21
Nezaag is menge Canaanhen
1 Dutun he timpu is Canaanhen he hadì diyà te Arad he ed-ubpà diyà te Negev, netudtulan he ebpekeuma is menge Israilihanen he ziyà mebayà te zalan diyà te Atarim. Umbe midsurung din sikandan ne mibihag din is duma kandan.
2 Ne nenangdù is menge Israilihanen diyà te Nengazen he ke sikandan te, “Emun ebpeveyveyaan nu kenami heini he menge etew, ibeǥey zey zaan diyà te kenikew is tivuuk he inged dan pinaaǥi te kedezeeti zey kayi.”
3 Mibpemineg te Nengazen is pengemuyù te menge Israilihanen ne impezaag din kandan is menge Canaanhen. Ne midèdeetan dan is langun he menge Canaanhen dutun ragkes en is menge inged dan, umbe migngezanan haazà he lugar te Horma.
Is Brunsi he Uled
4 Puun te Buntud he Hor, midhipanew is menge Israilihanen he ziyà med-ikul te zalan he ibpenhendiyà te Zaǥat he Meriǥà, he ebpekeelingkus te tanà he Edom. Piru mibperuvas is menge etew zutun te hipanew zan,
5 umbe, midriklamu sikandan diyà te Megbevayà wey ziyà te ki Moises. Ke sikandan te, “Maan is impeǥawas key pa kenikew ziyà te Ehipto su wey key kayi mebpematey te sibsivayan? Wazà keenen wey wahig kayi! Neperahan key en kayi te mesemu he ‘manna’.”
6 Umbe, mibpeuwitan sikandan te Nengazen te edhereg he menge uled ne mibpengaǥat sikandan, ne mahabet kandan is minatey.
7 Midhendiyà is menge etew te ki Moises ne ke sikandan te, “Nekesalè key su mezaat is menge lalag dey mehitenged te Nengazen wey kenikew. Iampù nu te Nengazen he iawè din diyà te kenami heini is menge uled.” Umbe mid-ampù si Moises para te menge etew.
8 Migkaǥi is Nengazen diyà te ki Moises te, “Kuwa ka te brunsi, ne veeli nu he ledawan te edhereg he uled, ne kuwa ka te idtukud nu zuen ne itaud nu ziyà te purù. Is minsan hentei he nekaǥat te uled ne edtengteng dà dutun te uled he brunsi ne egkeuyag sikandin.”
9 Umbe, mibaal si Moises te uled he brunsi ne intaud din diyà te purù duen te intukud din. Ne is minsan hentei he nekeǥatan te uled, midtengteng dà dutun te uled he brunsi ne neuyag.
Is Hipanew Pehendiyà te Moab
10 Midlaus medhipanew is menge Israilihanen, ne migkampu sikandan diyà te Obot.
11 Ne puun te Obot, midhipanew sikandan ne migkampu zan diyà te Iye Abarim, diyà te sibsivayan he zapit te edsilaan he atbang te Moab.
12 Ne puun dutun midhipanew sikandan ne migkampu zan diyà te zal-ug he Zered.
13 Ne puun te Zered midlaus sikandan medhipanew ne migkampu zan diyà te uvey te veyvey te zal-ug he Arnon, he ziyà te sibsivayan he uvey te tanà te menge Amorihanen. Is Arnon iyan dulunà te tanà te menge Moabitanhen wey menge Amorihanen.
14 Iyan heeyan hinungdan ke maan is ingkesurat diyà te Libru te Guǥud te Kebpekidtebek te Nengazen is inged diyà te Waheb he sakup te Sufa, is menge zal-ug ragkes en is Arnon,
15 wey is alug te menge zal-ug he ebpeketemu ziyà te inged he Ar he ziyà te dulunà te Moab.
16 Puun diyà te Arnon midhendiyà is menge Israilihanen te Beer, kes teheb he zutun megkaǥi is Nengazen diyà te ki Moises te, “Tiǥuma nu is menge etew su ebeǥayan ku sikandan te wahig.”
17 Ne zutun kentaha te menge Israilihanen heini he kentahan:
“Ebpedayun ebeǥey te wahig heini he teheb!
Egkanta kiw mehitenged kayi he teheb
18 he impekalut te menge pengulu wey dungganen he menge etew pinaaǥi te keǥehem dan.”
