11
Nehimu si David he Hadì te Israel
(2 Samuel 5:1-10)
1 Ne zutun, midhendiyà is langun he menge Israilihanen te ki David diyà te Hebron he egkaǥi te, “Menge kezuzumahi key kenikew.
2 Puun pa zengan, minsan te iyan pa si Saul hadì dey, ne iyan ke pa nengulu te menge Israilihanen te kebpekidtebek. Ne migkeǥiyan ka te Nengazen he Megbevayà te, ‘Elimahi nu is menge etew ku he Israilihanen he iring te ked-elima te ebantey te menge kerehidu. Iyan ka egkehimu he pengulu zan.’ ”
3 Umbe, ziyà te Hebron, mibaal si David te kebpekid-uyun te menge pengulu te Israel ziyà te etuvangan te Nengazen, ne midlenahan dan is ulu ni David te lana he ibpeehè dan he iyan en sikandin hadì te Israel, sumalà is insaad te Nengazen pinaaǥi ki Samuel.
4 Duen timpu he migenat si David wey is menge Israilihanen su edsurungen dan is Jerusalem (he egngezanan dengan te Jebus) is menge Jebusihanen he zutun mekeubpà
5 ne migkeǥiyan dan si David, “Kenè kew ebpekeseled kayi te Jerusalem.” Piru naaǥew eni David is melig-en he kutà te Zion, ne migngezanan haazà te Inged ni David hein huziyan he timpu.
6 Migkaǥi si David, “Is minsan hentei he edhuna he edsurung te menge Jebusihanen ne iyan egkehimu he peremandar te menge sundaru.” Si Joab he anak ni Zeruya iyan midhuna. Umbe iyan sikandin nehimu he peremandar.
7 Hein naaǥew en ni David haazà is utew melig-en he kutà, diyè en sikandin med-ubpà, umbe migngezanan te menge etew haazà te Inged ni David.
8 Ne mibpeumanan din haazà pepelinguti te verengbeng puun te mevavà he vahin dutun te inged. Iyan dutun midumala si Joab te kebpurung duen te zuma he vahin te inged.
9 Utew mibmelig-en si David, tenged te edtevangan sikandin te Nengazen he Mekeǥeǥehem.
Is menge Mevurut he menge Sakup ni David
(2 Samuel 23:8-39)
10 Iyan heini menge pengulu te menge sakup ni David he menge mevurut. Sikandan wey is langun he menge Israilihanen midsupurtar te kedhadì ni David, sumalà is insaad te Nengazen mehitenged te Israel.
11 Si Jashobeam he Hakmuhanen, he iyan kes edhuna zuen te tetelu he menge mevurut he sakup ni David. Dutun te senge sangkè dà ne nekepatey sikandin te 300 he etew pinaaǥi te vangkew zin.
12 Ne iyan sunud kandin si Eleazar he anak ni Dodai he kevuwazan ni Ahoa he sevaha zaan dutun te tetelu he memevurut he menge sakup ni David.
13 Sevaha zaan sikandin te miduma ki David te kebpekidtebek dan te menge Filistihanen diyà te Pas Damin. Diyè dan medtetebek te pemuleey te barli. Nemelaǥuy is menge Israilihanen,
14 piru si Eleazar wey si David, ne wazè dan dutun med-awà te teliwazà te pemuleey, ne mibpenhimetayan dan kes menge Filistihanen. Impezaag sikandan te Nengazen.
15 Ne sevaha he andew, midhendiyà te ki David haazà is tetelu he sakup din duen te surung te Adulam. Heini is tetelu he etew, ne zuma heini sikandan te 30 he menge mevurut he menge sakup ni David. Dutun he timpu ne ziyà megkampu haazà is menge Filistihanen te Suǥud he Refaim
16 ne naaǥew zan is Betlehem. Hein diyè pa si David te melig-en he elesà,
17 utew sikandin ebpekeinum. Migkaǥi sikandin te, “Deyzey pezem ke zuen egkuwa te wahig he egkeinum ku ziyà te kalut he uvey te ǥemawan te Betlehem.”
18 Umbe, mid-eles-eles midseled haazà is tetelu he mevurut he menge etew zuen te kampu te menge Filistihanen, ne migkuwa zan te wahig dutun te kalut he uvey te ǥemawan te Betlehem, ne mid-uwit dan diyà te ki David. Piru wazà inuma haazà ni David; kekenà, in-itis din haazà su pemuhat din para te Nengazen.
