3
Is menge Hangyù ni Ruth diyà te ki Boaz
Ne sevaha he andew, migkaǥi si Naomi ziyà te ki Ruth. Ke sikandin te, “Egkesuatan ku he meesawa ka para zuen ebpekeuyamu kenikew. Egketenuzan nu ve si Boaz is megeget he kezuzumahi ta, he nehimu he zuma nu te kedterebahu is suluǥuen din he vahi. Ne netuenan ta he ǥuntaan te mezukilem diyà sikandin te egunasan din su ebpemalid te barli. Umbe, pemeziǥù ka, wey ǥamit ka te menge pehemut wey bivisti ka te meupiya ne tupang ka zutun te egunasan. Iyan, kenè ka zèpa paahà kandin emun kenè pa ebpekepasad sikandin he ed-inum wey egkaan. Ne emun edlipezeng en, peniizi nu ke hendei sikandin edhizeǥà. Ne emun ebpekelipezeng en sikandin ne hendiyè ka ne luwisa nu is malung din diyà te paa zin ne hizeǥè ka zutun. Ne egkeǥiyan ke zin dutun ke hengkey is ibpeulaula zin kenikew.” Ne migkaǥi si Ruth te, “Is langun he migkaǥi nu, edtumanen ku.” Ne zutun midtupang sikandin dutun te egunasan ne haazà is langun he insuǥù kandin te enuǥang din, iyan daan mibeelan din.
Ne hein nekepasad si Boaz is egkaan wey ed-inum wey meupiya is gehinawa zin, midhizeǥà sikandin dutun te uvey te intambù he barli. Ne hein nekelipezeng mid-uvey si Ruth is ednaneynaney, ne midluwis din is malung diyà te menge paa ni Boaz, ne midhizeǥà dutun. Ne hein metaneb en te kezukileman nepukew si Boaz su zuen ingketingkemed din ne mid-ehè din ne utew sikandin neinuinu su maan is duen bahi he edhidhizeǥà diyà te uvey te menge paa zin. Ne ke sikandin te, “Hentei ka?” Ne ke si Ruth te, “Si Ruth a, is sevaha he edlingahà kenikew. Ebpeelima a kenikew su sevaha ka he anggam te esawa ku, ne zuen nu ketengdanan te kedtavang kedì, umbe ebpeesawa a kenikew.” 10 Migkaǥi si Boaz te, “Berakat he tuvazi ka, bayi, te Nengazen su pinaaǥi kayi te edhimuwen nu, utew pa zekelà is tavang nu ǥuntaan engki Naomi kenà duen te nehuna. Ne wazè ka zaan mebpeelima te menguhed he maama he sepian wey minsan kenà sepian. 11 Ne kenè ka, bayi, mahandek, su netuenan te langun he menge meǥinged kayi he utew ka metazeng he vahi. Edhimuwen ku is langun he egkesuatan nu. 12 Tutuu iyan he mesipeg a kenikew, ne zuen ku ketengdanan te ked-elima kenikew, piru zuen edhuna pa he mesipeg nu kenà siak. 13 Dini ke zà te heini he kezukilemi, ne keeselem ne ed-ahaan ta ke edhimuwen din is televaken din kenikew. Emun ebpemineg sikandin ne meupiya; piru emun kenà, ne ibpenangdù ku ziyà te uuyag he Nengazen he edhimuwen ku is televaken ku kenikew. Sigi, kayi ke zà lipezeng taman te egkepawà.”
14 Ne ziyà si Ruth medhidhizeǥà te uvey te paa zin taman te egkepawà. Ne hein kemulu pa merusrusirem ne mid-enew si Ruth su wey kenà sikandin mekilala, su kenà egkesuat si Boaz he zuen egkesayud he midhendiyà si Ruth te kandin diyà te gunasà. 15 Ne migkaǥi zutun si Boaz te, “Ihengkayi nu haazà is insamput nu ne izempas nu.” Ne hein mibeelan ni Ruth haazà, imbusbus dutun ni Boaz is menge heenem he kilu he barli ne mid-uǥupan din su wey mevava ni Ruth haazà. Ne zutun mid-ulì sikandin diyà te inged.
16 Ne hein nekeuma sikandin, mid-insaan sikandin ni Naomi te, “Hengkey, bayi, is neulaula kenikew?” Ne zutun midtudtulan sikandin ni Ruth te langun he mid-ulaula ni Boaz. 17 Ke sikandin daan te, “Migkaǥi zin he kenà meupiya ke ed-ulì a zini te kenikew te wazè ku uwiten, umbe imbeǥey zin kediey heini is barli.” 18 Ne migkaǥi zutun si Naomi te, “Ubpàubpà ke zà, bayi, taman te egketuenan ta ke hengkey is egkeulaula su kenà si Boaz edhimeley ǥuntaan taman te kenè din pa egkehusey heini is neulaula.”