138
Kebpeselamat diyà te Megbevayà
Ebpeselematan ku sikew, Nengazen, te ebpuun kayi te tivuuk he ǥehinawa ku.
Egkanta a te menge idalig kenikew ziyà te etuvangan te zuma he menge ed-ezapen.
Edluhud a he edsinaru ziyà te valey nu he edalig kenikew tenged te ǥaǥew nu wey kebmetinumanen nu.
Su impeehè nu he sikew wey is lalag nu lavew te langun he menge vutang.
Hein mid-umew ku sikew, ne midtavak a kenikew;
midlig-enan a kenikew pinaaǥi te zesen nu.
Edalig kenikew, Nengazen, is langun he menge hadì kayi te tivuuk he kelibutan
su egkezineg dan is menge lalag nu.
Egkanta zan mehitenged te mibeelan nu,
su zekelà is gehem nu.
Minsan lavew ka te langun, Nengazen, ed-isipen nu is menge egkaayuayu.
Ne minsan diyè ka te meziyu su metikang ka, netuenan nu is langun he menge vaal te menge mepelevawen.
Minsan utew a edlised, ne wazè nu ituǥut he mebpatey a.
Midsilutan nu is utew egkengepauk he menge kuntada ku.
Ne midlibri a kenikew pinaaǥi te ǥehem nu.
Edtumanen nu, Nengazen, is menge saad nu kayi te kediey.
Wazà pidtemanan te ǥaǥew nu.
Kenè nu pesegdana heini is menge linimbag nu.