2
Is Kegkezeeti te Nineve
1 Sikiyu is menge tig-Nineve, midsurung kew en te menge kuntada niw he ebpeyapat keniyu. Umbe ventayi niw is menge verengbeng te menge inged niw wey ventayi niw is menge zalan. Tiǥuma niw is menge sundaru niw ne purung kew pengandam te kebpekidtebek.
2 Su minsan midezeetan niw is menge tig-Israel wey menge tig-Juda he henduen be te pinemula he paras he mibpendezeetan is menge subpang kayi, idlikù te Nengazen is kegkemeǥeǥehem te Israel.
3 Meriǥà is kelasag wey visti te menge sundaru he kuntada niw. Ne zutun te timpu te kedsurung dan, ed-ilak-ilak is menge mital ziyà te menge kerwahi zan ne edsikadsikad en is menge kudè dan.
4 Edseǥembet dà is menge kerwahi zan diyà te menge zalan, he edlikù-likù diyà te menge pelasa. Henduen heini te edsiǥa he sulù wey egkindab he kilat.
5 Ebmendaran te hadì is menge upisyal te menge sundaru. Ebpemekeurambak en sikandan te kegaanggaan dan te ked-uvey ziyà te menge verengbeng niw su wey zan iketaud is pengalang te menge sundaru he edrundus duen te verengbeng.
6 Egkevengkag is menge peneng te wahig ne egkaanud is turuǥan niw.
7 Ingkepahayag en he ebihaǥen kew ne edumahan diyà te zuma he lugar. Henduen be te egkuter he merepatik is sineǥawan te suluǥuen niw he menge vahi zutun te edtebpien dan is kumeng dan tenged te kedlalew zan.
8 Is menge etew he ebpemelaǥuy puun te Nineve ne henduen be te edtudà he wahig he ebpuun diyà te nevusuwangan he peneng. Is menge ebpemelaǥuy ibpelikù te menge zuma zan piru wazè en egkeluvus he edliku.
9 Pemineg kew is menge nenurung diyà te Nineve. Penguwaa niw is menge pelata wey vulawan kayi he inged su nepenù heini te ketiǥeyunan.
10 Egkezeetan, egkeǥevà, egkevengkag en is Nineve! Umbe egkulbaan en is menge meǥinged kayi; egkerkeren is tivuuk he lawa zan, egkerkeren is menge vuel zan, ne ebmemeluntak sikandan.
11-12 Is Nineve iring te surung he mid-ubpaan te senge paris he erimaung, wey menge anak dan. Kunaan dan ke wazà ebpekekaid kandan dutun te surung. Edhimetayan wey ebpitpitasen duen te meemahan he erimaung is egkezawi zin ne ibpemeǥey zin diyà te esawa zin wey menge anak dan. Ebpenuen din is surung din te sapù te egkezawi zin. Piru ǥuntaan, edezeetan en is Nineve.
13 Su migkaǥi is Nengazen he Mekeǥeǥehem te, “Pemineg kew is menge tig-Nineve! Kuntada ku sikiyu! Umbe ebinsulan ku is menge kerwahi niw ne ebpematey te tebek is menge sundaru niw. Ibpeengkezan ku en keniyu is kebpendezaat niw kayi te kelibutan. Kenè kew en ebpekesuǥù te menge menunudtulà pehendiyà te zuma he menge nasyun te kegkaǥi ziyà te kandan ke hengkey is egkesuatan niw he ibpetuman kandan.”