5
Is menge Kevuwazan ni Reuben
Si Reuben ne iyan kinekekayan he anak ni Israel, ne tenged te mibeelan din he nekidhulid te sevaha zuen te menge esawa te amey zin, ne mid-ewaan sikandin te ketenged din te kegkekakey ne ziyà iveǥey te menge anak te suled din he si Jose. Umbe wazà ilista is kegkekakey zin diyà te listahan te kegkevuwad dan. Ne si Juda, minsan te edhuna sikandin he gemhanan kenà te menge suled din, wey ebpuun te tribu zin is menge pengulu ne in-awà diyà te kandin is ketenged te kegkekakey zin ne ziyà iveǥey te ki Jose. Iyan heini menge anak ni Reuben he kinekekayan ni Israel: si Hanoc, Palu, Hezron, wey si Carmi.
Iyan heini menge kevuwazan ni Joel: si Shemaya, Gog, Shimei, Micas, Reaya, Baal, wey si Beera. Iyan si Beera kes pengulu te menge kevuwazan ni Reuben hein nevihag sikandan ni Hadì Tiglat Piliser he hadì te Asiria. Iyan heini menge kezuzumahi ni Beera he nelista zutun te listahan te menge kevuwazan te kandan he tribu: si Jiel (he pengulu), si Zecarias, wey si Bela he anak ni Azaz. Heini si Azaz ne anak ni Shema, ne apù ni Joel. Heini is menge kevuwazan ni Reuben, ne ziyè dan med-ubpà te lugar he ebpuun te Aroer pehendiyà te Nebo wey Baal Meon. Ne tenged te utew en mibmezakel is menge uyaǥen dan diyà te Gilead ne neeneb dan en is dapit te edsilaan he kilid en te disirtu pehendiyà te Wahig he Eufrates. 10 Hein si Saul pa is hadì, ne nekidtebek is menge kevuwazan ni Reuben te menge Hagarnen ne nezaag dan sikandan. Ne nekuwa zan is tivuuk he egkengeubpaan dutun te Hagarnen he tivuuk he zapit te edsilaan te Gilead.
Is menge Kevuwazan ni Gad
11 Ne ziyà te tanà te Bashan, diyà te zizaya te ed-ubpaan eni Reuben, iyan kes tanà eni Gad taman te Saleca. 12 Iyan heini menge kevuwazan ni Gad: si Joel, he iyan pengulu te lavew he pemilya kandan; ne is sunud kandin ne iyan si Shafam, ne human si Janai wey si Shafat. 13 Ne is menge kezuzumahi zan diyà te kada pemilya ne iyan si Micael, Meshulam, Sheba, Jorai, Jacan, Zia, wey si Eber–pitu zan langun. 14 Iyan heini sikandan menge kevuwazan ni Abihail he anak ni Huri. Heini si Huri ne anak ni Jaroa ne apù ni Gilead, wey apù ni Micael te vuel. Heini si Micael ne anak ni Jeshishai ne apù ni Jado wey apù ni Buz te vuel. 15 Ne si Ahi he anak ni Abdiel wey apù ni Guni, ne iyan pengulu te menge pemilya zan. 16 Diyà med-ubpà sikandan te Gilead diyà te Bashan wey ziyà te nekelingut kayi he menge lugar, wey te tivuuk he penebtavà te Sharon. 17 Iyan heini sikandan langun naapil te listahan te menge kevuwazan dutun te timpu he iyan hadì si Jotam te Juda, wey si Jeroboam te Israel.
18 Duen menge 44,760 he menge sundaru te tribu ni Reuben, Gad wey ketengà he tribu ni Manase. Mibansey sikandan para te kebpekidtebek wey metau sikandan he egamit te kelasag, ispada, wey panà. 19 Nekidtebek dan te Hagarnen, Jeturnen, Nafisnen, wey Nudabnen. 20 Ne mibuyù dan te tavang te Megbevayà hein ebpekidtebek dan en, ne midtavak te Megbevayà is ked-ampù dan tenged te midsarig sikandan kandin. Umbe impezaag kandan te Megbevayà is menge Hagarnen wey is langun he mid-uǥup kayi. 21 Mibpenguwa zan is menge uyaǥen te menge Hagarnen: 50,000 he menge kemilyu, 250,000 he menge kerehidu, wey 2,000 he menge asnu. Nevihag dan daan is 100,000 he menge etew, 22 wey mezakel pa is mibpenhimetayan dan tenged te mid-uǥupan sikandan te Megbevayà te kebpekidtebek. Ne kayi zan en med-ubpà he lugar taman te nevihag sikandan.
Is Ketengà he Tribu ni Manase
23 Mezakel is ketengà he tribu ni Manase. Is neubpaan dan puun te Bashan pehendiyà te Baal Hermon, Senir, wey Buntud te Hermon. 24 Iyan heini menge pengulu te menge pemilya zan: si Efer, Ishi, Eliel, Azriel, Jeremias, Hodavia, wey si Jadiel. Menge metau sikandan te kebpekidtebek wey nevantug sikandan he menge pengulu te menge pemilya zan. 25 Piru kenà sikandan menge mepezumdumahan te Megbevayà te menge kepuun dan su ed-ezapen dan is menge kenà tutuu he Megbevayà he ed-ezapen te menge etew he mibpenhimetayan te Megbevayà dutun he lugar. 26 Umbe, ketau te Megbevayà te Israel he surunga sikandan ni Hadì Pul he hadì te Asiria (he iyan si Tiglat Piliser). Nevihag ni Pul is menge tribu ni Reuben, Gad, wey ketengà he tribu ni Manase ne ziyè din uwita te Hala, Habor, Hara, wey ziyà te Wahig te Gozan, ne zutun sikandan taman guntaan.