147
Is Kedalig diyà te Megbevayà he Mekeǥeǥehem
Deliǥa is Nengazen!
Utew meupiya is kegkanta te menge idalig te Megbevayè tew.
Ne meupiya heini su zait man iyan sikandin he edeliǥen.
Mid-umanan tukuza te Nengazen is inged he Jerusalem;
wey midtiǥum din umana is menge kevuwazan ni Israel he nevihag.
In-awè din is seeng te egkengeseeng;
mibewian din is menge palì dan.
Kandin he ketau ke pira is kezakel te menge vituen
ne migngezanan din is kada sevaha kandan.
 
Utew iyan mekeǥeǥehem is Nengazen,
ne is ketau zin ne kenà egketegkad.
Impeketikang din is menge egkengaayuayu.
Iyan, is menge lalung mulà ne mid-ey-eyazan din te edezaat sikandan.
Kentahi niw is Nengazen duma te kebpeselamat diyà te kandin.
Ipezaǥing niw is alpa para te Megbevayè tew.
Midilungan din is langit te menge ǥapun,
ne mibpeuzanan din is dini te kelibutan,
wey mibpetuvuan din is menge vuntud te menge sagbet.
Iyan sikandin mibeǥey te egkeenen te menge langgam dini te lumpad.
Iring din daan te menge pispis te uwak ke egkinahanglan te egkeenen dan.
10 Is igkelipey zin ne kenà iyan is kezesen te menge kudà etawa is meǥaan he menge sundaru,
11 kekenà, iyan is edtahud kandin wey edsarig te ǥaǥew zin.
 
12 Sikiyu is menge meǥinged diyà te Zion he inged he Jerusalem, deliǥa niw is Nengazen he iyan Megbevayè niw.
13 Su midlig-enan din is menge pultahan te inged niw.
Ne midtuvazan kew zin.
14 Mibeǥayan kew zin te kelinew ziyan te ed-ubpaan niw.
Ne midhantey kew zin te meupiya he egkeenen.
15 Ebmenduan din is kelibutan,
ne segugunà heini edtuman.
16 Midtembunan din is tanà te ayis ne iring heini te meputì he malung,
ne ingkayar zin is pinu he ayis he henduen be te avu.
17 Impeuzan din te ayis he iring te zezeisey he vatu.
Ne wazà minsan hentei he ebpeketigker te keǥenew kayi.
18 Ne mibmenduan din heini ne nengetunew heini.
Impepengeramag din ne midtudà is wahig.
19 Impahayag din is menge lalag din, menge sulunuzen he ibpesunud din, wey menge suǥù din diyà te menge tig-Israel he menge kevuwazan ni Jacob.
20 Wazè din heini ul-ulaha ziyà te zuma he menge nasyun;
wazè dan mulà haazà metueni is menge suǥù din.
 
Deliǥa is Nengazen!