114
Kanta Mehitenged te Kegawas te menge Israilihanen Puun te Ehipto
1 Is menge Israilihanen he menge kevuwazan ni Jacob, mid-ubpè dan dengan diyà te Ehipto, he selakew is kineǥiyan te menge etew zutun.
2 Ne hein migawas dan en diyà te Ehipto, ne midhimu te Megbevayà is Juda he segradu he lugar zin,
ne midumala zin is Israel.
3 Is Daǥat he Meriǥà mibpelaǥuy te kegkaahaa zin kandin.
Ne is Wahig he Jordan mid-endud.
4 Neyunggat is menge vuntud wey menge vuvungan he henduen be te ebpemenlinglingketew he menge kambing wey menge kerehidu.
5 Maan is mibpelaǥuy is Daǥat he Meriǥà wey mid-engked te kedtudà is Wahig he Jordan?
6 Maan is neyunggat is menge vuntud wey is menge vuvungan he henduen be te ebpemenlinglingketew he menge kambing wey menge kerehidu?
7 Egkeyunggat daan minsan is tivuuk he kelibutan diyà te etuvangan te Nengazen he Megbevayà ni Jacob;
8 ne midhimu zin he peneng wey serebseb he edtudà sikan is lintikan he vatu.