Ne puun dutun he sibsivayan midhendiyè dan te Matana;
19 ne puun te Matana midhendiyè dan te Nahaliel; ne puun te Nahaliel midhendiyè dan te Bamot;
20 ne puun te Bamot midhendiyè dan te suǥud-suǥud te Moab, dutun he lugar emun diyè ki te puntur te Pisga edkepantew ta is sibsivayan.
Nezaag si Hadì Sihon wey si Hadì Og
(Deuteronomio 2:26–3:11)
21 Ne midsuǥù is menge Israilihanen te menge menunudtulà diyà te ki Sihon he hadì te menge Amorihanen. Iyan heini tudtul he uwiten dan:
22 “Emun egkehimu, ituǥut nu kenami is kebayà diyà te tanè niw. Kenè key ebayà diyà te menge bevesukè niw etawa pemuleey niw te paras wey kenè key ed-inum diyà te menge teheb niw. Ed-ikul key zà diyà te zekelà he zalan taman te ebpekeǥawas key te tanè niw.”
23 Piru wazà mebpezumazuma si Sihon he ebayà is menge Israilihanen diyà te tanè din. Midtiǥum din hinuun is langun he menge sundaru zin ne midhendiyè dan te sibsivayan su edsurungen dan is menge Israilihanen. Hein nekeuma zan diyà te Jahaz, midtebek dan is menge Israilihanen.
24 Piru migerà sikandan te menge Israilihanen, ne mid-aǥew te menge Israilihanen is tanè dan puun te wahig he Arnon pehendiyà te Wahig he Jabok. Piru taman dà sikandan te dulunà te tanà te menge Amunihanen, su melig-en is berengbeng dutun te dulunà.
25 Umbe, naaǥew te menge Israilihanen is langun he dezekelà he inged te menge Amorihanen ne mid-ubpaan dan haazà, ragkes is Heshbon wey is langun he dezeisey he inged he sakup kayi.
26 Dengan, heini is Heshbon iyan lavew he inged ni Sihon te hadì te menge Amorihanen. Nezaag din dengan is sevaha he hadì te Moab ne mid-aǥew zin is langun he tanà duen te hadì taman te Arnon.
27-28 Umbe, iyan heini erubasa te memetau he egkaǥi, ke sikandan te,
“Agpas kew hendiyà te Heshbon, he inged ni Sihon, ne umana niw heini benguna. Dengan is menge sundaru ziyà te Heshbon, nenurung he henduen be te edriyubriyub he hapuy he nekevinsul te inged he Ar he sakup te Moab wey te metikang he menge lugar ziyà te Arnon.
29 Mekehizuhizu kew is menge tig-Moab! Nezeetan kew is ed-azap te ed-ezapen he si Kemosh. Sikiyu is menge anak din, mibey-anan din en he mevihag ni Sihon te hadì te menge Amorihanen.
30 Piru guntaan nezeetan dey en is menge Amorihanen. Nezeetan en is inged he Heshbon, ragkes is Dibon, Nofa, wey Medeba.”
31 Umbe, mid-ubpà is menge Israilihanen diyà te tanà te menge Amorihanen.
32 Ne liwas dutun midsuǥù si Moises te menge meniniid diyà te Jazer, ne mid-aǥew zan daan heini wey is dezeisey he menge inged he sakup din. Midsegseg dan is menge Amorihanen he ed-ubpà dutun.
33 Ne liwas dutun, midhendiyè dan en maan te Bashan. Piru midsurung sikandan ni Hadì Og he hadì te Bashan wey te langun he menge sundaru zin hein diyè dan pa te Edrei.
34 Migkaǥi is Nengazen diyà te ki Moises te, “Kenè nu kehendeki si Og su ibeǥey ku sikandin kenikew, ragkes is tivuuk he gin-etawan din wey menge tanè din. Beeli nu ziyà te kandin is mibeelan nu ziyà te ki Sihon te hadì te menge Amorihanen, he midhadì diyà te Heshbon.”
35 Umbe, midhimetayan te menge Israilihanen si Og, ragkes is menge anak din wey is langun he menge etew zin, ne wazà nesamà kandan. Ne liwas dutun, mid-angken te menge Israilihanen is tanà he nesakup te midhedian ni Og.