19 Migkaǥi sikandin te, “Megbevayè ku, kenè ku heini ed-inumen tenged te iring heini kemahal te lengesa te menge etew he impedserakan dan is untung dan te kegkuwa kayi.” Umbe wazà iyan med-inum si David. Iyan haazà mibeelan dutun te tetelu he mevurut he menge sakup ni David.
20 Si Abishai he suled ni Joab, ne iyan pengulu zutun te 30 he mevurut he menge sakup ni David. Nekepatey sikandin te 300 he menge Filistihanen pinaaǥi te vangkew zin. Umbe nehimu he nevantug sikandin he iring duen te tetelu he mevurut he menge etew,
21 piru kenà sikandin ragkes duen te tetelu. Ne tenged te iyan sikandin nevantug he zuma zutun te 30, iyan sikandin nehimu he peremandar zan.
22 Duen pa sevaha he mevurut he etew he egngezanan ki Benaya. Tig-Kabzeel sikandin, ne iyan amey zin si Jehoyada. Mibaal sikandin te wazè din iring he menge vaal, ragkes en is kedhimetayi zin te zezuwa he ventuǥan he sundaru te Moab. Duen timpu he zutun mibpendal-as din is erimaung minsan ebpenggiyew wey melandeg, ne mibpeneuǥan din duen te budsi ne midhimetayan din haazà is erimaung.
23 Sevaha pa maan dutun he timpu, midhimetayan din is Ehiptohanen he is kelangkew zin ne pitu he ǥiek wey tengà. Ne is gumaan dutun te Ehiptohanen ne vangkew he meveǥat, ne is kandin mulà he ǥumaan ne kayu zà he idlagkut. Ne mid-aǥew zin haazà is bangkew zutun te Ehiptohanen ne iyan ded heini inhimatey zin kandin.
24 Iyan haazà menge vaal he mibeelan ni Benaya he anak ni Jehoyada. Nehimu sikandin he ventuǥan iring duen te tetelu he mevurut he menge etew,
25 piru kenè din duma sikandan. Ne tenged te iyan sikandin pinekeventuǥan duen te menge zuma zin he 30, midhimu sikandin ni David he pengulu te menge vantey.
26 Iyan heini menge memetau he menge sundaru:
si Asahel he suled ni Joab;
si Elhanan he anak ni Dodo he tig-Betlehem,
27 si Shamot he tig-Haror,
si Helez he tig-Pelon,
28 si Ira he anak ni Ikesh he tig-Tekoa,
si Abiezer he tig-Anatot,
29 si Sibecai he tig-Husha,
si Ilai he tig-Ahoa
30 si Maharai he tig-Netofa,
si Heled he anak ni Baanah he tig-Netofa,
31 si Itai he anak ni Ribai he tig-Gibea, he sakup te Benjamin,
si Benaya he tig-Piraton,
32 Si Hurai he ziyà ed-ubpà te uvey te menge zal-ug diyà te Gaash,
si Abiel he tig-Araba.
33 Si Azmavet he tig-Baharum,
si Eliaba he tig-Shaalbon,
34 is menge anak ni Hashem he tig-Gizon,
si Jonatan he anak ni Shagee he tig-Harar,
35 si Ahiam he anak ni Sacar he tig-Harar,
si Elipal he anak ni Ur;
36 si Hefer he tig-Mekerat,
si Ahia he tig-Pelon,
37 si Hezro he tig-Carmel,
si Naarai he anak ni Ezbai.
38 Si Joel he suled ni Natan,
si Mibhar he anak ni Hagri,
39 si Zelek he tig-Ammon,
si Naharai he tig-Berot, he iyan tig-uwit te ǥumaan ni Joab he anak ni Zeruya,
40 si Ira wey si Gareb he menge tig-Jatir,
41 si Uria he Hitihanen,
si Zabad he anak ni Alai,
42 si Adina he anak ni Shiza he sevaha he pengulu te tribu ni Reuben wey zuen 30 he menge sakup din.
43 Si Hanan he anak ni Maaca,
si Joshafat he tig-Mitna,
44 si Uzia he tig-Ashterat,
si Shama wey si Jiel he menge anak ni Hotam he tig-Aroer,
45 Si Jediel he anak ni Shimri,
si Joha he tig-Tiz he suled ni Jediel,
46 Si Eliel he tig-Mahav,
si Jeribai wey si Joshavia he menge anak ni Elnaam,
si Itma he tig-Moab,
47 si Eliel, Obed, wey si Jaasiel he tig-Mezoba.