39
Is Kedtug-an te Salà te Etew he Nekebmereǥen
1 Nekekaǥi a kayi te gehinawa ku te,
“Ebpekeventayan ku is ed-ul-ulahan ku,
ne edlikayan ku he mekesalà a pinaaǥi te kegkaǥikaǥi ku.
Ebpeninguhaan ku he kenà a mekeriklamu ziyà te Megbevayà.
Lavew en ke ziyà te uvey ku is lalung he menge etew.”
2 Umbe, mibpereremek e zà, ne wazà ad megkaǥikaǥi.
Iyan, wazà heini meketavang kedì
su nasì en med-iseg is mesakit he egkeǥezam ku.
3 Ne nesemukan utew is isip ku.
Ne hein edtulungan ku en egngunngunua ke ebpedayun e ve he ebpereremek etawa kenà, ne nasì en med-iseg is kegkesemuki te isip ku.
Umbe wazè ku en meeǥen is gehinawa ku; nekekaǥi a te,
4 “Nengazen, petentenuzi nu kedì he zuen ketepusan te untung ku wey nevilang en is kahabet te menge andew te ked-ubpè ku;
ipesavut nu kedì ke sengemenu zà keluǥayad is untung ku.”
5 Utew zà mevavà is untung he imbeǥey nu kediey.
Diyà te kenikew is keluǥayad te untung ku ne wazè din bali.
Su is tutuu iyan heini: is untung te etew ne iring dà te keramag he edlavey zà,
6 wey iring te alung he egkaawà.
Utew egkesamuk is etew te menge vuluhaten he wazè din pulus.
Edtiǥum sikandin te menge ketiǥeyunan,
iyan, emun ebpatey en sikandin, ne kenè din en egketuenan ke hentei is egkepulusan dutun.
7 Guntaan, Nengazen, wazè en duma he edseriǥan ku.
Iyan ke zà edseriǥan ku.
8 Ipelingkawas a te langun he menge salè ku,
ne kenè nu ituǥut he sudia a te menge tulebung.
9 Ebpereremek e en; kenà ad edriklamu,
su iyan ka midrasey kedì.
10 Guntaan, kenà ad kenikew siluti.
Su henduen e en te ebpatey kayi te kebpeentusa nu kedì.
11 Ebmensuwen nu is etew pinaaǥi te kedsewaya nu kandin, tenged te menge salè din.
Ne iring is ebeelan nu te kegketket su id-awè nu id-amin is mahalen he menge azen din.
Tutuu iyan he iring dà te keramag is untung te etew su edlavey zà.
12 Nengazen, tevaka nu is ked-ampù ku;
pemineǥa nu is kebuyù ku te tavang.
Seǥipaa nu is kedsineǥew ku.
Su iring e zà te lumelengyawà he meǥeliyug nu kayi te kelibutan, iring te langun he menge kepuun ku.
13 Kena ad kenikew kepeuki,
su para mebmelipayen a te kenè e pa ebpatey.