34
Is menge Dulunà te Canaan
1 Migkeǥiyan te Nengazen si Moises te,
2 “Keǥiyi nu is menge Israilihanen he emun edseled dan en diyà te Canaan, iyan heini dulunà te tanà he egkepengevilin dan:
3 “Is dulunà diyà te zivavà iyan is sibsivayan he Zin, he dulunà te Edom. Ebpuun heini ziyà te zapit te zivavà he edsilaan he vahin te Daǥat he Minatey.
4 Ne ebulegkù diyà te zivavà pehendiyà te Beyeey te Akbarim, taman te sibsivayan he Zin, ne pehendiyè en te zivavà te Kadesh Barnea. Ne ediritsu heini ziyà te Hazar Adar taman te Azmon,
5 ne ebulegkù pehendiyà te zal-ug te Ehipto, ne edunggù diyà te Zaǥat he Mediteraneo.
6 “Is dulunà dapit te edsenlepan iyan is Daǥat he Mediteraneo.
7 “Is dulunà diyà te zizaya, ebpuun te Zaǥat he Mediteraneo pehendiyà te Buntud he Hor,
8 ne puun te Buntud he Hor ebpehendiyà te Lebo Hamat. Ebpekevayà heini te Zedad
9 wey te Zifon ne edunggù diyà te Hazar Enan.
10 “Is dulunà diyà te edsilaan, ebpuun te Hazar Enan pehendiyà te Shefam,
11 ne ebpetupang pehendiyà te Ribla, he ziyà te edsilaan he vahin te Ain, ne edlaus heini ziyà te menge mibuntud-buntud he ziyà te edsilaan te Ranew te Galilea
12 ne edtupang heini ziyà te Jordan, ne edunggù diyà te Daǥat he Minatey.
“Iyan heini tanè niw, wey menge dulunè din diyà te peliǥuy.”
13 Ne migkaǥi si Moises diyà te menge Israilihanen, “Behina niw heini is tanà he egkepengevilin niw pinaaǥi te ripa. Migkaǥi is Nengazen he ibeǥey heini ziyà te siyam wey tengà he tribu.
14-15 Su is tribu ni Reuben, ni Gad, wey is ketengà he tribu ni Manase, nekezawat en man te kandan he egkepengevilin diyà te zapit te edsilaan te Jordan he uvey te Jerico.”
16 Migkaǥi is Nengazen diyà te ki Moises te,
17 “Si Eleazar he memumuhat wey si Josue he anak ni Nun iyan ebahin duen te tanà para te menge etew.
18 Ne pilì ka te sevaha he pengulu ziyà te kada tribu he ebpekeuǥup kandan te kebahin duen te tanà.”
19-28 Iyan heini menge ngazan te nengepilì:
Tribu; Pengulu
Juda; Caleb he anak ni Jefune
Simeon; Shemuel he anak ni Amihud
Benjamin; Elidad he anak ni Kislon
Dan; Buki he anak ni Jogli
Manase he anak ni Jose; Haniel he anak ni Efod
Efraim he anak ni Jose; Kemuel he anak ni Shiftan
Zebulun; Elisafan he anak ni Parnac
Isacar; Paltiel he anak ni Azan
Asher; Ahihud he anak ni Shelomi
Naftali; Pedahel he anak ni Amihud
29 Iyan sikandan mibpilì te Nengazen he med-uǥup te kebehina zuen te tanà he Canaan he egkepengevilin te menge Israilihanen.