Menge Salmo
1
Is Kegkezeyzey
Deyzey is etew he kenà ebpemineg te penurù te menge lalung,
wey kenà ed-iring te ebeelan te menge mekesesalà,
wey kenà ebpekiduma kandan he ed-undaunda te Megbevayà.
Kekenà, iyan mulà kandin he igkelipey is kedtuman te menge penurù te Nengazen,
ne iyan heini ebpurungan din egngunngunua te maandew wey te mezukilem.
Iring sikandin te kayu he ziyà ipemula te veyvey te wahig
ne ebpemeǥas sikandin dutun te timpu te tipemeǥas,
ne kenà egkeǥangu is menge zahun din.
Is etew he iring kayi, ed-uswag diyà te menge vaal zin.
Piru kenà mulà iring kayi is lalung he menge etew,
kekenà, iring sikandan te ukap he idlayap te keramag su wazè dan pulus.
Umbe te andew te kedhukum, edsilutan sikandan te Megbevayà
ne kenà sikandan ebpeketampu te menge metazeng.
Su egiyahan te Nengazen is menge metazeng,
piru is menge ulaula te menge lalung iyan ed-uwit kandan diyà te kezeetan.