19
Is Kegkemekeǥeǥehem te Megbevayà
1 Is hewhewanan ebpahayag te utew kegkemekeǥeǥehem te Megbevayà,
su zutun egkeehè ta is menge linimbag din.
2 Ke và dan dà etew ne edtudtulen dan is gehem te Megbevayà te maandew wey te mezukilem.
3 Minsan kenè ta egkezineg is menge lalag dan,
4 ne ebpekeuma ziyà te minsan hendei kayi te kelibutan is tudtul zan;
nekeeneb heini ziyà te minsan hendei.
Mibeelan te Megbevayà diyà te kewkewangan is egkesevukan te andew.
5 Ne puun dutun, egawas is andew ke meselem he melipayen iring te ebpengesawa he ibpenahik,
wey iring te ebpekidlumbà he andam en he ebpelelaǥuy.
6 Edsilà heini ziyà te edsilaan ne edsanlep diyà te edsenlepan.
Ne egkesuǥat is langun te keinit din.
Is Kesuǥuan te Nengazen
7 Is kesuǥuan te Nengazen wazè din sayep.
Ne ebpekezasig heini kenita.
Egkeseriǥan is menge penurù te Nengazen
ne ebpekeveǥey heini te ketau te kenà metau.
8 Hustu is menge sulunuzen te Nengazen, ne ebpekeveǥey heini te kelipey.
Wazà sayep te menge suǥù te Nengazen ne ebpeketayew te isip te etew.
9 Meupiya is kedtahud te Nengazen,
ne ereg heini he ed-ul-ulahan te wazè din pidtemanan.
Is kedhukum te Nengazen hustu wey metazeng.
10 Ne is langun kayi edhuna pa he mahal te lunsey he vulawan,
he ke và dà keenen, edhuna pa he meemis te teneb he wazè din sahug.
11 Pinaaǥi kayi, Nengazen, egkeleǥuyan a is suluǥuen nu.
Ne emun edtumanen ku heini ne mahabet is keupiyaanan he egkekuwa ku.
12 Usahay kenà egketuenan te etew he nekesalà sikandin.
Tenged kayi Nengazen, peseyluwa a kenikew te menge salà he neveelan ku he wazè ku metueni.
13 Ne tevangi a zaan kenikew wey a kenà mekevaal te menge salà he edtivevaan
ne kenè nu ituǥut he meuripen a kayi,
su para wazà igkesawey kedì
ne zutun egkelikayan ku is mehabet he kelasi te kebpekesalà.
14 Sikew, Nengazen, is eputè ku, wey mibelukas kedì, berakat he ebpekepenunuat kenikew is menge lalag he egkengekaǥi ku wey egkeisip ku.