52
Is Kedhukum wey is Hizu te Megbevayà
1 Sikiyu is mekeǥeǥehem he menge etew,
maan is ibpehivantug niw is kelelalung niw?
Kenè be layun kew ebpurungi te Megbevayà?
2 Ebpelenuwan niw is igkezeeti te zuma he etew.
Is menge zilè niw ne iring te meǥarang he kutsilyu su ebpekepalì te ǥehinawa te zuma.
Kedlimbung is layun niw ed-ul-ulaha.
3 Dekelà diyà te ǥehinawa niw is mezaat kenà is meupiya,
ne ibpelavi niw is kedlalag te tarù kenà te kedlalag te tutuu.
4 Sikiyu is menge limbungan, utew niw igkesuat is kebpesekiti niw te zuma pinaaǥi te menge lalag niw.
5 Siguradu he edezeetan kew te Megbevayà te wazà pidtemanan.
Edekepen kew zin ne eguyuzen kew zin pehendiyà te ǥawas te valey niw.
Ne edhewien din is untung niw.
6 Egkaahà heini te menge metazeng, ne egkeinuinu sikandan.
Ne ed-engit sikandan is egkaǥi te,
7 “Ahaa niw is menge etew he kenà edsarig te Megbevayà he melig-en pezem he eputè dan.
Su iyan dan edseriǥan is mahabet he menge azen dan,
ne mid-iseg is kegkemekeǥeǥehem dan pinaaǥi te kedezaat dan te zuma he etew.”
8 Piru siak mulà egkeiring a te kayu he ulibu he ziyà meketuvù te valey te Megbevayà.
Edseriǥan ku is kebmahala zin kedì te wazà pidtemanan.
9 He Megbevayè ku, ebpeselamatan ku sikew te taman te taman tenged te mibeelan nu.
Edsarig a kenikew su ebpurungan nu is metinumanen he menge etew nu.