63
Is Kebpengenduya te Megbevayà
1 He Megbevayà, iyan ka Megbevayè ku, ne meselem pa utew ne edangep e en diyà te kenikew.
Ke và ke zà wahig ne egkemezahan a kenikew.
Iring te ziyà a te memaza he tanà he wazà duen wahig.
2 Neehè ku is kegkemekeǥeǥehem nu wey kegketelehuzen nu ziyà te valey nu.
3 Edeliǥen ku sikew su is gaǥew nu edhuna pa he mahal kenà is untung.
4 Ebpeselematan ku sikew te kemulu e pa uuyag.
Ibayew ku is menge velad ku te ked-ampù diyà te kenikew.
5 Egkekuntintu a iring te etew he nahantey te ǥastu.
Ne ed-ugyab a is egkelipey he edalig kenikew.
6 Ne zutun te kedhizeǥè ku ne edtentenuzan ku sikew.
Ebpurungan ku sikew ed-is-isipa te tivuuk he kezukileman,
7 su iyan ka midtavang kedì.
Ne ed-ugyab a te kegkelipey zutun te kebpeeputa nu kedì diyà te kenikew he iring te kedlekupi te tagbis te menge pispis din.
8 Mid-uvey a ziyà te kenikew, ne migewezan a kenikew su para kenà a mekeizi.
9 Is egkesuat he edhimatey kedì ne ziyà ebpekepevayà te ubpeey te menge minatey.
10 Ebpematey sikandan te tebek, ne is menge lawa zan egkeenen te leew he menge asu.
11 Egkelipey is hadì tenged te midhimu te Megbevayà diyà te kandin.
Egkelipey zaan is langun he ebpenangdù diyà te Megbevayà.
Piru ibpetiem mulà te Megbevayà is menge teruen.