26
Is Ked-ampù te Metazeng he Etew
1 Nengazen, ipeehè nu he wazè ku salà,
su nengungubpaan a he wazà igkesawey kedì
ne mibpurung a medsarig kenikew.
2 Susiya a, Nengazen;
susiya nu is isip ku wey ǥehinawa ku.
3 Su layun ku edtentenuzi is gaǥew nu,
ne layun ku sikew ebpezumdumahi.
4 Wazà a mebpekiduma te menge etew he limbungan wey uvag-uvag dà is menge ulaula zan.
5 Kenà a uyun te menge kevurunan te mezaat he menge etew.
Ne wazà a mulà mebpekiduma kandan.
6 Edlùluan ku is menge velad ku he tuus te wazè ku salà.
Ne edhendiyà a te pemuhatà he zutun ka ebpemuhata su ed-azap a kenikew, Nengazen.
7 Ne zutun egkanta a te menge kentahan he para te kebpeselamat,
wey edseysayen ku is langun he egkein-inuwan he menge vaal nu.
8 Nengazen, mahal ku is baley he ubpeey nu,
he iyan kes lugar he zutun egkaahà is kegkemekeǥeǥehem nu.
9 Kenà a kenikew zèdeeti duma te menge mekesesalà,
iring te menge teremunù.
10 Heini sikandan, layun ebevaal te mezaat
ne ebpenepian dan is duma.
11 Iyan, siak mulà, wazà igkesawey kediey,
umbe libriya a wey kehizuwi a.
12 Guntaan netuenan ku he kenè e en egkemenu,
umbe, edeliǥen ku sikew Nengazen diyà te ketiǥuman te menge etew nu.