan si Aaron wey sikan is menge anak din he maama kayi he menge sulunuzen:
Is pemuhat he para idlumpiyu, kinahanglan he edlepaan diyà te etuvangan te Nengazen diyà te lugar he lepeey te pemuhat he edtutungen. Is pemuhat he para idlumpiyu, utew heini segradu he pemuhat.
26 Is memumuhat he ebpemuhat kayi, kinahanglan he megkaan kayi ziyà te lama te Tulda he Edtelevukaayan, kes segradu he lugar.
27 Is minsan hentei he ebpekesamsam kayi egkeipiktuwan te kegkesegradu kayi. Ne is bisti he egkepesikan te lengesa kayi he pemuhat kinahanglan he ebpìpian diyà te segradu he lugar zuen te Tulda.
28 Kinahanglan he edtevien is diniyun he edhilutuan keniyan he pemuhat. Piru emun diyà heini hilutua te kuzen, kinahanglan he egkeǥisan heini he kuzen ne edlùluan te wahig.
29 Egkehimu he egkaan kayi he pemuhat is langun he maama ziyà te pemilya te menge memumuhat. Utew heini segradu he pemuhat.
30 Piru emun ed-uwiten is lengesa kayi he pemuhat diyà te Segradu he Lugar zuen te seled te Tulda, su wey mepesaylu is salà te sevaha he etew, ne kenà egkeenen heini he pemuhat, kekenà, edtutungen.