Menge Numero
1
Is Nehuna he Kedsinsus diyà te Israel
1 Hein nehuna he andew te ikezuwa he vulan, dutun te ikezuwa he tuig te ked-awà te menge Israilihanen diyà te Ehipto, migkaǥi is Nengazen diyà te ki Moises diyà te Tulda he Edtelevukaayan he ziyà te sibsivayan he Sinai te,
2 “Sinsusa niw is kada kezuzumahi wey pemilya te tivuuk he keet-etawan te Israel. Ilista niw is menge ngazan te langun he menge maama
3-4 he ebpenuiǥen te 20 he tuig pehendiyà te metikang he egkehimu en he edsunderuwen. Iyan kew ki Aaron dumala te kedsinsus ne peuǥup kew te pengulu te kada tribu.”
5-15 Iyan heini menge pengulu te kada tribu he ebpekeuǥup keniyu:
Ngazan te Tribu; Ngazan te Pengulu
Reuben; Elizur he anak ni Shedeur
Simeon; Shelumiel he anak ni Zurishadai
Juda; Nashon he anak ni Aminadab
Isacar; Netanel he anak ni Zuar
Zebulun; Eliab he anak ni Helon
Efraim he anak ni Jose; Elishama he anak ni Amihud
Manase he anak ni Jose; Gamaliel he anak ni Pedazur
Benjamin; Abidan he anak ni Gideoni
Dan; Ahiezer he anak ni Amishadai
Asher; Pagiel he anak ni Ocran
Gad; Eliasaf he anak ni Deuel
Naftali; Ahira he anak ni Enan
16 Iyan haazà sikandan menge pengulu ziyà te menge tribu he nengepilì puun te menge Israilihanen.
17-18 Ne impetiǥum ni Moises wey ni Aaron duma kayi te menge pengulu is langun he menge Israilihanen dutun mismu he andew. Impenlista zan is langun he menge maama he ebpenuiǥen te 20 pehendiyà te metikang sumalà te kada kezuzumahi wey is menge pemilya zutun.
19 Mibeelan ni Moises heini is kebpenlista ziyà te sibsivayan he Sinai, su iyan haazà insuǥù te Nengazen.
20-43 Iyan heini kezakel te menge maama he 20 he tuig is keǥurang dan pehendiyà te metikang he egkehimu en he edsunderuwen, he ingkelista ziyà te kada tribu wey pemilya:
Ngazan te Tribu; Kahabet
Reuben (kes kinekekayan he anak ni Jacob); 46,500
Simeon; 59,300
Gad; 45,650
Juda; 74,600
Isacar; 54,400
Zebulun; 57,400
Efraim (he anak ni Jose); 40,500
Manase (he anak ni Jose); 32,200
Benjamin; 35,400
Dan; 62,700
Asher; 41,500
Naftali; 53,400
44-45 Iyan haazà kezakel te menge maama he nevilang ni Moises wey ni Aaron wey te 12 he menge pengulu te menge Israilihanen. Is kada sevaha kandan ingkelista ziyà te listahan te tribu zan wey pemilya zan. Ebpenuiǥen sikandan te 20 pehendiyà te metikang he egkehimu en he edsunderuwen.
46 Is kinetivuukan te kezakel zan, 603,550 sikandan.
47 Wazà iragkes kayi is menge kevuwazan ni Levi.
48 Su migkaǥi is Nengazen diyà te ki Moises te,
49 “Kenè niw iragkes te edsinsus is tribu ni Levi duma te zuma he menge Israilihanen he ebpenirbisyu emun timpu te tebek.
50 Kekenà, iveǥey kandan he ketengdanan is kedumala zuen te Tulda he Ed-ezapan he zutun itaǥù sikan is Kesuǥuan, wey is langun he ǥelemiten kayi. Iyan sikandan ed-uwit dutun te Tulda wey te langun he ǥelemiten kayi. Kinahanglan he ed-etimanen dan heini, ne kinahanglan he ziyè dan megkampu te ebpekeliǥuy kayi.
51 Emun idhalin haazà is Tulda, iyan sikandan ebaal kayi, ne emun ed-umanan ebenguna heini, ne iyan dan gihapun ebangun kayi. Ne is minsan hentei he kenà kevuwazan ni Levi he ebaal kayi he vuluhaten, ne edhimetayan.
52 Kinahanglan he ebpeem-emurà te egkempuwan is kada tribu te menge Israilihanen, ne mebpehitindeg te bendira is kada tribu.
53 Piru is menge kevuwazan ni Levi, kinahanglan he ziyà megkampu te ebpekeliǥuy zuen te Tulda he midteǥuan te Kesuǥuan, su wey ku kenà mepeuki is menge etew te Israel. Ketengdanan te menge kevuwazan ni Levi is ked-atur zuen te Tulda.”
54 Mibeelan heini is langun te menge Israilihanen sumalà te insuǥù te Nengazen ki Moises.