23
Midluwas ni David is Inged te Keila
1 Hein netudtulan si David he edsurungen te menge Filistihanen is Keila wey ebpenguwaan dan is menge neraǥun te menge tig-Keila,
2 mid-insà sikandin te Nengazen te, “Edsurungen ku ve is menge Filistihanen.” Midtavak is Nengazen te, “Uya, surunga nu en wey melibri is Keila.”
3 Migkaǥi is menge sakup ni David te, “Minsan te kayi zà te Juda ne egkahandek key wey pe be ke edhendiyè kiw te Keila te kebpekidtebek te menge Filistihanen!”
4 Mid-uman med-insà si David diyà te Nengazen, ne migkeǥiyan sikandin te, “Hendiyè ka te Keila, su edtevangan ku sikew ne egkezaag nu is menge Filistihanen.”
5 Midhendiyà si David te Keila duma is menge sakup din para ebpekidtebek te menge Filistihanen. Utew mezakel he menge Filistihanen is mibpenhimetayan dan, ne nekaaǥew zan te menge uyaǥen. Nelibri zan dutun is tig-Keila.
6 (Hein mibpelaǥuy si Abiatar he ziyà mebpevayà te ki David diyà te Keila, mid-uwit din is ipud te memumuhat.)
Mibpen-ahà ni Saul si David
7 Duen neketudtul ki Saul he ziyà si David te Keila. Umbe nekekaǥi si Saul te, “Mibpeveyveyaan sikandin kedì te Megbevayà, su henduen be te mibpirisu zin is keugelingen din te kedseled din te inged he nelingut te verengbeng.”
8 Midtiǥum ni Saul is langun he menge sundaru zin su edhendiyè dan te Keila su edliǥuyan dan si David wey is menge sakup din.
9 Ne hein netuenan ni David is planu ni Saul, migkeǥiyan din si Abiatar kes lavew he memumuhat he kuwaa zin kes ipud.
10 Ne mid-ampù si David te, “He Nengazen, Megbevayà te Israel, netuenan ku te suluǥuen nu, he duen planu ni Saul he edhengkayi te Keila su ebpenhimetayan din is meǥinged kayi tenged kedì.
11 Edhengkayi ve vuwa si Saul sumalà te nezineg ku? Ibeǥey ed be vuwa te tig-Keila ki Saul? He Nengazen, Megbevayà te Israel, tug-ani a is suluǥuen nu.” Midtavak is Nengazen te, “Uya, edhendiyan si Saul.”
12 Mid-uman med-insà si David te, “Ibeǥey ed be vuwa wey is menge sakup ku te meǥinged te Keila ki Saul?” Midtavak is Nengazen te, “Uya, ibeǥey kew zan.”
13 Ne zutun mid-awà dutun si David te Keila wey kes 600 he menge sakup din ne midtazintazin dan diyà te zuma he lugar. Ne hein nezineg ni Saul he wazè en diyà te Keila si David, ne wazè en sikandin medhendiyà.
14 Mid-eles si David diyà te menge vuvungan diyà te sibsivayan te Zif. Andew-andew is kebpen-ahaa kandin ni Saul, piru wazà iveǥey sikandin te Megbevayà ki Saul.
15 Sevaha zutun he andew, te ziyà si David te Horesh diyà te sibsivayan te Zif, nezineg din he ebpehendiyà si Saul su edhimetayan sikandin ni Saul.
16 Midhendiyà si Jonatan te kandin diyà te Horesh su midasiǥ din he edtevangan sikandin te Megbevayà.
17 Migkaǥi si Jonatan te, “Kenè ka mahandek su is amey ku ne kenà ebpekekaid kenikew. Su netuenan en te amey ku he egkehimu ka he hadì te Israel, ne ikezuwè e zà kenikew.”
18 Mibaal zan dutun is dezuwa te kebpekid-uyun diyà te etuvangan te Nengazen. Ne zutun mid-ulì si Jonatan, ne si David mibpelintetaǥak dà diyà te Horesh.
19 Ne zuen, duen menge tig-Zif he midhendiyà te ki Saul ziyà te Gibea ne migkaǥi te, “Si David diyà med-eles te kenami ziyà te Horesh he vuntud te Hakila, dapit te divavà te Jeshimon.
20 Umbe, Mahal he Hadì, hendiyè ka ke hengkey is egkesuatan nu ne iyan key en metau te kebpelaza zey kandin kenikew.”
21 Midtavak si Saul te, “Tuvazi kew te Nengazen te kegkeseeng niw kedì.
22 Uya, ulì kew en ne keǥiyi e zà keniyu ke hendei sikandin wey hentei layun is ebpekaahà kandin dutun, su zuen neketudtul kedì he utew sikandin metau.
23 Peniizi niw is langun he lugar he ed-elesan din, ne likù kew kayi te kedì emun siguradu en. Ne eduma a keniyu; ne emun diyè pa te zuma he elesà ne ebpen-ahaan ku minsan meeneb ku pa is tivuuk he tanà te Juda.”
24 Ne zutun migenat dan medhuna ki Saul pehendiyà te Zip.
Haazà he penahun ne ziyà si David wey is menge sakup din te sibsivayan te Maon diyà te Araba, he zapit te egkezivavà te Jeshimon.
25 Hein nekeuma si Saul wey is menge sakup din diyà te Zip, ne mibpen-ehè dan si David. Hein netuenan heini ni David, ne mid-eles sikandin dutun te zekelà he vatu ziyà te sibsivayan te Maon, ne ziyà sikandin med-ubpàubpà. Hein netuenan ni Saul, mibpen-ehè din diyà te sibsivayan te Maon.
26 Si Saul wey is menge sakup din ne ziyè dan te zivaluy te vuntud, ne si David wey is menge sakup din ne ziyè dan daan te zivaluy zutun te vuntud ne migaanggaan dan mebpelaǥuy su edlikayan dan si Saul. Ne hein meǥaan en egkeseuti ni Saul wey te menge sakup din si David wey is menge sakup din, ne
27 duen mid-uvey ki Saul he nenudtul te, “Gaanggaan ka, likù dèpa! Su edsurungen te menge Filistihanen is nasyun tew.”
28 Ne zutun neengkezan ni Saul te edlayas si David ne midlikù te kebpekidtebek te menge Filistihanen. Ne tenged te zutun he lugar mebpesuwayà si David wey si Saul, ne haazà he lugar iyan ngazan din is, “Batu he Midsuweyaan.”
29 Puun dutun, midhendiyà si David te En Gedi ne ziyà sikandin med-eles.