44
Ampù te Kebpelibri te Megbevayà
1 He Megbevayà, netudtul kenami te menge kepuun dey
is mibpemeelan nu hein kaazen dan pa zutun te neuǥet en he timpu,
2 he mibpenegseg nu is menge etew he wazà medtuu kenikew ne iyan nu impeubpà diyà te ed-ubpaan dan is menge kepuun dey.
Impaantus nu haazà he menge etew ne impeuswag nu mulà is menge kepuun dey.
3 Piru iyan tutuu is, kenà pinaaǥi te ǥumaan wey ketau te kebpekidtebek is ingkeengkena te menge kepuun dey kayi he tanà,
kekenà, tenged te ǥehem nu, ebilidad nu, wey hizu nu kandan
tenged te kebmahala nu kandan.
4 Iyan ka hadì ku wey Megbevayè ku;
iyan ka mibeǥey te kezeeǥan diyà te kenami te menge kevuwazan ni Jacob.
5 Pinaaǥi kenikew egkezaag dey is menge kuntada zey.
6 Wazà a medsarig he iyan ibpekezaag ku is panè ku wey ispada ku.
7 Su iyan ka ebpengelintau para mezaag dey is menge kuntada zey.
Ebpeel-elezan nu is ebpekidtebek kenami.
8 He Megbevayà, iyan ka ibpehivantug dey layun, ne edeliǥen dey sikew te wazà pidtemanan.
9 Piru ǥuntaan, inselikwey key en kenikew ne intuǥut nu he mepeel-elezi key.
Wazè nu en dumahi is menge sundaru zey.
10 Ketau nu is kegkepeleǥuwi zey te menge kuntada zey.
Ne mibpenavan dan is menge azen dey.
11 Intuǥut nu he mebpematey key iring te menge kerehidu he mibpenlapà.
Ne impeyapat key kenikew ziyà te menge nasyun.
12 Sikami is menge etew nu, ne henduen be te imbelegyè key zà kenikew te veratu.
Henduen te wazè dey pulus diyà te kenikew.
13 Kenikew he ketau is kegkepeel-elezi kenami
wey ked-eengiti kenami te siringan dey he menge nasyun.
14 Duen pa menge erubasa zan he ebpekeinsultu kenami,
ne ebpurung dà sikandan ebpenggemen-gemen is edsudì kenami.
15 Layun ad ebpeel-elezi.
Ne igkeeled ku en is kegkaahaa te vuked ku,
16 tenged te ebpengeǥiyen wey ked-insultuwi kedì te menge kuntada ku he egkesuat he ebpenimales kedì.
17 Nehitavù heini is langun minsan pa te wazè dey sikew lipati,
ne wazè key zaan medrapas te paaǥi te kebpekid-uyun nu kenami.
18 Wazè key med-iniyug kenikew ne wazè key medsuwey ziyà te zalan he ibpeikul nu kenami.
19 Iyan, henduen be te midrupet key kenikew wey mibey-anan diyà te utew merusirem he ed-ubpaan te leew he menge asu.
20-21 He Megbevayà, egketuenan nu emun midlipatan dey sikew
wey ke ziyè key ed-ampù te zuma he menge megbevayà,
su egketuenan nu man minsan is id-eles te etew he isip din.
22 Iyan, tenged te kedtuu zey kenikew, ne layun key en ebpemiligru te kemetayen.
Iring key te kerehidu he para edlepaan.
23 Sigi en, Nengazen, waleng kad!
Kenè key kenikew iniyuǥi taman te taman.
24 Maan is mid-elesan key kenikew wey wazè key kenikew seǥipaa kayi te menge elentusen dey wey kedèdaaǥa kenami?
25 Iring key te nengepiley ziyà te tanà he kenè en ebpekeenew.
26 Gègaani key en tevangi;
libriya key su mahal key man kenikew.