21
Impenlista ni David is menge Sundaru Zin
(2 Samuel 24:1-25)
1 Migkuntada ni Setanas is Israel, umbe kandin he ketau he mesinsus ni David is menge Israilihanen.
2 Ne migkeǥiyan ni David si Joab wey is menge peremandar te menge sundaru te, “Hipanew kew, wey niw vilanga is menge Israilihanen puun te Beersheba taman te Dan. Ne likù kew kayi su wey ku metueni ke pira sikandan langun.”
3 Piru midtavak si Joab te, “Berakat he ipemezakel te Nengazen heini is keet-etawan nu te 100 he takep. Piru, Mahal he Hadì, maan is egkesuatan nu te ebaal heini? Kenè be menge sakup nu man sikandan? Ne, maan is ed-uuwiten nu sikandan te salà he ebeelan nu?”
4 Piru iyan netuman is ki David dutun, umbe mid-elibet ni Joab is tivuuk he Israel, ne midlikù diyà te Jerusalem.
5 Ne midtudtul zin ki David is kezakel te menge maama he egkehimu en he ebpekidtebek: 1,100,000 is diyà te Israel ne 470,000 is diyà te Juda.
6 Piru wazè pa iapil ni Joab te kebilang is tribu ni Levi wey ki Benjamin su wazè din mesuati is suǥù te hadì.
7 Wazà daan mesuat is Megbevayà te heini he suǥù ni David, umbe midsilutan din is Israel.
8 Ne migkeǥiyan ni David is Megbevayà te, “Nekesalà a kayi te mibeelan ku. Umbe ebpehizuhizu a kenikew, Nengazen, he peseyluwa a kenikew is suluǥuen nu te salè ku, su kelelalung is mibeelan ku.”
9 Migkeǥiyan te Nengazen si Gad he menenagnà ni David te,
10 “Hendiyè ka te ki David ne ipepilì nu sikandin ke hendei zapit kayi te tetelu is egkesuatan din he idsilut ku kandin.”
11 Ne midhendiyà si Gad te ki David ne migkeǥiyan din te, “Hendei kayi is egkesuatan nu:
12 Tetelu he tuig he vitil, tetelu he vulan he kedèdeeti keniyu te menge kuntada niw, etawa tetelu he andew he pigada he ebpuun te Nengazen pinaaǥi te kedsuruy te velinsuǥuen te Nengazen he ebpendezaat diyà te tivuuk he tanà te Israel. Pilì ka wey keǥiya nu kedì ke hengkey is idtavak ku te Nengazen he midsuǥù kedì.”
13 Midtavak si David diyà te ki Gad te, “Egkereǥenan a utew te kebpilì. Deyzey pa ke iyan en is Nengazen edsilut kediey ne kenà iyan is etew su hihizuwen utew is Nengazen.”
14 Umbe, mibpaaǥi is Nengazen te kezeetan diyà te Israel, ne 70,000 he menge Israilihanen is mibpematey.
15 Ne midsuǥù daan is Megbevayà te velinsuǥuen diyà te Jerusalem para te kebpendezaat, piru zutun te kemulu en heini ebpendezaat nahalin is isip te Nengazen. Ne migkeǥiyan din haazà is belinsuǥuen he ebpendezaat te menge etew te, “Hustu en! Kenè nu en sikandan siluti.” Haazà he timpu ne diyà medhitindeg haazà is belinsuǥuen te Nengazen te gunasà ni Arauna he Jebusihanen.
16 Midlingahà si David ne neehè din is belinsuǥuen te Nengazen he midhitendeg diyà te hewhewanan, he teliwazà te langit wey tanà he egawed te lembitan he ebpeketezù diyà te Jerusalem. Ne midluhud si David wey haazà is menge ebpemendumala te Israel, he mibpengukumbalà te saku he tuus te kedlalew zan.
17 Migkeǥiyan ni David is Megbevayà te, “Iyan a midsuǥù he ibpepenlista is menge etew. Iyan a nekesalà. Heini he menge etew ne wazè dan peleng he iring te menge kerehidu. Wazè dan neveelan he salà. He Nengazen he Megbevayè ku, iyan e en siluti wey is pemilya ku. Kenè nu ipaantus heini is keet-etawan nu kayi te kemereǥenan.”
18 Ne midsuǥù te velinsuǥuen te Nengazen si Gad he keǥiyi zin si David he medtekezeg diyà te gunasà ni Arauna he Jebusihanen ne mebaal sikandin dutun te pemuhatà para te Nengazen.
19 Ne midtekezeg si David sumalà is insuǥù kandin te Nengazen pinaaǥi ki Gad.
20 Haazà he timpu, ne egunas si Arauna wey heepat he menge anak din he menge maama te trigu. Ne hein neehè dan haazà is belinsuǥuen te Nengazen nemelaǥuy wey nemen-eles haazà is heepat he menge anak ni Arauna.
21 Ne naahà ni Arauna he ebpelingguma si David. Ne mid-awà sikandin dutun te gunasà ne midluhud diyà te etuvangan ni David he tuus te midtahud din sikandin.
22 Migkeǥiyan ni David sikandin te, “Ivelegyè nu kedì heini is gunasè nu para ebpehitindeǥan ku te pemuhatà para te Nengazen, wey meengked en is kedlimasa te menge etew. Ebeyazan ku sikew ke pira is bali kayi.”
23 Migkaǥi si Arauna ziyà te ki David te, “Uya, kuwaa nud, Mahal he Hadì. Beeli nu ke hengkey is meupiya para kenikew. Ebeǥayan ku pa sikew te vaka para te ibpemuhat nu he pemuhat he edtutungen, menge kangga he egemiten te eǥunas he para idtavun, wey trigu he pemuhat he para gasa. Uya, ibeǥey ku heini langun kenikew he wazà bayad.”
24 Piru midtavak si Hadì David ki Arauna, “Kenè ku heini edewaten he wazà bayad. Ebeyazan ku sikew ke pira is bali kayi. Kenè ku egkehimu he egkuwaan ku zà heini ziyà te kenikew he idhalad diyà te Nengazen. Kenà a ebpemuhat te pemuhat he edtutungen he wazà bali kayi te kedì.”
25 Umbe, mibeyazan ni David si Arauna te 600 he vuuk he vulawan he para zutun he lugar.
26 Ne mibaal sikandin dutun te pemuhatà para te Nengazen ne nemuhat sikandin te menge pemuhat he edtutungen wey menge pemuhat he para te meupiya he kedepità. Ne mid-ampù sikandin. Ne midtavak sikandin te Nengazen pinaaǥi te kebpevulus te hapuy he ebpuun te langit te kedtutung dutun te menge pemuhat dutun te pemuhatà.
27 Ne migkeǥiyan te Nengazen haazà is belinsuǥuen te ilikù din en haazà is lembitan din dutun te gumè din.
28 Hein naahà ni David he midtavak te Nengazen is menge ked-ampù din, ne mid-uman pa sikandin mebpemuhat te menge pemuhat diyà te gunasà ni Arauna he Jebusihanen.
29 Haazà he timpu, kes Tulda te Nengazen wey kes pemuhatà para te menge pemuhat he edtutungen he mibpeveelan ni Moises diyà te sibsivayan ne ziyà te metikang he lugar te Gibeon.
30 Piru kenà ebpekehendiyà si David te kebpenginginsà te Megbevayà, su nahandek sikandin dutun te lembitan te velinsuǥuen te Nengazen.