145
Is Kegkanta te Kedalig te Megbevayà
1 Edeliǥen ku sikew, Megbevayè ku he Hadì.
Edeliǥen ku sikew te wazà pidtemanan.
2 Edeliǥen ku sikew te kada andew,
ne ed-ul-ulahan ku heini te taman te taman.
3 Mekeǥeǥehem ka he Nengazen, umbe ereg ka he edeliǥen.
Kenà egketegkad is kegkemekeǥeǥehem nu.
4 Is kada lapis te kevuwazan, ne idsangyew zan is nezumahan te ǥehem he menge vaal nu ziyà te edsunud kandan he menge kevuwazan.
5 Egngunngunuen ku is kegkelavew wey kegkemekeǥeǥehem nu, wey is igkeinuinu he menge vaal.
6 Is menge etew, idsangyew zan is utew egkein-inuwi he menge vaal nu,
ne ibpenudtul ku zaan is kegkemekeǥeǥehem nu.
7 Ibpenudtul zan daan is kegkevantug te keupiya nu he wazè din repeng,
wey egkanta zan mehitenged te ketazeng nu.
8 Nengazen, hihizuwen ka wey iipengen;
beliǥeǥawen wey kenà daan melemu he egkepauk.
9 Nengazen, edtulengezan nu is langun;
duen nu hizu te langun he linimbag nu.
10 Ebpekepeselamat kenikew, Nengazen, is langun he linimbag nu;
edeliǥen ka te metinumanen he menge etew nu.
11 Ibpenudtul zan is kegkemekeǥeǥehem te ginhedian nu wey is kegkemekeǥeǥehem nu,
12 su wey mesayud is langun he keet-etawan te nezumahan te ǥehem he menge vineelan nu wey is mekeǥeǥehem he ginhedian nu.
13 Is kedhadì nu wazà pidtemanan.
Nengazen ka he metinumanen te langun he menge penaad nu,
wey veliǥeǥawen ka te langun he linimbag nu.
14 Midtevangan nu is langun he edlised
wey midlig-enan nu is langun he meǥuyà.
15 Midsarig diyà te kenikew is langun he uuyag he linimbag,
ne mibeǥayan nu sikandan te keuyaǥan dan te timpu he egkinehenglanen dan en.
16 Ne kenè kurang is ibeǥey nu umbe egkengahantey sikandan.
17 Nengazen, metazeng ka, ziyà te langun he paaǥi nu,
ne hihizuwen ka ziyà te langun he ebeelan nu.
18 Uvey nu zà, Nengazen, is langun he epengumew-umew kenikew te tinutuuwà.
19 Is menge edtahud kenikew ne ebeǥayan nu sikandan te penganduy zan;
ebpemineǥen nu is pengumew-umew zan kenikew,
ne edluwasen nu sikandan.
20 Binentayan nu layun is langun he etew he mibmahal kenikew,
iyan, edezeetan nu mulà is langun he menge lalung.
21 Edeliǥen ku sikew, Nengazen.
Is langun he linimbag nu edalig daan kenikew te wazà pidtemanan.