30
Is menge Erubasa ni Agur
Iyan heini menge erubasa ni Agur he anak ni Jake he tig-Masa. Migkaǥi zin heini ziyà te ki Itiel wey ziyà te ki Ucal:
“Iyan a kinepeglungan te langun he menge etew.
Is ked-isip-isip ku ne henduen be te kenà ked-isip-isip te etew.
Wazà a mebpenginenau he mehimu a he uluwanen,
ne wazè ku zaan netuenan mehitenged te Megbevayà.
Duen be etew he nekehendiyà te langit he midliku ded kayi te kelibutan?
Duen be etew he nekekemkem te keramag etawa neketenges te wahig te manggad?
Duen be etew he nengelintau wey mekesavuk is menge zulunà te kelibutan?
Emun duen nu nekilala, keǥiya nu kedì is ngazan din wey is ngazan te menge anak din.
Is kada lalag te Megbevayà ne egkeseriǥan utew.
Iring sikandin te kelasag te menge etew he ed-aput diyà te kandin.
Kenè nu umani is ibpesavut din,
su emun ed-ul-ulahan nu heini, edsewayen ke zin ne wazè en igkevarew nu emun egkeǥiyen ke zin he teruen.”
Nengazen, duen dezuwa he ebuyuen ku ziyà te kenikew. Emun egkehimu ne edhangyù a he iveǥey nu kediey heini te kenè e pa ebpatey. Iyan heini: iyan ka metau he kenà a meketarùtarù. Ikezuwa, iyan ka metau he kenà a mehimu he utew egkeey-eyuwi etawa mehimu he sepian su iyan dà egkesuatan ku he zuen ku mekaan te kada andew. Su emun utew zekelà is ketiǥeyunan ku kela ke iyan ku haazà meseriǥi ne iyan ku sikew egkeiniyuǥan; ne emun pubri a, kela ke mekepemenakew a ne egkepeel-elezan ku sikew.
Nekeuman pa he menge Erubasa
10 Kenè nu pemeyunga is suluǥuen emun ebpekedlalag kew te egalen din, su emun ed-ul-ulahan nu heeyan ne ebpenrewakan ka zutun te suluǥuen ne egkepigedahan ka.
11 Duen menge etew he kenà ebpekehimu he ebpengemuyù he tuvazi te Megbevayà is menge ǥinikanan dan, kekenà, nasì dan dà ebpenrewaki.
12 Duen daan menge etew he egkeisip dan he wazè en igkesewayi kandan, piru is tutuu meremerik is ulaula zan.
13 Duen menge etew he utew en hembugiru, minsan is kebpenirapsirap dan ne henduen te hentei sikandan.
14 Duen menge etew he henduen te vuaya, iyan baal zan is kebpemintahà te menge pubri.
15 Is etew he zekelà is kadar zin ne iring te limatek. Layun dà egkaǥi te, “Beǥayi a!”
Duen daan tetelu etawa heepat he kenà egkeperahan:
16 is iveyaan,
is bahi he kenà ebpekaanak,
is tanà su kenà egkeperahan te uzan
wey hapuy su kenà daan heini egkeperahan te idtavun duen.
 
17 Is etew he ed-undaunda wey kenè din ebpemineǥen is menge ǥinikanan din ne edtuktukan te menge uwak is menge mata zin, ne edeesan te menge kulaǥu is minatey he lawa zin.
18 Duen daan heepat he utew ku igkeinuinu ne kenè ku heini egkesavut:
19 Ebmenumenu is kulaǥu he mekelayang diyà te hewhewanan,
is uled ebmenumenu he ebpenanap diyà te menge vetuwen,
is barku ebmenmenuwen he mekeǥampung diyà te zaǥat,
wey ebmenmenuwen te kenakan he mekepengulitawu te raǥa.
20 Iyan heini ed-ul-ulahan te vahi he mengungumpadi: Ebpehilavet sikandin te zuma he maama, ne kegkeipus dutun ebpemeziǥù ne ke sikandin diyà te esawa zin te wazè din mid-ulaula he mezaat.
21 Duen tetelu etawa heepat he kenà egkaantus te menge etew kayi te kelibutan:
22-23 Is suluǥuen he nehimu he hadì,
is tulebung he neezenan te minsan hengkey he egkesuatan din te egkaan,
is egkengeepesan he vahi he neesawa,
wey is uripen he vahi he ebpekeliwan te vahi he teǥiuripen kandin.
24 Duen heepat he zezeisey he linimbag, iyan, utew memetau:
25 Is menge lemetik, minsan dezeisey zà wey meluya sikandan, ebpeketiǥum dan te keuyaǥan dan timpu te ǥulavung,
26 is menge badir, kenà sikandan memezesen, iyan, diyè dan ebaal te ubpeey zan te vetuwen,
27 is menge terapan, wazè dan pengulu, iyan, egkesevaha zan emun edlayang dan,
28 is menge telètà, melemu zà he ed-emien, iyan, diyè ta egkengaahà te turuǥan te hadì.
29 Duen tetelu etawa heepat he menge linimbag he hembuǥen ke edhipanew:
30 is erimaung, iyan utew mezesen te langun he langgam he wazà igkahandek,
31 is lumansad he manuk,
is meemahan he kambing,
wey is hadì he edhuna te menge sundaru zin.
32 Emun nekevaal ka te tinulebung tenged te kebpelavew nu, wey emun ebpelanu ka te mezaat ne engkezi nu heeyan! 33 Emun edtulungan nu egkutawa is gatas egkehimu heini he mentikà? Ne emun edsumbaǥen nu is izung te duma nu kenè be edsengguwen man hei? Umbe emun ebaal ka te igkepauk te sevaha he etew, iyan heeyan ebpuunan te samuk.