84
Is Penganduy te Kedhendiyà te Baley te Megbevayà
1 Nengazen he Mekeǥeǥehem,
utew mekempet is baley nu.
2 Egkesuat a utew he edhendutun!
Mibulung ad te kedseled diyà te valey nu, He Nengazen.
Is tivuuk he ǥehinawa ku engkanta te kegkelipey tenged kenikew te uuyag he Megbevayà.
3 Nengazen he Mekeǥeǥehem, Hadì ku wey Megbevayè ku, minsan is menge maya wey is menge keluǥeyluǥey, duen dan menge salag diyà te uvey te pemuhatà, ne zutun is menge pispis dan.
4 Utew zeyzey is menge etew he ziyà ed-upbà te valey nu;
layun sikandan egkanta te kedalig kenikew.
5 Utew zeyzey is menge etew he nekaangken te zesen he ebpuun diyà te kenikew, he mezesen is penganduy zan he ebisita ziyà te valey nu.
6 Dutun te kebpekevayè dan diyà te Memaza he Suǥud,
henduen be te neǥezam dan he zuen dutun menge serebseb,
ne henduen be te mid-uzanan haazà su zuen dutun wahig he nengetang-el.
7 Ne mid-iseg pa is desen dan dutun te kedhipanew zan, taman te ziyè en is kada sevaha kandan te etuvangan te Megbevayà diyà te Zion.
8 Nengazen he Megbevayà he Mekeǥeǥehem, he Megbevayà ni Jacob, pemineǥa nu is ked-ampù ku!
9 He Megbevayà, peburi nu is kelasag dey he iyan is hadì dey he mibpilì nu.
10 Is senga andew he ked-ubpà diyà te valey nu ne meupiya pa te nengkelibu he andew he ked-ubpà diyà te minsan hendei he lugar.
Edtumuen ku is kedhithitindeg diyà te ǥemawan te valey nu, He Megbevayà, kenà is ked-ubpà diyà te valey te menge lalung.
11 Su sikew, is Nengazen he Megbevayà, iring ka te andew he ebpeketayew, wey te kelasag he egkehimu he pengalang.
Ebeǥey ka te pebur wey zengeg.
Kenè nu idsekel is minsan hengkey he meupiya ziyà te nengungubpaan he wazà duen igkesawey.
12 Nengazen he Mekeǥeǥehem, utew zeyzey is edsarig diyà te kenikew.