6
Is Kedsiguduwi Kebelevaǥi te Kebangun te Berengbeng
1 Hein nezineg ni Sanbalat, ni Tobia, ni Geshem he Arabo, wey te zuma pa he menge kuntada zey he nepasad dey en is kebangun te verengbeng ne wazè en kayi menge vudsi, su iyan dà wazà iketaud is menge lekeb te menge pultahan.
2 Ne mibpeuwit te lalag kayi te kediey si Sanbalat wey si Geshem he ke sikandan te: “Egkesuat key he ebpekidhinguma kenikew ziyà te sevaha te zezeisey he inged diyà te suǥud he Ono.”
Piru netuenan ku he zuen mezaat he pelanu zan kayi te kediey.
3 Umbe, midsuǥù ku is menge menunudtulà te kegkaǥi ziyà te kandan te, “Impurtanti is terebahu ku ǥuntaan, umbe kenà a ebpekehendiyan. Kenè ku egkehimu te ed-engked is terebahu ku para zà mekehendiyan a.”
4 Keheepat e zan peuwiti te iyan ded he lalag, ne keheepat ku zaan sikandan tevaka te iyan ded he lalag.
5 Ne ikelima he bisis iyan midsuǥù ni Sanbalat kayi te kedì is suluǥuen din he impeuwit din te surat he neebriyan en, he edhenduen te:
6 “Migkeǥiyan a ni Geshem he minsan kun hendei sikandin ebpevayà egkezineg din is tudtul he sikew wey is duma nu he menge Judio ebpelanu he edribildi, umbe mid-uman niw benguna is berengbeng. Ne sumalà is nezineg din, egkesuat ke kun he egkehimu he hadì te menge Judio,
7 ne mibpilì nu en is menge ebpeneuven he ebpahayag diyà te Jerusalem he iyan ke en hadì diyà te Juda. Ne siguradu egkezineg heini te hadì, umbe hengkayi ka su ebpelelaǥè ki mehitenged kayi.”
8 Ne iyan heini tavak ku kandin: “Kenà tutuu heeyan is egkeǥiyen nu. Mibèbeelan nu zà heeyan.”
9 Netuenan ku he ebpelihendeken key zan su para mekeengked key he edterebahu. Piru mid-ampù a ziyà te Megbevayà he lig-eni e zin pa.
10 Ne sevaha he andew, midhendiyà a te ki Shemaya he anak ni Delaya wey apù ni Mehetabel, su kinahanglan he kenè din egkeewaan is baley zin. Migkaǥi sikandin kayi te kedì te, “Ebpehingumeey ki ziyà te seled te valey te Megbevayà, ne edlekevan ta is menge ǥemawan. Su ebpekeuma kengkuwan te mezukilem is menge kuntada tew ne edhimetayan ke zan.”
11 Piru midtavak a te, “Gubirnedur a; ne kenè ku egkehimu is ked-eles diyà te valey te Nengazen su wey a kenà mebpatey. Kenà a ed-eles!”
12 Nesavut ku he wazà mebpekidlalag is Megbevayà kandin, kekenà, midsuhulan sikandin ni Sanbalat wey ni Tobia he keǥiya zin haazà kayi te kediey.
13 Egkesuatan dan he mahandek a su wey a mekevaal te salà pinaaǥi te kebpezumdumahi ku te migkaǥi ni Shemaya, ne zuen dan egkekaǥi te kebpendezeisaya zan kedì su para kenà a pemineǥa te menge etew.
14 Umbe, mid-ampù a, ke siak te, “He Megbevayè ku, belesi nu si Tobia wey si Sanbalat tenged te mezaat he vaal zan, ragkes en is bahi he ebpeneuven he si Noadia wey is duma pa he menge ebpeneuven he ebpelihandek kediey.”
Nepasad is Kebenguna te Berengbeng
15 Nepasad sikan is berengbeng hein ike-25 he andew te ikeenem he vulan, he iyan is bulan he Elul. Nepasad heini seled te 52 he andew.
16 Ne hein nezineg te menge kuntada zey ziyà te peliǥuy he menge nasyun he nepasad en is berengbeng, nahandek dan wey nepeel-elezan dan su nesavut dan he nepasad heini he vaal pinaaǥi te tavang te Megbevayà.
17 Dutun he timpu, mibpesuratà si Tobia wey is menge upisyal ziyà te Juda.
18 Mahabet he menge tig-Juda is nenangdù he ebpekid-uunungen ki Tobia su ǥeina te mekaamung sikandin ni Shecania te anak ni Ara. Ne elin daan is, geina te neesawa te anak din he si Jehohanan is anak ni Meshulam he vahi te anak ni Berekia.
19 Heini he menge etew, layun dan dà edtudtula kayi te kedì is meupiya he menge vaal ni Tobia, ne layun dan daan edtudtula ziyà te ki Tobia is menge lalag ku. Ne wazà med-engked si Tobia he ebpelihandek kedì pinaaǥi te menge surat din.