129
Ampù he Igkuntra te menge Kuntada te Israel
1 Menge tig-Israel, keǥiya niw ke mibmenumenu kew te ebpaantus te menge kuntada niw puun pa te aney en he kegketukud te nasyun niw.
2 “Dekelà is kebpeentusa zan kenami puun pa te kebpuun te nasyun dey.
Piru wazè key zan mezèdeeti.
3 Mibpelian dan te mezalem is menge peka zey;
henduen be heini te tanà he mid-eradu.
4 Piru metazeng is Nengazen,
su impelingkawas key zin te kebpen-uripen te lalung he menge etew.”
5 Berakat he ebpekepekeziyù tenged te kegkeeled is langun he edumut te Zion.
6 Berakat he meiring sikandan te menge sagbet he nenuvù diyà te atep,
he iyan pa kedtuvù dan ne egkeǥangu zan en.
7 Wazà edseǥipà te kedtiǥum kayi he menge sagbet wey wazà ed-uwit kayi he vinagkes.
8 Berakat he sikan is edsaǥad kenà megkaǥi ziyà te kandan te,
“Berakat he tuvazi kew te Nengazen!
Ebpenubtuvazan dey sikiyu pinaaǥi te ngazan te Nengazen.”