61
Ampù para te Kebpelavan te Megbevayà
1 He Megbevayà, pemineǥa nu is ked-umew ku,
pemineǥa nu is ked-ampù ku.
2 Puun dini te meziyù he lugar ebpengumew a kenikew su neewaan ad te perateng.
Uwita a kenikew ziyà te lugar he wazà duen ebpekekaid,
3 su iyan ka pengalang ku;
iring ka te turi he iyan kenà ibpekeseled te menge kuntada ziyà te inged.
4 Ipeubpà a ziyà te valey nu te wazà pidtemanan.
Ipaaput a ziyà te kenikew iring te kebpeeputa te tagbis te menge pispis din pinaaǥi te kedlekupi zin kandan.
5 Su nezineg nu, Megbevayè ku, is menge penaad ku kenikew,
ne mibeǥayan a kenikew te menge vutang he ibeǥey nu ziyà te menge etew he edtahud kenikew.
6 Pekeluǥeyaza nu is untung te hadì ne ipahadì nu seled te wazà pidtemanan pinaaǥi te kegkehimu he hadì te menge kevuwazan din.
7 Berakat he medhadì sikandin te wazà pidtemanan he iyan ka eduma kandin, is Megbevayà.
Levani nu sikandin tenged te ǥaǥew nu wey kebmetinumanen nu.
8 Ne zutun layun a egkanta te kedalig kenikew,
ne layun ku edtumana is menge penaad ku kenikew.