12
Midriklamu si Miriam wey si Aaron
1 Hein diyè dan te Hazerot, midsawey ni Miriam wey ni Aaron si Moises su ǥeina te nengesawa sikandin te Kushanen.
2 Ke sikandan te, “Pinaaǥi zè be ki Moises is kebpekidlalag te Nengazen? Kenè be ebpekidlalag daan sikandin pinaaǥi kenami.” Piru nezineg haazà te Nengazen.
3 (Si Moises iyan etew he kenà mepelevawen te langun he menge etew te tivuuk he kelibutan.)
4 Umbe, migkeǥiyan te Nengazen si Moises, si Aaron, wey si Miriam te, “Gawas kew is tetelu keniyan te kampu ne hendiyè kew te Tulda he Edtelevukaayan.” Umbe migawas sikandan is tetelu ne midhendiyè dan te Tulda.
5 Ne mibulus is Nengazen pinaaǥi te ǥapun he henduen be te tukud ne midhitindeg diyà te ǥemawan duen te Tulda he Edtelevukaayan ne mid-umew zin si Aaron wey si Miriam. Ne hein mid-uvey haazà is dezuwa,
6 migkaǥi is Nengazen te, “Pemineǥa niw heini: Emun duen ku ebpeneuven diyà te keniyu, ne ebpekidlalag a kandin pinaaǥi te ibpelewasan ku wey ibpeteǥeinep ku.
7 Piru kenà iring keniyan emun iyan ku edlelaǥan is suluǥuen ku he si Moises, he egkeseriǥan he pengulu te menge etew ku.
8 Emun ebpekidlalag a kandin, ne iring te ebpeetuvangè key su keladu is kebpekidlalag ku. Ne iring ded te neehè e zin. Piru minsan pa te iyan haazà wazè kew mahandek he egkaǥi te mezaat he ebpekesuǥat diyà te suluǥuen ku he si Moises?”
9 Utew sikandan nepeuki te Nengazen ne mid-awà sikandin.
10 Hein mid-awè en haazà is gapun diyà te zivavew zuen te Tulda, ne segugunà midtuvùi te zaru te lundis si Miriam, ne utew mibmeputì is lundis din. Ne hein naahà haazà ni Aaron,
11 migkeǥiyan din si Moises te, “Datù, kenè key kenikew ipaantus tenged te salà he tinulebung is kegkeveeli zey zuen.
12 Kenè nu ituǥut he egkeiring si Miriam te vatà he neranran he is ketengà te lawa zin neredak en.”
13 Umbe, mibpehizuhizu si Moises te Nengazen he ke sikandin te, “He Megbevayè ku, edhangyù a ziyà te kenikew he bewii nu si Miriam.”
14 Midtavak te Nengazen si Moises te, “Kenè be ke ed-ilevan sikandin te amey zin diyà te zagwey zin tenged te kedsewaya zin kandin, ed-entusen din is keelezan seled te pitu he andew? Umbe ipeǥawas sikandin keniyan te kampu seled te pitu he andew, ne emun egkepasad haazà is pitu he andew ne egkehimu en he edlikù sikandin.”
15 Umbe, impeǥawas si Miriam puun te kampu seled te pitu he andew. Ne haazà is menge etew wazà medlaus te hipanew zan taman te nekelikù si Miriam diyà te kampu.
16 Ne liwas dutun mid-awè dan diyà te Hazerot ne ziyè dan megkampu te sibsivayan he Paran.