1 Samuel
1
Is Ked-enaka ki Samuel
Duen sevaha he etew he kevuwazan ni Zuf he egngezanan ki Elkana. Heini sikandin ne ziyà med-ubpà te Rama diyà te vuvungan te Efraim. Anak sikandin ni Jeroham he anak ni Elihu. Ne si Elihu anak sikandin ni Tuhu he anak ni Zuf, he ebpuun te tribu ni Efraim. Si Elkana ne dezuwa is esawa zin. Iyan ngazan te sevaha si Hana, ne is sevaha si Penina. Duen mulà menge anak ni Penina, ne si Hana wazè din.
Ne te kada tuig iyan betasan ni Elkana wey is pemilya zin is edhendiyè dan te inged he Shilo su ed-azap dan wey ebpemuhat dan diyà te Nengazen he Mekeǥeǥehem. Iyan dutun menge memumuhat te Nengazen is dezuwa he anak ni Eli he egngezanan ki Hofni wey ki Finehas. Kada ebpemuhat si Elkana, ebehinen din is duma ne ibeǥey zin ki Penina wey ziyà te menge anak dan. Ne is ki Hana tenged te utew zin mahal minsan te wazè din anak su midhimu sikandin te Nengazen he kenà ebpekaanak, ne edezuwaan din mulà is kandin he vahin. Ne tenged te kenà sikandin ed-anak, layun ebaal si Penina te igkererengiti wey ed-el-elezen din is duwey zin. Iyan heini egkeulaula kada tuig. Kada edhendiyà si Hana te valey te Nengazen ne ed-un-undahan sikandin ni Penina umbe ebpekesineǥew zà sikandin ne kenà egkesuat he egkaan. Migkeǥiyan ni Elkana sikandin te, “Maan is edsineǥew ka? Maan is kenè ka egkaan? Maan is layun ke zà egkeseeng? Kenè be mibmahal e pa kenikew kenà te sepulù he menge vatà?”
9-10 Sevaha he andew zutun, nekepasad dan he egkaan diyà te valey te Nengazen diyà te Shilo, midhitindeg si Hana ne nengemuyù ne ebpekesineǥew en, tenged te utew mesakit is gehinawa zin. Ebpimpinuu zutun si Eli is memumuhat te uvey te ǥemawan te valey te Nengazen. 11 Ne zutun midsaazan ni Hana is Nengazen he egkaǥi, “Nengazen he Mekeǥeǥehem, ahaa nu is ked-antus ku. Tentenuzi a is uripen nu ne kenà a kenikew lipati. Emun ebeǥayan a kenikew te anak he maama, ne ibeǥey ku sikandin kenikew para ebpenilbi kenikew te tivuuk he untung din. Ne iyan tuus te kebpenilbi zin is kenè ku edtempezan is bulvul zin.”
12-13 Ne te kemulu sikandin ebpengemuyù diyà te Nengazen, naahà ni Eli is bèbè din he ebekèbekè dà ne wazà egkezineg he laǥeng. Neisip din is nehubug sikandin. 14 Ne zutun migkeǥiyan din te, “Keenu ke en bes ed-engked te kebpelelangut? Engkezi nu en is ked-inum nu!” 15 Migkaǥi si Hana te, “Kenà a egkelangut, datù, wey wazà a keenu mekeinum te ebpekelangut he inumen. Egkeǥiyen ku zà diyà te Nengazen is utew mereǥen he egkeǥezam ku. 16 Kenè nu isipa he mezaat a he vahi. Nengemuyù e zà tenged te utew ku kegkeseeng.” 17 Migkaǥi si Eli te, “Hipanew kad ne kenè ke en maan meseeng. Berakat he is Megbevayà te Israel ne ibeǥey zin kenikew is ebuyuen nu kandin.” 18 Migkaǥi si Hana te, “Datù, selamat te ketulanged nu kedì.” Ne zutun migenat, ne migkaan en human sikandin ne mibmeupiye en is gehinawa zin.
19 Meselem utew zutun te sunud he andew, mid-enew si Elkana wey is tivuuk he pemilya zin ne mid-azap dan is Nengazen. Ne human dan med-ulì diyà te ubpaan dan he Rama. Ne midhulizan ni Elkana si Hana ne midtavak te Nengazen is menge pengemuyù ni Hana he ebeǥayan sikandin te anak. 20 Ne zutun mibmeǥingey sikandin, ne neuma is penahun ne mid-anak sikandin te maama. Migngezanan te Samuel, su ke sikandin te, “Geina te mibuyù ku sikandin diyà te Nengazen.”
Inhalad ni Hana si Samuel
21 Neuma is penahun he si Elkana wey is tivuuk he pemilya zin ebpemuhat sikandan diyà te Nengazen iring te ebeelan dan kada tuig. Iyan heini kes andew te kebpemuhat din te kedtuman te penaad din te Nengazen. 22 Piru si Hana wazà meduma. Migkeǥiyan din is esawa zin te, “Emun egkelutas en heini is batà, ne ed-uwiten ku sikandin diyà te valey te Nengazen ne idhalad ku ziyà te kandin, ne ziyè en sikandin ed-ubpà te tivuuk he untung din.” 23 Midtavak si Elkana te, “Beeli nu en ke hengkey is meupiya he egkesuatan nu. Kayi ke zà taman te egkelutas sikandin. Deyzey ke igkelipey te Nengazen is insaad nu kandin.” Ne mibpelintetaǥak si Hana is ed-etiman te anak din.
24 Hein nelutas en kes batà, mid-uwit ni Hana ziyà te valey te Nengazen diyà te Shilo. Mid-uwit daan sikandin te tudu he vaka he tetelu en he tuig, wey herina he tengà te saku, wey binu he ziyà itaǥù te lundis he teleǥuey. 25 Ne hein nelapè en kes baka mid-uwit dan si Samuel diyà te ki Eli. 26 Migkeǥiyan ni Hana si Eli te, “Datù, egketenuzan nu pa vuwa, iyan a kes bahi he midhitindeg kayi zengan is ebpengemuyù diyà te Nengazen. 27 Mibuyù ku heini he vatà diyà te Nengazen ne imbeǥey zin kedì is mibuyù ku. 28 Umbe, guntaan idhalad ku sikandin diyà te Nengazen, wey mekepenilbi sikandin te Nengazen seled te tivuuk he untung din.” Ne zutun midsimba zan is Nengazen.