22
Is Kedhadì ni Ahazia ziyà te Juda
(2 Menge Hadì 8:25-29; 9:21-28)
1 Si Ahazia is kineheziyan he anak ni Jehoram ne iyan midhimu te menge etew ziyà te Jerusalem he hadì dan. Su is duma he menge anak ni Jehoram ne mibpenhimetayan te menge Arabo he nemenurung diyà te Juda. Umbe iyan nehimu he hadì diyà te Juda si Ahazia he anak ni Hadì Jehoram.
2 Mibpenuiǥen si Ahazia te 22 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te senge-tuig. Is iney zin iyan si Atalia he apù ni Omri.
3 Iyan daan midsunud ni Ahazia is mid-ulaula te pemilya ni Ahab, su mid-iniyat sikandin te iney zin te kebaal te mezaat.
4 Mezaat is ulaula zin diyà te etuvangan te Nengazen iring te mibeelan te pemilya ni Ahab, su hein minatey en is amey zin, ne iyan en nehimu he megsesambag din is menge sakup te pemilya ni Ahab.
5-6 Iyan midsunud din is sambag dan he mibpekidsevaha sikandin ki Joram he anak ni Hadì Ahab he hadì te Israel. Miduma sikandin ki Joram te kebpekidtebek ki Hadì Hazael he hadì te Aram. Midtebek dan diyà te Ramot Gilead, ne nepelian si Joram. Ne mid-ulì sikandin diyà te inged he Jezreel su zutun din edteǥazi is kegkeulii te menge palì din. Ne hein diyè en sikandin, ne mibpenumbaley ziyà te kandin si Hadì Ahazia he hadì te Juda.
7 Heini is kebpenumbaley ni Ahazia ki Joram ne migamit te Megbevayà para mepatey si Ahazia. Su hein diyè en si Ahazia te Jezreel, ne mid-uǥupan din si Joram te kebpekidtebek ki Jehu he anak ni Nimshi. Si Jehu is mibpilì te Nengazen te kedezaat te pemilya ni Ahab.
8 Ne te kemulu edezeeti ni Jehu is pemilya ni Ahab, ne neehè din is menge upisyal te Juda wey is menge anak te menge kezuzumahi ni Ahazia he miduma ki Ahazia. Ne mibpenhimetayan din sikandan.
9 Ne impepen-ahà ni Jehu te menge sakup din si Ahazia ne ziyè dan maahà te inged he Samaria is mid-eles. Ne mid-uwit dan sikandin diyà te ki Jehu ne midhimetayan din. Ne inleveng dan is minatey he lawa zin tenged te kedtehuza zan te apù din he si Jehoshafat, su ke sikandan te, “Apù sikandin ni Jehoshafat, kes etew he midangep te Nengazen te tivuuk he ǥehinawa zin.”
Ne zutun wazè en minsan sevaha he nesamà te sakup te pemilya ni Ahazia he ereg he egkahadì.
Si Atalia wey si Joash
(2 Menge Hadì 11:1-16)
10 Hein netuenan ni Atalia he minatey en is anak din he si Ahazia, midisisyun sikandin he ebpenhimetayan din is langun he sakup te pemilya te hadì te Juda.
11 Piru midlibri ni Jehosheba is anak ni Ahazia he si Joash hein meǥaan en edhimetayi sikandin wey is duma pa he menge anak te hadì. Heini si Jehosheba etevey ni Ahazia he anak he vahi ni Hadì Jehoram, he esawa te memumuhat he si Jehoyada. In-eles din si Joash wey is ed-elima kandin diyà te sevaha he ruǥu zuen te valey te Nengazen, umbe wazà sikandin mehimetayi ni Atalia.
12 Seled te heenem he tuig, ne ziyà i-eles te valey te Megbevayà si Joash te iyan pa zutun ebmandù te Juda si Atalia he rayna.