27
Si David Duma te menge Filistihanen
1 Neisip ni David is, “Duen timpu he edhimetayan a iyan ni Saul. Deyzey pa ke ebpelaǥuy ad nasì diyà te tanà te menge Filistihanen para meengkezi e en ni Saul te ebpen-ahà diyà te Israel, wey kenè e zin en mezekepi.”
2 Umbe, midhendiyà si David wey kes menge sakup din he 600 te ki Hadì Akish he hadì te Gat, te anak ni Maoc.
3 Diyè dan med-ubpà te Gat duma ki Akish. Miduma zan en diyà is pemilya zan. Miduma zaan ni David is dezuwa he esawa zin he si Ahinoam he tig-Jezreel wey si Abigail he tig-Carmel he iyan esawa zengan ni Nabal.
4 Hein netuenan ni Saul he mibpelaǥuy en si David diyà te Gat, ne wazè din en pen-ahaa.
5 Ne zutun migkeǥiyan ni David si Akish te, “Emun igkeǥaǥew a kenikew, beǥayi key te sevaha he inged he zutun key ed-ubpà. Kenà kinahanglan he kayi key ed-ubpà te inged he ed-ubpaan nu te hadì.”
6 Ne te haazè dà he andew imbeǥey ni Akish kandin is Ziklag. Ne puun dutun taman guntaan, is Ziklag ne ǥaked te menge hadì te Juda.
7 Mid-ubpà si David te lugar te menge Filistihanen seled te senge tuig wey heepat he vulan.
8 Dutun he timpu edsurungen ni David wey te menge sakup din is menge Gisurhanen, Girzanen, wey menge Amalikanhen. Puun pa zengan heini he menge etew ne ziyà med-ubpà te lugar he ebpehendiyà te Shur wey Ehipto.
9 Dutun te kedsurung eni David, ed-eminen dan edhimetayi is menge maama wey menge vahi, ne ebpenguwaan dan is menge kerehidu, menge vaka, menge asnu, menge kemilyu, wey apil en is menge visti. Ne edlikù dan diyà te ki Akish.
10 Emun ed-insà si Akish ke hendei zan medsurung te haazà he andew, ne edtavak si David te midsurung dan diyà te Negev diyà te Juda wey ke sakup be te Negev he ed-ubpaan te menge Jerameelinhen wey ke sakup be te Negev he ed-ubpaan te menge Kinhanen.
11 Ed-eminen eni David te edhimatey is menge maama wey menge vahi para wazà minsan sevaha he ebpekehendiyà te Gat he ebpekepenudtul ke hengkey is mibeelan din. Iyan heini ebeelan layun ni David hein diyà meke-ubpà te sakup te Filistia.
12 Dekelà is kedsarig ni Akish ki David, neisip din is, “Edumutan en guntaan si David te menge zuma zin he Israilihanen, umbe ǥuntaan, suluǥuen kud sikandin taman te taman.”