19
Meupiya pa is egkeey-eyuwan he wazà igkesawey te menge vaal zin kenà is tulebung he mezaat is kebpemèbè din.
Kenà meupiya emun tekew ki en egkeleglegetayi te wazè ta metueni is ked-ul-ula zuen wey is egkehimu he rimeǥas din. Kenà meupiya is kedegdeǥusu su kela ke mesayep ki.
Duen menge etew he edezeeten dan is keugelingen dan tenged te kedtinulebung dan, ne iyan ebesulan dan is Nengazen.
Tenged te kesepian te etew egkehimu he mahabet is menge emiǥu zin, ne tenged daan te kegkeey-eyuwi te etew, ed-engkezan sikandin te menge emiǥu zin.
Edsilutan is teruen he tistiǥus, ne kenà ebpekeǥawas te silut is minsan hentei he edtarùtarù.
Mahabet is edhimu te paaǥi wey zin mepenunuat is etew he lavew is pid-etawan din, ne emun duen etew he ebpekeveǥey te menge keupiyaanan ne mahabet is egkaǥi he emiǥu zin haazà is nekeveǥey te menge keupiyaanan.
Is etew he pubri, kenà idtetepian te menge kezuzumahi zin, iyan pe be medseǥipà kandin is menge emiǥu zin dà. Emun ebpetavang ka kandan ne ed-eles dan.
Is kebpenigudu te etew su wey mehimu he uluwanen, ne tuus he igkeseeng din is keugelingen din, ne heini he etew ed-uswag.
Edsilutan is teruen he tistiǥus, ne is minsan hentei he ebpengaǥi te tarù ne egkezeetan.
10 Kenà dait is tulebung he etew he ebpengungubpaan he zekelà is ketiǥeyunan din, ne tuwas pa he kenà dait is uripen he ebayàbayà te menge edumala.
11 Tenged te ketau te etew, egkehimu sikandin he mepelevayen. Ne igkelipey zin is kebpesaylu zin te nekesalà diyà te kandin.
12 Emun egkepauk is hadì ne iring haazà te edhiniǥer he erimaung, iyan, is tavang din igkepetug-iring daan te zehemug he ebpekepetuvù te pinemula.
13 Is tulebung he anak, ebpekezezaat te amey zin, ne is bahi he peretebek te esawa zin, ne iring te edtiǥisan he atep.
14 Is baley wey zuma pa he menge azen, egkepengevilin diyà te ginikanan, iyan, Nengazen mulà is ebpekeveǥey te uluwanen he esawa.
15 Emun ebpepepeǥul ka wey edtulung ke zà edlipezeng ne siguradu ebitilen ka.
16 Is kebpezumazuma te etew te menge suǥù te Megbevayà, iyan egkehimu he ibmeluǥayad te ked-ubpè din, piru is kenà edtuman ne meǥaan dà egkeumuri.
17 Emun ebeǥey ki ziyà te menge pubri, ne iring te impesambey nu is Nengazen, su iyan is Nengazen ebayad kenikew.
18 Mensuwa nu is menge anak nu zutun te zuen pa timpu. Emun kenè nu sikandan ebmensuwen, iring te mid-uǥup ka he edhimatey kandan.
19 Beleǥaza nu is etew he uuringeren te ked-etuvang te neveelan din, su emun ed-uǥupan nu sikandin, ne egkelayam ne edsublien din is mibeelan din.
20 Pemineǥa nu is idsambag kenikew ne zewata nu is ibpenurù kenikew ne emun egkeuǥet egkehimu ka he uluwanen.
21 Mahabet is pelanu te etew piru iyan gihapun egkeulaula is egkesuatan te Nengazen.
22 Iyan egkesuatan te etew is; kenà sikandin engkezi te ebmahal. Deyzey pa is egkeey-eyuwan kenà is teruen.
23 Is etew he edtahud te Nengazen, edluǥeyazan te untung, melipayen wey ebpekelikey te kesamuk.
24 Duen menge etew he utew tepulan minsan is keenen ne kenè din pa igkesungit. 25 Kinahanglan he edsilutan is menge sumpalit para is iring dan he kenà memetau ne egkehimu sikandan he uluwanen. Is uluwanen he etew ne ed-iseg pa is kedsavut din emun edewayen sikandin.
26 Mekeeled eled wey ebpesudìsudì he anak is edsukul te amey zin wey edsegseg te iney zin.
27 Mama, emun kenè nu ebpemineǥen is menge penurù ku kenikew, ne idselikwey nu is menge penurù he ebpekeveǥey te ketau.
28 Is teruen he tistiǥus, edsumpeliten din is hustu he ketezengan, wey is menge etew he lalung, iyan egkesuatan dan is kelelalung.
29 Ebmultahan is etew he sumpalit ne ebuǥelen is egkeengey-engey.