55
Ked-ampù te Etew he Midseligkep te Emiǥu Zin
1 He Megbevayà, pemineǥa nu is ked-ampù ku;
seǥipaa nu is kebuyù ku te tavang diyà te kenikew.
2 Pemineǥa a ne tevaka a.
Egkeliveg ad te kegkesemuki ku.
3 Egkeǥiyaǥiya a te kebpenhulgà wey kebpendaagdaag te lalung he menge kuntada ku.
Su edsinemukan e zan wey edumutan tenged te kegkepeuki zan kedì.
4 Utew subra is kebpekehuyab te kumeng ku su nahandek a te kemetayen.
5 Egkerkeren ad te kegkahandek ku, su utew subra is kegkeheratì ku.
6 Ke vè e zà merepatik ne edlayang e en su ebpen-ahà a te egkehimelayan ku.
7 Edlayang a pezem pehendiyà te meziyù he sibsivayan ne zutun a ed-ubpà.
8 Egaanggaan a ebpen-ahà te egkeelesan ku
su wey a kenà meturedu te menge kuntada ku he egkepauk kedì
su iring is pauk dan te utew mevendes he vagyu.
9 Nengazen, dèdeeti nu is menge kuntada ku;
gurigawa nu is menge isip dan su wey zan kenà meuyun.
Su neehè ku is kebpesipala wey kebpetebtebekà te menge etew ziyà te inged.
10 Maandew wey mezukilem egkehitavù heini ziyà te minsan hendei zutun te inged.
Nepenù te kelelalung wey kesamuk haazà is inged.
11 Minsan hendei zutun ne zuen kelelalung wey kebpendezaat,
ne kenè en egkeengked is kebpendaagdaag wey kebpenlimbung diyà te menge kelesada.
12 Ke và ku zà kuntada is ed-insultu kedì ne egkaantus ku heini.
Ke và ku zà ukag is ebpendezeisey kedì ne egkelikayan ku sikandin.
13 Piru utew ku emiǥu is mid-insultu kedì su zuma ku wey neked-iring key.
14 Dengan utew key teleemiǥu,
ne ebpezumehè key is edhendiyà te valey te Megbevayà duma te mahabet pa he menge etew.
15 Berakat he medtik-ew mebpematey is menge kuntada ku.
Berakat he evelenga sikandan te penlevengà minsan uuyag dan pa.
Su ziyà te kandan is kelelalung wey ziyè daan te menge ubpeey zan.
16 Piru ebuyù a mulà te tavang diyà te Nengazen he Megbevayà
ne edlibriyen e zin.
17 Meselem, meudtu, wey mezukilem ebpekeriklamu a zuma is kedag-es
ne ebpemineǥen e zin.
18 Edluwasen e zin te ebpekekaid kedì te kebpekidtebek ku,
minsan mahabet is ebpekigkuntada kedì.
19 Is Megbevayà he edhadì te wazà pidtemanan ebpemineǥen e zin,
ne ebpekevevaan din is menge kuntada ku.
Heini sikandan ne wazà kegkeveǥu te kineiya zan, wey wazè dan kedtahud te Megbevayà.
20 Is emiǥu ku te nehuna he timpu nekigkuntada te menge emiǥu zin;
wazè din tumana is menge pesarig din.
21 Menayù wey meupiya is kebpengaǥikaǥi zin,
iyan, duen bes kedumut diyà te ǥehinawa zin,
ne ibmesakit te ǥehinawa is menge lalag din,
su iring heini te meǥarang he ispada.
22 Isarig nu ziyà te Nengazen is igkeseeng nu,
ne edtevangan ke zin.
Kenà egkehimu he ebpesegdanen din is menge metazeng te minsan hengkey he timpu.
23 Piru is menge teremunù wey menge limbungan idtimbag din diyà te mezalem he lugar te menge minatey, dutun te kenè pa sikandan edliwezeenan.
Piru siak mulà, edsarig a te Megbevayà.