20
Nezaag ni Jehoshafat is Moab wey Ammon
1 Neuma is timpu he migenat is menge Moabitanhen wey menge Amonihanen, duma zan is duma he menge Meunhanen su ebpekidtebek dan ki Jehoshafat.
2 Duen midhendiyà te ki Jehoshafat he menge etew he migkaǥi te, “Duen ebpekeuma he menge sundaru he utew mezakel su edsurungen ke zan. Diyà heini sikandan ebpuun te Edom he ziyà layun te Daǥat he Minatey. Diyè dan en te Hazazon Tamar” (he iyan is En Gedi).
3 Utew nahandek si Jehoshafat, ne midangep sikandin diyà te Nengazen. Ne mibmandù sikandin he mebpuasa is langun he tig-Juda.
4 Ne zutun netiǥum is menge etew he ebpuun te langun he inged te Juda para te kebuyù te tavang te Nengazen.
5 Ne midhitindeg si Jehoshafat diyà te etuvangan te keet-etawan te Juda wey te Jerusalem diyà te etuvangan te veǥu he lama te valey te Nengazen.
6 Ne migkaǥi te, “He Nengazen, Megbevayà te menge kepuun dey, iyan ka kes Megbevayà he ziyà te langit. Iyan ka mibayàbayà te langun he ginhedian kayi te kelibutan. Gemhanan ka ne wazà ebpekesukul kenikew.
7 He Megbevayè dey, kenè be is menge meǥinged kayi he tanà impesegseg nu te menge etew nu he menge Israilihanen? Kenè be imbeǥey nu heini he tanà kandan te menge kevuwazan ni Abraham he emiǥu nu, su wey zan maangken heini taman te taman?
8 Kayi med-ubpà sikandan wey kayi zan tukuza is baley te Nengazen para te zengeg nu. Migkaǥi sikandan te,
9 ‘Emun duen ebpekeuma he kemereǥenan kayi te kenami iring te tebek, dalem, daru, wey ke vitil, ne edhitindeg key ziyà te etuvangan nu ziyà te etuvangan kayi te valey te Nengazen he kayi ka ebeǥayi te zengeg. Ne netuenan dey he ebpekevuyù key te tavang kenikew te menge kemereǥenan dey, ne ebpemineǥen key kenikew wey edluwasen key kenikew.’
10 “Ne ǥuntaan edsurungen key te menge etew he ebpuun te Ammon, Moab, wey Buntud he Seir. Dengan ne wazè nu ituǥut haazà is ubpeey zan he edsekupen te menge Israilihanen hein nekeǥawas dan diyà te Ehipto. Midlevayan dà heini te menge Israilihanen ne wazè dan sikandan penhimetayi.
11 Ne ǥuntaan iyan heini ibales dan kenami. Edsurungen key zan para mesegseg key kayi te tanà he imbeǥey nu kenami he egkepengevilin dey.
12 He Megbevayè dey, kenè nu ve sikandan edsilutan? Kenè key ebpekehimu he edsukul kayi te utew mezakel he menge sundaru he edsurung kenami. Kenè dey egketuenan ke hengkey is ebeelan dey, piru edsarig key kenikew.”
13 Hein kemulu pa zutun ebpemenhitindeg is langun he menge maama te Juda duma te menge esawa zan wey menge anak dan, ragkes dutun is dezeisek he menge anak dan,
14 ne zutun midumala te Mulin-ulin te Nengazen si Jahaziel he zuma zan te midhitindeg dutun te kezekelan. Si Jahaziel ne anak ni Zacarias. Si Zacarias ne anak ni Benaya. Si Benaya ne anak ni Jeiel. Ne si Jiel ne anak ni Matania he Levihanen he kevuwazan ni Asaf.
15 Migkaǥi si Jahaziel te, “Hadì Jehoshafat, wey sikiyu is langun he mid-ubpà kayi te Juda wey Jerusalem, pemineg kew! Iyan heini egkeǥiyen te Nengazen keniyu, ‘Kenè kew mahandek wey mebmeluya tenged kayi te mezakel he menge sundaru, su kenè kew iyan ebpekidtebek, kekenà, iyan a is Megbevayà.
16 Keeselem tupang kew pehendiyà te kandan. Egkeehè niw sikandan he edtekezeg diyà te Beyeey te Ziz, he netemanan te zal-ug he ebpehendiyà te sibsivayan diyà te Jeruel.
17 Kenè en kinahanglan he ebpekidtebek kew pa. Andam kew zà wey mebpekelig-en, ne ahaà niw is kezeeǥan he ebeelan te Nengazen para keniyu. Sikiyu is menge tig-Juda wey tig-Jerusalem, kenè kew mahandek wey mebmeluya. Etuvanga niw sikandan keeselem su is Nengazen iyan eduma keniyu.’ ”
18 Ne midluhud si Jehoshafat wey is langun he tig-Juda wey tig-Jerusalem te ked-azap te Nengazen.
19 Ne nemenhitindeg is duma he menge Levihanen he ebpuun te menge pemilya ni Kohat wey ni Kora ne midalig dan te Nengazen he Megbevayà te Israel, te utew mezesen he laǥeng.
