Hein neuma is ikepitu he vulan te ked-ubpà te menge Israilihanen diyà te menge inged dan, 1 midtiǥum sikandan is langun diyà te Jerusalem, ne nepurung sikandan mesevaha ziyà te pelasa he egkesineruwan te Pultahan Pehendiyà te Wahig. Midhengyuan dan si Ezra he menunudlù te Kesuǥuan he kuwaa zin wey vesaha zin is Libru te Kesuǥuan ni Moises he ibpetuman te Nengazen te menge Israilihanen.

2-3 Haazà he andew, iyan nehuna he andew te ikepitu he vulan, mid-uwit ni Ezra is Kesuǥuan diyà te etuvangan te menge etew–menge maama, menge vahi, wey menge vatà he zuen dan en hanew. Ne ziyà te pelasa he egkesineruwan te Pultahan Pehendiyà te Wahig, mibpekezaǥing sikandin is ebasa kayi puun te kedsilà te andew taman te meudtu. Ne mibpurungan pemineǥa haazà is Libru te Kesuǥuan te langun he menge etew zutun. 4 Midhitendeg si Ezra ziyà te metikang he intebladu he kayu he mibeelan para zutun he ketiǥuman. Ne ziyà te egkekewanan din midhitindeg si Matitia, si Shema, si Anaya, si Uria, si Hilkia, wey si Maasea. Ne ziyà te egkeǥivang din midhitindeg si Pedaya, si Mishael, si Malkia, si Hashum, si Hashbadana, si Zacarias, wey si Meshulam.

5 Egkaahà si Ezra te langun kandan su metikang is midhitindeǥan. Ne hein mibekar zin sikan is libru, nemenhitindeg is langun he menge etew zutun. 6 Midalig ni Ezra is Nengazen, he mekeǥeǥehem he Megbevayà. Ne midtavak is menge etew te, “Amen! Amen!” dutun te ibayew zan is belad dan. Ne midluhud sikandan is ed-azap te Nengazen.

7 Ne hein midhitindeg en is menge etew, impesavut diyà te kandan is Kesuǥuan. Is mibpesavut kandan iyan is menge Levihanen he ensi Jeshua, Bani, Sherebia, Jamin, Akub, Shabetai, Hodia, Maasea, Kelita, Azaria, Jozabad, Hanan, wey si Pelaya. 8 Mibasa zan is Libru te Kesuǥuan te Megbevayà ne impesavut dan is kehuluǥan kayi, su para mesavut te menge etew.

9 Dutun te ebpemineg is menge etew te menge lalag diyà te Kesuǥuan, nemekesineǥew sikandan. Migkaǥi ziyà te kandan si Nehemias he gubirnedur, si Ezra he memumuhat wey menunudlù te Kesuǥuan, wey is menge Levihanen he mibpesavut kandan te Kesuǥuan te, “Heini he andew segradu para te Nengazen he Megbevayè niw, umbe kenè kew sineǥew.” 10 Migkaǥi pa si Nehemias te, “Silibra kew ne kaan kew te metaam he menge keenen wey inum kew te metaam he inumen. Beǥayi niw is wazè dan egkekaan, su heini he andew segradu para te Nengazen. Ne kenè kew lalew, su is kelipey he ibeǥey te Nengazen ebpekepelig-en keniyu.”

11 Ne migkaǥi pa is menge Levihanen te, “Kenè kew ǥurub! Kenè kew lalew! Su segradu heini he andew.” 12 Umbe, migenat is langun he menge etew zutun su egkaan dan wey ed-inum dan, wey ebpemeǥey zan te keenen diyà te zuma. Midsilibra zan he zuen dan dekelà he kelipey su nesavut dan is lalag te Megbevayà he mibasa ziyà te kandan.

13 Hein ikezuwa he andew zutun he vulan, midtiǥum diyà te ki Ezra is menge pengulu te menge pemilya, is menge memumuhat wey is menge Levihanen, su ed-istudyuwan dan is Kesuǥuan. 14 Nediskubri zan diyà te Kesuǥuan he pinaaǥi ki Moises midsuǥù sikandan te Nengazen is menge Israilihanen he kinahanglan med-ubpè dan diyà te menge lawig dutun te timpu te pista he edhimuwen te ikepitu he vulan. 15 Kinahanglan he ibpeseyuzan dan diyà te Jerusalem wey ziyà te zuma he menge inged dan is suǥù te Nengazen he medhendiyè dan te menge vuvungan te kebpenguwa te menge subpang te menge ulibu, mirtu, palma, wey te zuma pa he merapung he menge kayu su para ebeelan he menge lawig, sumalà is ingkesurat diyà te Kesuǥuan.

16 Umbe, nenguwa is menge etew te menge subpang ne mibeelan dan heini he lawig diyà te patag he atep te menge valey zan, diyà te lama te menge valey zan, diyà te lama te valey te Megbevayà, diyà te pelasa he ziyà te egkesineruwan te Pultahan Pehendiyà te Wahig, wey te Pultahan ni Efraim. 17 Mibaal te lawig he egkeubpaan dan dutun he timpu is langun he nemen-ulì puun te kegkevihaǥa kandan. Utew sikandan melipayen; sikan dan pa meseǥazi haazà he paaǥi te kedsilibra puun te kaazen pa ni Josue he anak ni Nun. 18 Andew-andew ne mibasa ni Ezra kes Libru te Kesuǥuan te Megbevayè diyà te etuvangan te menge etew, puun te nehuna he andew zutun te pista taman en te ketepusan he andew. Midsilibra zan haazà is pista taman te pitu he andew, ne te ikewalu he andew ne midtiǥum dan para te ked-azap te Nengazen, sumalà is diyà te Kesuǥuan.