118
Kebpeselamat tenged te Kebpekezaag
1 Peselemati is Nengazen su meupiya sikandin;
Wazà pidtemanan te ǥaǥew zin.
2 Megkaǥi is menge etew te Israel te,
“Wazà pidtemanan te ǥaǥew zin.”
3 Megkaǥi is menge kevuwazan ni Aaron te,
“Wazà pidtemanan te ǥaǥew zin.”
4 Megkaǥi is menge edtahud te Nengazen te,
“Wazà pidtemanan te ǥaǥew zin.”
5 Dutun te timpu te kelised ku, mid-umew ku is Nengazen,
ne midtavak e zin pinaaǥi te kedlibriya zin kediey.
6 Duma ku is Nengazen, umbe kenà a egkahandek.
Wazà kezeetan he egkehimu te etew kayi te kediey.
7 Duma ku is Nengazen.
Iyan sikandin edtavang kedì,
ne egkeehè ku is kegkezaaǥa ku te menge kuntada ku.
8 Meupiya pa is kedangep diyà te Nengazen kenà is kedsarig diyà te etew.
9 Meupiya pa is kedangep diyà te Nengazen kenà is kedsarig diyà te mekeǥeǥehem he menge etew.
10 Midliǥuyan a te menge etew he ebpuun diyà te mahabet he menge nasyun he menge kuntada ku,
piru nezaag ku sikandan pinaaǥi te ǥehem te Nengazen.
11 Tutuu he midliǥuyan e zan,
piru nezaag ku sikandan pinaaǥi te ǥehem te Nengazen.
12 Henduen dan te petiyukan is midsurung kedì,
piru neiring dà sikandan te nevinsulan he reǥami he segugunè dà neevuki.
Nezaag ku sikandan pinaaǥi te ǥehem te Nengazen.
13 Mibpurungan e zan etekiya ne hapit e zan en egkezaag,
piru midtevangan a te Nengazen.
14 Iyan is Nengazen mibeǥey kedì te zesen;
iyan sikandin migkanta ku.
Iyan sikandin menluluwas ku.
15-16 Pemineǥa is ked-ugyab te menge etew te Megbevayà diyà te menge kampu zan tenged te kezeeǥan dan:
“Heini he kezeeǥan mibeelan te Nengazen pinaaǥi te ǥehem din!
Is gehem te Nengazen iyan mibpezaag kenitew!”
17 Kenè e pa ebpatey, kekenà, ebpedayun e pa he uuyag,
su wey ku ikeseysey is mibpemeelan te Nengazen.
18 Minsan utew zekelà is silut te Nengazen kedì, piru wazè din ituǥut he mebpatey a.
19 Puwasi a te menge ǥemawan te valey te Nengazen
su edseled a te kebpeselamat te Nengazen.
20 Iyan heini menge ǥemawan te Nengazen he menge metazeng dà is ebpekeseled duen.
21 Ebpeselamat a kenikew, Nengazen, su midtavak nu is ked-ampù ku.
Ne iyan ka midluwas kediey.
22 Is batu he mid-engkezan te menge pandey iyan pa hinuun nehimu he pundasyun he vatu.
23 Midhimu heini te Nengazen, ne utew heini egkein-inuwi.
24 Iyan heini andew te kezeeǥan te Nengazen, umbe edlipey kiw wey edsilibra kiw.
25 Nengazen, ebpengemuyù key ziyà te kenikew he ipelaus nu is kedlibriya nu kenami.
Himuwa nu he mebmelempusen is menge vaal zey.
26 Midtuvazan te Nengazen is sinuǥù din.
Ne sikiyu is menge etew, berakat he tuvazi kew zaan te Nengazen puun kayi te valey zin.
27 Is Nengazen, iyan sikandin Megbevayà; ne utew kiw zin mibpurungi.
Ed-uwit kiw te menge subpang te kayu te kedsilibra tew te pista, ne edliǥuy kiw zuen te pemuhatà.
28 Nengazen, iyan ka Megbevayè ku;
ebpeselamat a wey edalig kenikew.
29 Peselemati is Nengazen, su meupiya sikandin;
wazà pidtemanan te ǥaǥew zin.