20 Meselem dutun te sunud he andew, si Jehoshafat wey is menge sundaru zin, midhipanew zan pehendiyà te sibsivayan te Tekoa. Te kemulu pa sikandan edhipanew, midteren si Jehoshafat ne migkaǥi te, “Pemineǥa a keniyu, sikiyu is tig-Juda wey tig-Jerusalem! Tuu kew te Nengazen he Megbevayè niw, ne ebmelig-en kew. Tuuwi niw is menge ebpeneuven din ne ebmezeeǥen kew.”
21 Hein nekepasad sikandin ne mibpekisambag sikandin te menge etew. Ne zutun mibpilì sikandin te menge perekanta he iyan edhuna kandan he egkanta te kedalig te Nengazen tenged te egkein-inuwan he kegkewaǥas din. Iyan heini kanta zan: “Peselemati niw is Nengazen tenged te wazà pidtemanan te gaǥew zin.”
22 Ne hein mibpuun dan en megkanta te kedalig, is menge Amonihanen, menge Moabitanhen, wey menge tig-Buntud he Seir he edsurung te Juda, ne impedtebek sikandan te Nengazen.
23 Midsurung te menge Amonihanen wey menge Moabitanhen is menge sundaru ziyà te menge tig-Buntud he Seir ne nengepatey zan langun. Ne hein nengepatey zan en sikandan, ne mid-uuney zan mebpehimhimetayà.
24 Hein nemekeuma is menge sundaru te Juda ziyà te metikang he lugar he zutun egkepantew haazà is sibsivayan, ne neehè dan is menge kuntada zan he nemematey he nemekererey-as dutun te tanà. Wazà minsan sevaha he uuyag.
25 Ne mibeyaan haazà ni Jehoshafat duma is menge sakup din ne mibpenguwa zan is menge azen dan. Dekelà is nekuwa zan he menge gelemiten, menge visti wey zuma pa he menge vutang he menge mahalen he kenè dan egkeekatan te ed-uwit. Tetelu he andew is kedtiǥuma zan dutun su utew zekelà haazà he azen.
26 Hein ikeepat en he andew ne midtiǥum sikandan diyà te Suǥud te Beraca ne midalig dan dutun is Nengazen. Umbe egngezanan heini te Suǥud te Bereca taman guntaan.
27 Ne midlikù dan diyà te Jerusalem he mibpenguluwan ni Jehoshafat. Utew zan nengelipey tenged te impezaag kandan te Nengazen is menge kuntada zan.
28 Hein nekeuma zan diyà te Jerusalem, ne ziyè dan medlaus te valey te Nengazen, is edtukar te menge alpa, lira, wey menge trumpita.
29 Hein nezineg te langun dutun te ginhedian ke mibmenumenu mebpekidtebek is Nengazen te menge kuntada te Israel, utew zan nengahandek te Megbevayà.
30 Umbe, melinawen is ginhedian ni Jehoshafat su midhimu te Megbevayà he kenè sikandin mekepekidtebek te menge etew he nekeliǥuy kandin.
Is Ketepusan te Kedhadì ni Jehoshafat
(1 Menge Hadì 22:41-50)
31 Iyan haazà kedhadì ni Jehoshafat diyà te Juda. Ne 35 he tuig is keǥurang ni Jehoshafat hein nehimu sikandin he hadì. Diyà sikandin te Jerusalem med-ubpà, ne midhadì sikandin seled te 25 he tuig. Is iney zin iyan si Azuba he anak ni Shilhi.
32 Midsunud din is menge ulaula te amey zin he si Asa ne wazè din heini ewai he menge vaal. Nekepenunuat te Nengazen is menge vaal zin.
33 Piru wazè din ewaa is langun he menge simbahan diyà te menge metikang he lugar, ne is menge etew, wazè dan gihapun mebpurung medsunud te Megbevayà te menge kepuun dan.
34 Is duma pa he ǥuǥud mehitenged te kedhadì ni Jehoshafat, puun pa te puunà taman te ketepusan, miguǥud ni Jehu he anak ni Hanani, diyà te insurat din he neragkes diyà te ingkesurat diyà te Libru he Midsuratan te Kaaǥi te menge Hadì te Juda.
35 Piru te huziyan en he vahin te kedhadì ni Jehoshafat diyà te Juda, nekiduma sikandin ki Hadì Ahazia he hadì te Israel he sevaha he mezaat he etew.
36 Neuyun sikandan he ebpevaal te menge varku para te kebpetiǥayun. Diyè dan heini peveeli te pentalan te Ezion Geber.
37 Piru migkeǥiyan ni Eliezer he anak ni Dodavahu he tig-Maresha si Jehoshafat te, “Tenged te nekidsevaha ka ki Ahazia, ne edèdeetan te Nengazen is mibpeveelan niw.” Ne nezeetan haazà is barku ne wazè en heini mekeǥenat para te kebpetiǥayun.