13
Kebpenganduy te Tavang te Megbevayà
1 Nengazen, sengemenu keluǥayad is kenè nu kedseǥipaa kediey?
Taman en be heini te wazà pidtemanan?
Sengemenu keluǥayad is ked-elesi nu kediey?
2 Sengemenu keluǥayad is kebpekaantus ku te kegkeliveg.
Sengemenu keluǥayad is kebpekaantus ku te kegketeǥui te seeng te ǥehinawa ku?
Sengemenu keluǥayad is kegkezeeǥa kedì te menge kuntada ku?
3 Nengazen he Megbevayè ku kenà a kenikew pesegdana;
iveǥey nu en kedì is mibuyù ku pinaaǥi te ked-ampù ku.
Ilikù nu kayi te kedì is desen ku su para kenà a mebpatey.
4 Su utew egkelipey is menge kuntada ku emun egkezaag e zan.
Kenè nu ituǥut he mekezayandayan sikandan pinaaǥi te kegkezeeǥa zan kedì.
5 Ebpekesarig a kenikew, Nengazen, su ǥeina te kenà egkaawà is kebmahala nu kediey.
Ne utew a egkelipey su edlibriyen e man kenikew.
6 Egkentahan ku sikew, Nengazen, su puun pa zengan mibpurungan a kenikew.