12
1 Is etew he egkesuat he ibperangka ziyà te kandin is sayep din egkesuat he egkehimu he uluwanen, iyan, is etew he paglung ne egkeepes emun egkeǥiyen diyà te kandin is menge sayep din.
2 Egkehizuwan te Nengazen is meupiya he etew, iyan, edsilutan din mulà is ed-isip te mezaat.
3 Kenà iyan ibmelig-en te etew is mezaat he menge ulaula, piru is etew he metazeng iring te kayu he midtuaneb is dalid din.
4 Is bahi he egkezeliǥan tenged te meupiya he menge vaal zin, ne zengeg sikandin te esawa zin, piru is bahi he mekeeled-eled is menge ulaula zin, ne iring sikandin te vaus he midtuvù diyà te peka te esawa zin.
5 Hustu is ed-is-isipen te etew he metazeng, iyan, limbung mulà is idsambag te etew he mezaat is menge ulaula zin.
6 Is menge lalag te lalung he etew, igkepetug-iring te etew he ed-ayan su wey mekevunù su pinaaǥi zutun egketuvù is samuk, ne is menge lalag te etew he metazeng, igkepetug-iring mulà te etew he edlaǥuy te mid-eyanan su pinaaǥi zutun egkehusey is egketuvù he samuk.
7 Is menge etew he lalung edezeetan ne wazè en egkesamà kandan, iyan, is etew he metazeng ebpedayun mulà is kevuwazan din.
8 Egkezeliǥan is etew pinaaǥi te ketau zin, piru is etew he egketultulebung, edsudien sikandin.
9 Deyzey pa is etew he ed-isipen din he minus is pid-etawan din, he ebpekeveǥey te suhul te suluǥuen din, kenà te etew he ed-isipen din he lavew is pid-etawan din, piru edlised su wazè din egkekaan.
10 Is metazeng he etew, ed-elimahan din is menge uyaǥen din, piru is ketulanged te etew he mezaat is menge ulaula zin, ebpekezezaat su seligkep dà.
11 Is mevasuk, ne layun dekelà is keuyaǥan din, piru sikan is etew he kenà utew metau he ed-isip ke hengkey is hustu, kenè din egkenuǥunan is timpu he egkeusik.
12 Is etew he lalung, iyan din layun egkesuati is kebaal te mezaat, umbe kenà melig-en is kebpekesavuk din, piru is metazeng mulà, melig-en iring te kayu he mezalem is nesenevan te menge zalid din.
13 Is mezaat he kegkaǥikaǥi te mezaat he etew iyan ebpuunan te samuk, iyan, is metazeng he etew ebpekelikey mulà te samuk.
14 Is meupiya he menge lalag wey meupiya he menge ulaula, ne meupiya zaan is rimeǥas din.
15 Is etew he tulebung, kenà ebpemineg te sambag su kunaan din ke hustu en is paaǥi zin, iyan, ebpemineg mulà te sambag is etew he uluwanen.
16 Is tulebung he etew, emun ed-insultuwan segugunà egkepauk, iyan, is etew he uluwanen kenè din edseǥipaan is ked-insultuwi kandin.
17 Is kenà teruen he tistiǥus, hustu is ebpengeǥiyen din diyà te hukmanan, iyan, is tarù he tistiǥus, tarù is kandin he ebpengeǥiyen.
18 Is kenà binentayan he kegkaǥi, iring te lembitan su ebpekepalì te ǥehinawa, iyan, is menge lalag he mibpurungan is-isipa ne ebpekevey te keupiyaanan.
19 Is menge lalag he tutuu kenà egkaawà te wazà pidtemanan, iyan, is lalag he tarù meǥaan dà egkahanew.
20 Limbung is egketaǥù diyà te ǥehinawa te etew he iyan ed-isipen din is kebaal te mezaat, iyan, kelipey mulà is egketaǥù diyà te ǥehinawa te etew he ebpen-ahà te melinew he kebpekesavuk.
21 Wazà ebpekekaid te etew he metazeng, iyan, samuk mulà is egkeperateng te menge etew he mezaat is menge ulaula zan.
22 Egkeepesan te Nengazen is teruen, piru igkelipey zin mulà is kenà menge teruen.
23 Kenà ebpehivantug is etew he uluwanen mehitenged te netuenan din, piru is menge tulebung, ibpezalig dan mulà is tinulebung he menge vaal zan.
24 Is etew he meǥied egkehimu he pengulu, iyan, is etew he peǥulen, egkehimu zà mulà he uripen.
25 Is kegkeipeng ne ebpekeveǥey te seeng, iyan, is meupiya he lalag, ebpekeveǥey te kelipey.
26 Is metazeng he etew ebpekegiya te emiǥu zin, piru ebpeketazin mulà is lalung he etew.
27 Is peǥulen he etew, kenè din egkekuwa is egkesuatan din, iyan, edsepian mulà is etew he meǥied.
28 Emun ebpengungubpaan ka he metazeng, pedayun ka he ed-ubpà wey egkelibri ka te kemetayen.